ഒമാനിൽ ഹജ്ജ് രജിസ്ട്രേഷൻ സെപ്റ്റംബർ 23ന് ആരംഭിക്കും
പൗരന്മാർക്കും താമസക്കാർക്കും ഒക്ടോബർ 8 വരെ ഓൺലൈനായി രജിസ്റ്റർ ചെയ്യാം
Update: 2025-09-07 11:50 GMT
മസ്കത്ത്: അടുത്ത വർഷത്തെ ഹജ്ജ് തീർത്ഥാടനത്തിനായുള്ള രജിസ്ട്രേഷൻ സെപ്റ്റംബർ 23ന് ആരംഭിക്കുമെന്ന് ഒമാൻ മതകാര്യ എൻഡോവ്മെന്റ് മന്ത്രാലയം അറിയിച്ചു. ഒമാനിലെ പൗരന്മാർക്കും താമസക്കാർക്കും www.hajj.om എന്ന ഔദ്യോഗിക പോർട്ടൽ വഴി ഒക്ടോബർ 8 വരെ ഓൺലൈനായി രജിസ്റ്റർ ചെയ്യാം.
സുതാര്യതയും നീതിയും ഉറപ്പാക്കുന്നതിനായി, ഇലക്ട്രോണിക് സംവിധാനത്തിലൂടെ മാത്രമേ അപേക്ഷകൾ സ്വീകരിക്കുകയുള്ളൂ. സിവിൽ നമ്പർ, ഐഡി കാർഡ്, അല്ലെങ്കിൽ ഇലക്ട്രോണിക് ഓതന്റിക്കേഷൻ സിസ്റ്റവുമായി (PKI) ബന്ധിപ്പിച്ച മൊബൈൽ ഫോൺ നമ്പർ എന്നിവ ഉപയോഗിച്ച് രജിസ്ട്രേഷൻ പൂർത്തിയാക്കാം. അവസാന തീയതിക്ക് ശേഷം സമർപ്പിക്കുന്ന അപേക്ഷകൾ പരിഗണിക്കില്ല.
രജിസ്ട്രേഷൻ അന്തിമ അനുമതിക്കുള്ള ഉറപ്പല്ലെന്ന് മന്ത്രാലയം വ്യക്തമാക്കി. സൗദി അധികൃതർ അനുവദിച്ച ക്വാട്ടയുടെ അടിസ്ഥാനത്തിൽ മുൻഗണനാക്രമം സ്വയം നിർണ്ണയിക്കപ്പെടും. തിരഞ്ഞെടുക്കപ്പെട്ട അപേക്ഷകരെ എസ്എംഎസ് വഴി വിവരമറിയിക്കും.
തെരഞ്ഞെടുപ്പ് നടപടികൾ മൂന്ന് ഘട്ടങ്ങളായി നടക്കും:
ആദ്യ ഘട്ടം: 2025 ഒക്ടോബർ 14 മുതൽ 30 വരെ
രണ്ടാം ഘട്ടം: 2025 നവംബർ 2 മുതൽ 6 വരെ
മൂന്നാം ഘട്ടം: 2025 നവംബർ 9 മുതൽ 11 വരെ
ഹജ്ജ് സീസണിലെ മുഴുവൻ സമയക്രമവും, വിമാന-റോഡ് മാർഗമുള്ള യാത്രക്കാർക്ക് സൗദി അറേബ്യയിലേക്കുള്ള അവസാന പ്രവേശന തീയതികൾ ഉൾപ്പെടെ, നാളെ മന്ത്രാലയം പുറത്തുവിടും.