കൊച്ചി: പി.ഡി.പി ചെയർമാൻ അബ്ദുന്നാസർ മഅ്ദനിയുടെ ആരോഗ്യനിലയിൽ നേരിയ പുരോഗതി. കടുത്ത ശ്വാസതടസം നേരിട്ടതിനെ തുടർന്ന് കഴിഞ്ഞ അഞ്ച് ദിവസമായി മെഡിക്കൽ ട്രസ്റ്റ് ആശുപത്രിയിൽ കഴിയുന്ന മഅ്ദനിയെ വെന്റിലേറ്ററിൽനിന്ന് മാറ്റി. അദ്ദേഹം ഇപ്പോഴും തീവ്രപരിചരണ വിഭാഗത്തിൽതന്നെ ചികിത്സയിൽ തുടരുകയാണ്.
ശ്വസന സംബന്ധമായ പരിശോധനകൾക്ക് ശേഷം വെന്റിലേറ്റർ സഹായം ഒഴിവാക്കിയെങ്കിലും കൃത്രിമ ശ്വാസം നൽകുന്ന ഉപകരണം വഴിയാണ് ശ്വസിക്കുന്നത്. ഹൃദയ സംബന്ധമായ പരിശോധനകളുടെ ഭാഗമായി മഅദനിയെ ഇന്നലെ ആൻജിയോഗ്രാമിന് വിധേയമാക്കിയിരുന്നു. ഹൃദയസംബന്ധമായ പ്രശ്നങ്ങളില്ലെന്ന് ആൻജിയോഗ്രാം ടെസ്റ്റിന് ശേഷം ഡോക്ടർമാർ അറിയിച്ചു. ക്രമാതീതമായി ഉയർന്നിരുന്ന രക്തസമ്മർദ്ദം ഇപ്പോഴും നിയന്ത്രണത്തിലായിട്ടില്ല. നെഫ്രോളജിസ്റ്റ് ഡോക്ടർ മുഹമ്മദ് ഇഖ്ബാലിന്റെ നേതൃത്വത്തിലുള്ള വിദഗ്ധ മെഡിക്കൽ സംഘത്തിന്റെ പരിശോധനകളും ചികിത്സയും തുടരുകയാണ്.