ഗസ്സയിൽ ഭക്ഷണം കാത്തുനിന്ന 75 പേരെ കൊന്നൊടുക്കിയ സംഭവം; നടുക്കം രേഖപ്പെടുത്തി യുഎന്‍, സമഗ്ര അന്വേഷണം വേണമെന്നാവശ്യം

ദുബൈ സിറ്റി: ഗസ്സയിൽ ഭക്ഷ്യവിതരണ കേന്ദ്രത്തിൽ വരിനിന്ന 75 പേരെ കൊന്നൊടുക്കിയ സംഭവത്തിൽ സമഗ്ര അന്വേഷണം വേണമെന്ന്​ യുഎന്നും അന്തർദേശീയ സന്നദ്ധ സംഘടനകളും ആവശ്യപ്പെട്ടു.

കൊടും പട്ടിണിയിലായ ഫലസ്തീനികൾക്ക്​ ഭക്ഷ്യവിതരണത്തിനെന്ന പേരിൽ അമേരിക്കയുമായി ചേർന്ന്​ ഇസ്രായേൽ ആരംഭിച്ച ഗസ്സ ഹ്യുമാനിറ്റേറിയൻ ഫണ്ടേഷൻ കേന്ദ്രങ്ങളിൽ സൈന്യം കൊന്നുതള്ളിയത്​ 75 പേരെയാണ്. ഭക്ഷണത്തിന്​ വരിനിന്ന 400 ലധികം പേർക്ക്​ പരിക്കേറ്റതായും ഗസ്സ ആരോഗ്യ മന്ത്രാലയം അറിയിച്ചു.

അങ്ങേയറ്റം നടുക്കം സൃഷ്ടിക്കുന്ന കൂട്ടക്കുരുതി സംബന്​ധിച്ച്​ സമഗ്ര അന്വേഷണം വേണമെന്ന്​ യുഎൻ സെക്രട്ടറി ജനറൽ ആന്‍റണിയോ ഗുട്ടറസ്​ പറഞ്ഞു. യുഎൻ ഏജൻസികളും അന്താരാഷ്ട്ര സന്നദ്ധ സംഘടനകളും കുരുതിയെ അപലപിച്ചു. വടക്കൻ ഗസ്സയിൽ ദുരിതത്തിലായ ഫലസ്തീനികൾക്കുള്ള കുടിവെള്ള വിതരണം നിർത്തി വെക്കാൻ ഇസ്രായേൽ ആവശ്യപ്പെട്ടതായി യുഎൻ ഏജൻസികൾ വെളിപ്പെടുത്തി. ​

അമേരിക്കൻ പിന്തു​ണയോടെ ആക്രമണവും ഉപരോധവും കടുപ്പിച്ച്​ ഫലസ്തീൻ ജനതയെ ആസൂത്രിത വംശഹത്യ നടത്തുകയാണ്​ ഇസ്രായേലെന്ന്​ ഹമാസ്​ കുറ്റപ്പെടുത്തി. 21 ലക്ഷം ജനങ്ങൾ കൊടും പട്ടിണിയിലാണെന്നും അടിയന്തര ഇടപെടൽ ഉണ്ടായില്ലെങ്കിൽ ഗുരുതര പ്രത്യാഘാതം ഉണ്ടാകുമെന്നും ലോക ഭക്ഷ്യപദ്ധതി ഉദ്യോഗസ്ഥർ ചൂണ്ടിക്കാട്ടി.

അതിനിടെ, ഖാൻ യൂനുസ്​ ഉൾപ്പെടെ വിവിധ പ്രദേശങ്ങളിൽ ഇസ്രായേൽസേന ഇന്നലെ നടത്തിയ ആക്രമണങ്ങളിൽ 53 പേർ കൊല്ലപ്പെട്ടു.ജ​ബാ​ലി​യ അ​ഭ​യാ​ർ​ഥി ക്യാ​മ്പി​ൽ ന​ട​ത്തി​യ ആ​ക്ര​മ​ണ​ത്തി​ൽ അ​ഞ്ചു സ്ത്രീ​ക​ളും ഏ​ഴു കു​രു​ന്നു​ക​ളു​മ​ട​ക്കം 14 പേ​രാ​ണ് കൂ​ട്ട​ക്കൊ​ല​​ക്കി​ര​യാ​യ​ത്. ഗ​സ്സ​യി​ലെ അ​വ​ശേ​ഷി​ച്ച ഏ​ക ഡ​യാ​ലി​സി​സ് കേ​ന്ദ്ര​വും ഇ​സ്രാ​യേ​ൽ ബോം​ബി​ങ്ങി​ൽ ത​ക​ർ​ന്നു.

ജബാലിയയിൽ ഹമാസ്​ സൈനിക വിഭാഗമായ അൽഖസ്സാം ബ്രിഗേഡ്​ നടത്തിയ റോക്കറ്റ്​ ആക്രമണത്തിൽ 3 സൈനികർ കൊല്ലപ്പെടുകയും 11 പേർക്ക്​ പരിക്കേൽക്കുകയുംചെയ്തു. ഇസ്രായേലിനു നേർക്കുള്ള പുതിയ മിസൈൽ ആക്രമണം വിജയം കണ്ടതായി യെമനിലെ ഹൂതികൾ അവകാശപ്പെട്ടു.