മുൻ ലോകസുന്ദരി മത്സരാർഥി ഷെരിക ഡി അർമാസ് 26ാം വയസിൽ അന്തരിച്ചു

മോണ്ടേവിഡിയോ: 2015ൽ ഉറുഗ്വായെ പ്രതിനിധീകരിച്ച ലോകസുന്ദരി മത്സരാർഥി ഷെരിക ഡി അർമാസ് അന്തരിച്ചു. സെർവികൽ കാൻസറിനെ തുടർന്ന് 26ാം വയസിലാണ് അന്ത്യം. രണ്ട് വർഷമായി ഷെരിക ചികിത്സയിലായിരുന്നു. ഷെരികയുടെ സഹോദരനാണ് മരണവിവരം സമൂഹമാധ്യമങ്ങളിലൂടെ അറിയിച്ചത്.

2015ൽ ചൈനയിൽ നടന്ന ലോകസുന്ദരി ചാമ്പ്യൻഷിപ്പിൽ അവസാന 30 പേരിൽ ഷെരിക ഇടംനേടിയിരുന്നു. അർബുദം ബാധിച്ച കുട്ടികളുടെ ക്ഷേമത്തിനായി പ്രവർത്തിക്കുന്ന സംഘടനയുടെ ഭാഗമായും ഷെരിക പ്രവർത്തിച്ചിരുന്നു. 

ഷെരികയുടെ മരണത്തിൽ നിലവിലെ മിസ് ഉറുഗ്വേ കാർല റൊമേറോ അനുശോചിച്ചു. തന്‍റെ ജീവിതത്തിൽ കണ്ടുമുട്ടിയ ഏറ്റവും സുന്ദരിയായ സ്ത്രീയാണ് ഷെരികയെന്നാണ് അവർ വിശേഷിപ്പിച്ചത്.