തിരുവനന്തപുരം: സംസ്ഥാനത്ത് മഴ കനക്കുന്നു. അറബിക്കടലിലും ബംഗാൾ ഉൾക്കടലിലും ശക്തി പ്രാപിക്കുന്ന കാറ്റും ആന്ധ്രാതീരത്തെ അന്തരീക്ഷ ചുഴിയുമാണ് മഴ കനക്കാനുള്ള കാരണം. കൊല്ലം മുതൽ ഇടുക്കി വരെയുള്ള ജില്ലകളിൽ ഇന്ന് ഓറഞ്ച് അലർട്ടാണ്. തെക്കൻ ജില്ലകളിലാകും മഴയുടെ ശക്തി കൂടുതലാണ്.
തിരുവനന്തപുരം നഗരത്തിലും മലയോരമേഖലയിലും ഇന്നലെ രാത്രി മുതൽ മഴ നിർത്താതെ പെയ്തു. ബോണക്കാട് നിന്ന് ജനങ്ങളെ മാറ്റി പാർപ്പിക്കുന്നതിനായി സബ് കലക്ടറുടെ നേതൃത്വത്തിൽ രണ്ട് കെ.എസ്.ആർ.ടി.സി ബസ് പുറപ്പെട്ടു. പൊൻമുടിയിലെ സാഹചര്യം വിലയിരുത്തുന്നതിനും ഒരു സംഘം തിരിച്ചിട്ടുണ്ട്.
പൊൻമുടി, കല്ലാർ, മങ്കയം ടൂറിസം കേന്ദ്രങ്ങളിലേയ്ക്കുള്ള പ്രവേശനം നിരോധിച്ചു. ജില്ലയിൽ ക്വാറി പ്രവർത്തനത്തിനും നിരോധനമുണ്ട്. എല്ലാ ജില്ലകളിലും കൺട്രോൾ റൂമുകൾ സജ്ജമാക്കാൻ ഇന്നലെ ചേർന്ന ഉന്നതതലയോഗം തീരുമാനിച്ചിരുന്നു. ഇത്പ്രകാരം ജില്ലാ താലൂക്ക് അടിസ്ഥാനത്തിൽ മുഴുവൻ സമയവും കൺട്രോൾ റൂമുകൾ പ്രവർത്തിക്കും. തദ്ദേശവകുപ്പിന്റെ നേതൃത്വത്തിലും കൺട്രോൾ റൂമുകൾ ഉണ്ടാകും. അടിയന്തിര സാഹചര്യം നേരിടാൻ തയ്യാറായിരിക്കണമെന്ന് പൊലീസിനും പ്രത്യേക നിർദേശമുണ്ട്. എല്ലായിടങ്ങളിലും സുരക്ഷാ ഉപകരണങ്ങൾ സജ്ജമാക്കണം.
ഉരുൾപൊട്ടലിനും വെള്ളപ്പൊക്കത്തിനും സാധ്യതയുള്ള പ്രദേശങ്ങളിൽ ആളുകൾ അതീവ ജാഗ്രത പാലിക്കണം. കടൽ പ്രക്ഷുബ്ദമാകാൻ സാധ്യതയുള്ളതിനാൽ മത്സ്യബന്ധനത്തിന് വിലക്കേർപ്പെടുത്തി. ശബരിമല ദർശനത്തിന് എത്തുന്നവർ ജാഗ്രത പാലിക്കണം.