മണൽക്കൂനയിൽ തീപാറും...; ലിവ ഇന്റർനാഷണൽ ഫെസ്റ്റിവൽ ഡിസംബർ 12 മുതൽ
2026 ജനുവരി മൂന്നുവരെ അബൂദബി ലിവ മരുഭൂമിയിലാണ് പരിപാടി
Update: 2025-11-12 12:13 GMT
അബൂദബി: അബൂദബിയിലെ അൽ ദഫ്ര മേഖലയിലെ ലിവ ഇന്റർനാഷണൽ ഫെസ്റ്റിവൽ ഡിസംബർ 12 മുതൽ 2026 ജനുവരി 3 വരെ. ലിവ മരുഭൂമിയിലാണ് ഫെസ്റ്റിവൽ നടക്കുക. യുഎഇയിലെ ഏറ്റവും ഉയർന്ന മണൽക്കൂനയായ തൽ മുറഇബിലാണ് പരിപാടി നടക്കുന്നത്. പൊതുവായുള്ള പ്രവേശനം സൗജന്യമാണ്. ചില മത്സരങ്ങൾ, വിഐപി ഏരിയകൾ, പ്രത്യേക പരിപാടികൾ എന്നിവയ്ക്ക് പ്രത്യേക ഫീസ് ഉണ്ടായേക്കും.
ഈ വർഷത്തെ പതിപ്പിൽ എയറോബാറ്റിക് എയർ ഷോകൾ, വെടിക്കെട്ട്, ഡ്രോൺ ഷോകൾ, ഡ്യൂൺ പ്രൊജക്ഷൻ ഡിസ്പ്ലേകൾ, ഹോട്ട് എയർ ബലൂൺ, ഭീമൻ ഫെറിസ് വീൽ, റേസിംഗ്, ഡ്യൂൺ സ്പോർട്സ് തുടങ്ങിയവയുണ്ടാകും.
ഉദ്ഘാടന ചടങ്ങിൽ യുഎഇ വ്യോമസേനയുടെ എയറോബാറ്റിക് ടീമായ ഫോർസാൻ അൽ ഇമാറാത്തിന്റെ പ്രകടനവും തുടർന്ന് വെടിക്കെട്ടുമുണ്ടാകും.
സന്ദർശകർക്ക് ഗ്ലാമ്പിംഗ് ടെന്റുകളിലോ പ്രാദേശിക താമസസ്ഥലങ്ങളിലോ താമസിക്കാം, അല്ലെങ്കിൽ മരുഭൂമിയിൽ ക്യാമ്പ് ചെയ്യാൻ സ്വന്തം ടെന്റുകളോ ആർവികളോ കൊണ്ടുവരാം.
2025 ഡിസംബർ 31 ന് പുതുവത്സരാഘോഷം നടക്കും. തൽ മുറഇബ് കാർ ചാമ്പ്യൻഷിപ്പ് അന്ന് വൈകുന്നേരം ആരംഭിക്കും, തുടർന്ന് 2026 നെ സ്വാഗതം ചെയ്യുന്നതിനായി കച്ചേരിയും വെടിക്കെട്ടും നടക്കും.
അബൂദബിയിൽ നിന്ന് റോഡ് മാർഗം വരുമ്പോൾ ഏകദേശം മൂന്ന് മണിക്കൂർ അകലെയാണ് ലിവ. ഡ്രൈവർമാർക്ക് ശൈഖ് സായിദ് റോഡ് (E10) വഴി സ്വീഹാൻ/അൽ ഐൻ ഭാഗത്തേക്ക് വന്നാൽ ലിവയിലെത്താം.