തദ്ദേശസ്വയംഭരണ തെരഞ്ഞെടുപ്പ്; മൂന്ന് ടേം വ്യവസ്ഥയിൽ ഇളവുമായി മുസ്‌ലിം ലീഗ്‌

കോഴിക്കോട്: തദ്ദേശ സ്വയംഭരണ തെരഞ്ഞെടുപ്പിൽ മൂന്ന് ടേം വ്യവസ്ഥയിൽ ഇളവുമായി മുസ്‌ലിം ലീഗ്‌ . വിജയത്തിന് അനിവാര്യമെങ്കിൽ മൂന്നു ടേം വ്യവസ്ഥയുടെ പേരിൽ സീറ്റ് നിഷേധിക്കരുതെന്നും ബന്ധപ്പെട്ട കമ്മിറ്റികളുടെ ഐകകണ്‌ഠ്യേനയുള്ള ശിപാർശയുടെ അടിസ്ഥാനത്തിൽ സീറ്റ് നൽകണം എന്നുമാണ് സംസ്ഥാന ജനറൽ സെക്രട്ടറി ജില്ല അധ്യക്ഷൻമാർക്കും ജനറൽ സെക്രട്ടറിമാർക്കും അയച്ച കത്തിൽ പറയുന്നത്. എന്നാൽ, മൂന്നു തവണ ജനപ്രതിനിധികളായവർക്ക് ഇളവുണ്ടാവില്ല. തെരഞ്ഞെടുപ്പിനായുള്ള പാർലമെന്ററി ബോർഡുകളിലേക്ക് വനിത പ്രാതിനിധ്യം ഉറപ്പാക്കണമെന്നും ലീഗ് സംസ്ഥാനകമ്മിറ്റി നിർദേശം നൽകിയിട്ടുണ്ട്.

മൂന്നു ടേം നിബന്ധന കർശനമായി നടപ്പാക്കിയ കഴിഞ്ഞ തവണ പലിയിടങ്ങളിലും മുതിർന്ന നേതാക്കൾ പലരും സ്വതന്ത്രരായി മത്സരിക്കുന്ന സാഹചര്യമുണ്ടായി. ഇത്തവണ അത് ഒഴിവാക്കാനാണ് സംസ്ഥാന നേതൃത്വം ഇത്തരത്തിലൊരു തീരുമാനമെടുത്തിരിക്കുന്നത്. മൂന്ന് ടേം നിബന്ധന ഇത്തവണയും കർശനമായി നടപ്പാക്കും എന്ന വിവരമാണ് ആദ്യം പുറത്തുവന്നിരുന്നത്.