മുംബൈ: വിനോദസഞ്ചാരികളെ ആകർഷിക്കാനും ആഭ്യന്തര ടൂറിസം വികസിപ്പിക്കാനും വിപുലമായ പദ്ധതികളാണ് രാജ്യം നടപ്പിലാക്കുന്നത്. എന്നാൽ അതിന് പല വെല്ലുവിളികളും സംഭവിക്കാറുണ്ട്. മുംബൈയിൽ എത്തിയ ഒരു വിദേശ വനിത തനിക്ക് നേരിടേണ്ടി വന്ന പീഡനാനുഭവം സോഷ്യൽ മീഡിയയിൽ പങ്കുവെച്ചതിനെത്തുടർന്ന് അത് വലിയ ചർച്ചയ്ക്ക് തുടക്കമിട്ടു.
ഇന്ത്യയിൽ പര്യടനം നടത്തുന്ന പോർച്ചുഗലിൽ നിന്നുള്ള ട്രാവൽ വ്ലോഗറായ ഇനെസ് ഫാരിയ, ഇൻസ്റ്റാഗ്രാമിൽ പോസ്റ്റ് ചെയ്ത ഒരു വീഡിയോയിൽ താൻ നേരിട്ട ദുരനുഭവം വിവരിക്കുന്നു , രണ്ട് മാസത്തെ ഇന്ത്യൻ യാത്രയ്ക്കിടെ ഇത്തരമൊരു പെരുമാറ്റം നേരിടുന്നത് ആദ്യമായാണെന്ന് അവർ വിവരിക്കുന്നു.
വീഡിയോയിൽ, മുംബൈയിലെ തിരക്കേറിയ ഒരു പൊതുസ്ഥലത്തിലൂടെ ഫാരിയ നടക്കുന്നത് കാണാം, രണ്ട് പുരുഷന്മാർ അവരെ പിന്തുടരുന്നു. അവരുടെ അസ്വസ്ഥതയും ഭയവും അതിൽ കാണാം.
"ഇന്ത്യയിൽ ഇത്തരമൊരു അനുഭവം എനിക്ക് ആദ്യമായാണ്, ഞാൻ ഇവിടെ വന്നിട്ട് ഇപ്പോൾ 2 മാസമായി. എന്റെ അനുഭവങ്ങളിൽ ഭൂരിഭാഗവും മനോഹരവും സ്വാഗതാർഹവുമായിരുന്നു," അവർ എഴുതി.
"ഞാൻ പലതവണ വേണ്ട എന്ന് പറഞ്ഞിട്ടും അവർ ഞങ്ങളെ പിന്തുടരുകയായിരുന്നു, ഫോട്ടോകൾ ചോദിച്ചുകൊണ്ടിരുന്നു. 15 മിനിറ്റിലധികം അവർ ഞങ്ങളെ പിന്തുടർന്നു, അത് ശരിക്കും അസ്വസ്ഥമായി തോന്നി."
"ഇല്ല" എന്നത് ഒരു അവസാന വാക്യമാണെന്ന് ഓർമ്മിപ്പിക്കാൻ വേണ്ടി മാത്രമാണിത്. നിങ്ങളുടെ സുരക്ഷയ്ക്കും സുഖത്തിനും എപ്പോഴും പ്രഥമ പരിഗണന നൽകുക," എന്നും ഫാരിയ പറഞ്ഞു.
പോസ്റ്റിനെ തുടർന്ന് മുംബൈ പൊലീസ് ഔദ്യോഗിക പരാതി രജിസ്റ്റർ ചെയ്തു. ബിഎൻഎസ് ആക്ടിലെ സെക്ഷൻ 78(1), 3(5) എന്നിവ പ്രകാരം രണ്ട് അജ്ഞാത വ്യക്തികൾക്കെതിരെ അഗ്രിപാഡ പോലീസ് സ്റ്റേഷനിൽ എഫ്ഐആർ ഫയൽ ചെയ്തിട്ടുണ്ട്.