ഹോർമുസ്​ കടലിടുക്കിൽ വീണ്ടും ആക്രമണമെന്ന്​ റിപ്പോർട്ട്​; ചരക്ക്​ കപ്പലിൽ സ്​ഫോടക വസ്​തു പതിച്ചു

മസ്കത്ത്​: ഹോർമുസ്​ കടലിടുക്കിൽ കപ്പലിന്​ നേരെ അജ്ഞാത വെടിക്കോപ്പ്​ ഉപയോഗിച്ച്​ ആക്രമണമുണ്ടായതായി ബ്രിട്ടീഷ്​ മാരിടൈം ഏജൻസി റിപ്പോർട്ട് ചെയ്തു​. കപ്പലിന്‍റെ നാശനഷ്ടങ്ങളോ നാവിക​രുടെ പരിക്കോ സംബന്ധിച്ച വിവരങ്ങൾ പുറത്തുവന്നിട്ടില്ല. ഒമാനിലെ ഖസബ്​ തീരത്തിന്​ സമീപം വെച്ചാണ്​ ആക്രമണമുണ്ടായത്​. ഖസബിന്​ 20 നോട്ടിക്കൽ മൈൽ അകലെ വെച്ചാണ്​ ആക്രമണം നടന്നതെന്ന്​ യുനൈറ്റഡ്​ കിങ്​ഡം മാരിടൈം ട്രേഡ്​ ഓപറേഷൻസ്​ (യു.കെ.എം.ടി.ഒ) റിപ്പോർട്ടിൽ വ്യക്​തമാക്കി. കഴിഞ്ഞ ദിവസങ്ങളിലും ഹോർമുസിലും ഒമാൻ തീരത്തിന്​ സമീപം കപ്പലുകൾക്ക്​ നേരെ ആക്രമണമുണ്ടായതായി ബ്രിട്ടീഷ്​ മാരിടൈം ഏജൻസി റിപ്പോർട്ട്​ ചെയ്തിരുന്നു.

അതേസമയം, ഇറാന്‍റെ ഉപരോധം മറികടന്ന്​ കപ്പലുകൾ കടത്തിവിടുമെന്ന്​ അമേരിക്ക പ്രഖ്യാപിച്ചിരുന്നുവെങ്കിലും ഹോർമുസിലൂടെ കാര്യമായി കപ്പലുകൾ നീങ്ങുന്നില്ലെന്നാണ്​ ഷിപ്പിങ്​ ​ഡേറ്റകൾ വ്യക്​തമാക്കുന്നത്​. ശനിയാഴ്ച 11ഉം ഞായറാഴ്ച എട്ടും കപ്പലുകൾ മാ​ത്രമാണ്​ ഹോർമുസിലൂടെ നീങ്ങിയത്​. ഫെബ്രുവരി 28ന്​ യുദ്ധം ആരംഭിക്കുന്നതിന്​ മുമ്പ്​ പ്രതിദിനം 120-130 കപ്പലുകൾ നീങ്ങിയിരുന്ന സ്ഥാനത്താണിത്​. ഹോർമുസിലെ തടസ്സം നീക്കാൻ ഇറാനും ഒമാനും തമ്മിൽ പത്ത്​ ദിവസത്തിലധികമായി ചർച്ച നടക്കുന്നുണ്ടെങ്കിലും അന്തിമ തീരുമാനത്തിൽ എത്തിയിട്ടില്ല.

ലോകത്തിന്‍റെ എണ്ണ കയറ്റുമതിയുടെ 20 ശതമാനവും നടക്കുന്നത്​ ഹോർമുസിലൂടെയാണ്​. ഇറാനെതിരെ പ്രഖ്യാപിച്ച നാവിക ഉപരോധത്തിന്‍റെ ഭാഗമായി 35 കപ്പലുകൾ തിരിച്ചുവിട്ടതായി യു.എസ്​ സെൻട്രൽ കമ്മാൻഡും അവകാശപ്പെട്ടിട്ടുണ്ട്​. യമനിലെ ഹൂതികൾ സൗദി അ​റേബ്യക്കെതിരെ ഉപരോധം പ്രഖ്യാപിച്ച ബാബ്​ അൽ മന്ദബ്​ കടലിടുക്കിലൂടെ 20 കപ്പലുകൾ സഞ്ചരിച്ചതായാണ്​ മാരിടൈം ഏജൻസികളുടെ റിപ്പോർട്ട്​. 12 എണ്ണ ടാങ്കറുകളും എട്ട്​ വലിയ ചരക്ക്​ കപ്പലുകളുമാണ്​ കടലിടുക്കിലൂടെ സഞ്ചരിച്ചത്​. 12 കപ്പലുകൾ ബാബ്​ അൽ മന്ദബ്​ മറികടന്ന​പ്പോൾ എട്ടെണ്ണം ബാബ്​ അൽ മന്ദബിലേക്ക്​ പ്രവേശിച്ചു.