'യുദ്ധത്തെ ഭയപ്പെടുന്നില്ല, ഡ്രൂസുകളെ ഞങ്ങൾ സംരക്ഷിച്ചോളാം': ഇസ്രായേലിന് മറുപടിയുമായി സിറിയ

ദമസ്കസ്: രാജ്യത്തെ വിഭജിക്കാന്‍ ഇസ്രായേൽ നടത്തുന്ന ശ്രമങ്ങളെ സിറിയ മറികടക്കുമെന്ന് ഇടക്കാല പ്രസിഡന്റ് അഹമ്മദ് അൽ-ഷറാ. തുടര്‍ച്ചയായുള്ള ഇസ്രായേല്‍ ആക്രമണങ്ങളെ തുടര്‍ന്ന് രാജ്യത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

''ഡ്രൂസ് പൗരന്മാരെയും അവരുടെ അവകാശങ്ങളെയും സംരക്ഷിക്കുക എന്നത് ഞങ്ങളുടെ കാര്യമാണ്. അവരെ ഒരു ബാഹ്യ കക്ഷിയുടെ കൈകളിലേക്ക് വലിച്ചിഴയ്ക്കാനുള്ള ഏതൊരു ശ്രമത്തെയും ഞങ്ങൾ എതിര്‍ക്കും''- അദ്ദേഹം പറഞ്ഞു.

''യുദ്ധത്തെ ഭയപ്പെടുന്നവരിലൊന്നും ഞങ്ങളില്ല, വെല്ലുവിളികളെ നേരിടാനും ജനങ്ങളെ പ്രതിരോധിക്കാനുമാണ് ഞങ്ങൾ ജീവിതം തന്നെ ചെലവഴിക്കുന്നത്. എത്ര ബഹളങ്ങളുണ്ടാക്കിയാലും സിറിയക്കാരുടെ താത്പര്യങ്ങള്‍ക്കാണ് ഞങ്ങള്‍ മുന്‍ഗണന കൊടുക്കുക''- അദ്ദേഹം പറഞ്ഞു. മതന്യൂനപക്ഷമായ ഡ്രൂസുകളുടെ നേതൃത്വത്തിലുള്ള സായുധസംഘങ്ങളും തദ്ദേശീയരായ വിഭാഗങ്ങളും തമ്മില്‍ നടക്കുന്ന ഏറ്റുമുട്ടലില്‍ ഇസ്രായേല്‍ ഇടപെട്ടതോടെയാണ് അഹമ്മദ് അൽ-ഷറായുടെ പ്രതികരണം.

സിറിയയിലെ തെക്കൻ പ്രവിശ്യയിൽ നടന്ന അക്രമ സംഭവങ്ങളില്‍ 350ലധികം പേരാണ് കൊല്ലപ്പെട്ടതെന്നാണ് റിപ്പോര്‍ട്ടുകള്‍. സാധാരണക്കാരും ഇതിലുള്‍പ്പെടും.

അതേസമയം ഇന്നലെ വൈ​കീ​ട്ടോ​ടെ ദമ​സ്ക​സി​ലെ സൈ​നി​ക ആ​സ്ഥാ​ന​ത്താണ്​ ഇസ്രായേൽ ബോം​ബി​ട്ടത്​. നാലു പേർ കൊല്ലപ്പെടുകയും നിരവധി പേർക്ക്​ പരിക്കേൽക്കുകയും ചെയ്തിരുന്നു. ഡ്രൂ​സു​ക​ൾ​ക്കു നേ​രെ സി​റി​യ​ൻ സൈ​ന്യം ന​ട​ത്തു​ന്ന അ​തി​ക്ര​മ​ങ്ങ​ൾ​ക്ക് മ​റു​പ​ടി​യാ​യാ​ണ് ആ​ക്ര​മ​ണ​മെ​ന്നാ​ണ് ഇ​സ്രാ​യേല്‍ വിശദീകരണം. അതേസമയം ഞങ്ങളെ കാര്യങ്ങള്‍ ഞങ്ങള്‍ നോക്കിക്കൊള്ളാമെന്നാണ് പ്രസിഡന്റ് പറയുന്നത്.

ഇതിനിടെ സിറിയയും ഇസ്രായേലും തമ്മിലെ സംഘർഷം തങ്ങൾ ഇടപെട്ട്​ പരിഹരിച്ചതായി യുഎസ്​ സ്​റ്റേറ്റ്​ വകുപ്പ്​ അറിയിച്ചു. എന്നാൽ ഡ്രൂസ്​ വിഭാഗത്തന്‍റെ സുരക്ഷക്കായി ആവശ്യമെങ്കില്‍ ഇനിയും ഇടപെടുമെന്നാണ്​ ഇസ്രയേൽ വ്യക്തമാക്കിയത്.