കൊച്ചി: ആക്രമിക്കപ്പെട്ട നടി സമർപ്പിച്ച ഹരജി ബുധനാഴ്ച പരിഗണിക്കാൻ മാറ്റി. സർക്കാർ വിശദീകരണം നൽകാൻ സാവകാശം തേടിയതിനെ തുടർന്നാണ് ഹരജി മാറ്റിയത്. കേസിൽ തുടരന്വേഷണം പാതിവഴിയിൽ അവസാനിപ്പിക്കാനും അന്തിമ റിപ്പോർട്ട് സമർപ്പിക്കാനും രാഷ്ട്രീയ ഉന്നതർ അന്വേഷണസംഘത്തെ ഭീഷണിപ്പെടുത്തുന്നതായി ആരോപിച്ചാണ് ആക്രമണത്തിനിരയായ നടി ഹരജി നൽകിയത്.
ആരോപണങ്ങൾ തെറ്റാണെന്ന നിലപാടാണ് ഹരജിയിൽ കഴിഞ്ഞ ദിവസം സർക്കാർ സ്വീകരിച്ചത്. കേസ് രാഷ്ട്രീയമായി ഉപയോഗിക്കരുതെന്നും നടിയുടെ ഭീതി അനാവശ്യമാണെന്നും ഡയരക്ടർ ജനറൽ ഓഫ് പ്രോസിക്യൂഷൻ കോടതിയെ അറിയിച്ചിരുന്നു.
അതേസമയം കേസിൽ അന്വേഷണത്തിന് കൂടുതൽ സമയം വേണമെന്ന് ആവശ്യപ്പെട്ട് സർക്കാർ ഇന്ന് ഹരജി നൽകും. തെളിവുകൾ പൂർണമായും ശേഖരിച്ചിട്ടില്ലെന്നാണ് ഹരജിയിൽ പറയുന്നത്. കുറ്റപത്രം നൽകാൻ കൂടുതൽ സമയം ആവശ്യമുണ്ട്. 31ന് അന്വേഷണം പൂർത്തിയാക്കണമെന്ന ഉത്തരവിൽ ഇളവ് വേണമെന്നും ഹരജിയിൽ ആവശ്യപ്പെടുന്നു.