ഗസ്സ വെടിനിർത്തൽ രണ്ടാംഘട്ടം; ഹമാസ്​ നേതൃത്വവുമായി മധ്യസ്ഥ രാജ്യങ്ങൾ ആശയവിനിമയം തുടങ്ങി

ഗസ്സ സിറ്റി: ഗസ്സ വെടിനിർത്തൽ രണ്ടാം ഘട്ടവുമായി ബന്ധപ്പെട്ട്​ ഹമാസ്​ നേതൃത്വവുമായി മധ്യസ്ഥ രാജ്യങ്ങൾ ആശയവിനിമയം തുടങ്ങി. ഇസ്രായേൽ പ്രധാനമന്ത്രി ബിന്യമിൻ നെതന്യാഹു, സുരക്ഷാ മേധാവികളുടെ അടിയന്തരയോഗം വിളിച്ചു.​ ഖലീൽ അൽ ഹയ്യയുടെ നേതൃത്വത്തിലുള്ള ഹമാസ്​ സംഘം തുർക്കി ഇന്‍റലിജൻസ്​ മേധാവിയുമായി ഇന്ന​ലെ വിശദമായ ചർച്ച നടത്തി. വെടിനിർത്തൽ രണ്ടാം ഘട്ടവുമായി ബന്ധപ്പെട്ട്​ തങ്ങളുടെ നിലപാടുകൾ ഹമാസ്​ സംഘം മധ്യസ്ഥ രാജ്യമായ തുർക്കിക്ക്​ കൈമാറിയതായി മാധ്യമങ്ങൾ റിപ്പോർട്ട്​ ചെയ്തു.

ഇസ്രായേലിൽ സുരക്ഷാമേധാവികളുടെ പ്രത്യേക യോഗം പ്രധാനമന്ത്രി ബിന്യമിൻ നെതന്യാഹു വിളിച്ചു ചേർത്തു. ഹമാസിന്‍റെ നിരായുധീകരണം ഉടൻ നടപ്പാക്കണം എന്നതുൾപ്പടെയുള്ള നിർദേശങ്ങളാണ്​ യോഗം ചർച്ച ചെയ്തതെന്നാണ്​ റിപ്പോർട്ട്​. ഗസ്സ വെടിനിർത്തൽ രണ്ടാംഘട്ട ചർച്ചക്ക്​ മുന്നോടിയായി യുഎസ്​ പശ്ചിമേഷ്യൻ ദൂതൻ സ്റ്റിവ്​ വിറ്റ്കോഫ്​ അമേരിക്കയിലെ മിയാമിയിൽ മധ്യസ്ഥ രാജ്യങ്ങളുമായി പ്രാരംഭ ചർച്ച നടത്തി.

ഖത്തർ പ്രധാനമന്ത്രി ശൈഖ് മുഹമ്മദ് ബിൻ അബ്ദുറഹ്മാൻ ബിൻ ജാസിം ആൽഥാനി, തുർക്കി വിദേശകാര്യ മന്ത്രി ഹകാൻ ഫിദാൻ, ഈജിപ്ത്​ വിദേശകാര്യ മന്ത്രി ബദ്​ർ അബ്​ദുല്ലത്തി എന്നിവർ ചർച്ചയിൽ സംബന്ധിച്ചു.അടുത്ത ദിവസം വീണ്ടും ചർച്ച നടത്തുമെന്ന്​ യുഎസ്​ നേതൃത്വം അറിയിച്ചു. രണ്ടാം ഘട്ട ചർച്ചകൾക്കിടയിലും ഗസ്സക്ക്​ നേരെ ഇസ്രായേൽ ആക്രമണം ഇന്നലെയും തുടർന്നു.

വെള്ളിയാഴ്ച കിഴക്കൻ ഗസ്സ സിറ്റിയിലെ തുഫ്​ഫയിൽ ഇസ്രായേൽ നടത്തിയ ഷെല്ലാക്രമണത്തിൽ ആറ് ഫലസ്തീൻകാർ കൊല്ലപ്പെട്ടിരുന്നു. വെടിനിർത്തൽ വേളയിലും ഗസ്സയിൽ പട്ടിണി പിടിമുറുക്കുന്നതായി ​ കഴിഞ്ഞ ദിവസം യുഎൻ ഏജൻസികൾ മുന്നറിയിപ്പ്​ നൽകിയിരുന്നു. ഗസ്സയിലെ ജനങ്ങൾക്ക്​ മതിയായ ഭക്ഷണവും അടിസ്ഥാന സൗകര്യങ്ങളും ലഭ്യമാക്കാൻ അടിയന്തര നടപടി വേണമെന്ന്​ യുഎൻ സെക്രട്ടറി ജനറൽ ആന്‍റണിയോ ഗുട്ടറസ്​ ഇസ്രായേലിനോട്​ ആവശ്യപ്പെട്ടു. മരുന്നും ഉപകരണങ്ങളും ഇല്ലാത്തതു മൂലം ഗസ്സയിലെ ആശുപത്രികൾ കടുത്ത പ്രതിസന്ധി നേരിടുന്നതായി ഡോക്​ടേഴ്​സ്​ വിത്തൗട്ട്​ ബോർഡേഴ്​സ്​ കൂട്ടായ്മയും അറിയിച്ചു.