അലി ഖാംനഈയുടെ മരണം; സ്ലീപ്പർ സെല്ലുകൾക്ക് സജീവമാക്കാൻ നിർദേശം നൽകി ഇറാൻ

തെഹ്‌റാൻ: ഇറാൻ പരമോന്നത നേതാവ് ആയത്തുല്ല അലി ഖാംനഈയുടെ മരണത്തിന് പിന്നാലെ വിദേശ രാജ്യങ്ങളിലുള്ള സ്ലീപ്പർ സെല്ലുകളെ (രഹസ്യ സംഘങ്ങൾ) സജീവമാക്കാൻ ഇറാൻ നിർദേശം നൽകിയതായി റിപ്പോർട്ടുകൾ. യുഎസ് രഹസ്യാന്വേഷണ വിഭാഗത്തെ ഉദ്ധരിച്ച് അന്താരാഷ്ട്ര മാധ്യമങ്ങളാണ് വിവരം പുറത്തുവിട്ടത്. ഖാംനഈയുടെ മരണശേഷം ഉടലെടുത്ത അനിശ്ചിതാവസ്ഥയ്ക്കിടെ, മുൻകൂട്ടി നിശ്ചയിച്ച 'ഓപ്പറേഷണൽ ട്രിഗർ' സന്ദേശം ഇറാൻ കൈമാറിയതായാണ് സൂചന.

ഇറാന്റെ സൈനിക വിഭാഗമായ ഇസ്‌ലാമിക് റെവല്യൂഷണറി ഗാർഡ് കോർപ്‌സ് (IRGC), പ്രത്യേകിച്ച് അതിലെ ഖുദ്‌സ് ഫോഴ്‌സ് (Quds Force) എന്നിവയുടെ കീഴിലാണ് ഈ ഗ്രൂപ്പുകൾ പ്രവർത്തിക്കുന്നത്. ഇസ്രായേൽ, അമേരിക്ക തുടങ്ങിയ ശത്രുരാജ്യങ്ങളിലെ തന്ത്രപ്രധാന കേന്ദ്രങ്ങൾ, നയതന്ത്ര ഉദ്യോഗസ്ഥർ, അല്ലെങ്കിൽ ഇറാന്റെ രാഷ്ട്രീയ എതിരാളികൾ എന്നിവരെ നിരീക്ഷിക്കുകയോ ആക്രമിക്കുകയോ ആണ് ഇവരുടെ പ്രധാന ദൗത്യം. ഇറാൻ നേരിട്ട് ഇടപെടുന്നതിന് പകരം ഹിസ്ബുല്ലയെ പോലുള്ള ഗ്രൂപ്പുകളെ ഉപയോഗിച്ചാണ് ഇത്തരം സെല്ലുകൾ പ്രവർത്തിപ്പിക്കുന്നത്.

ഇറാനിലെ ഉന്നത സൈനിക, രഹസ്യാന്വേഷണ വിഭാഗങ്ങളിൽ നിന്നാണ് ഈ നിർദേശം പുറത്തുവന്നതെന്നാണ് സൂചന. സാധാരണയായി ഇത്തരം സന്ദേശങ്ങൾ ലഭിച്ചാൽ, സ്ലീപ്പർ സെല്ലുകൾ തങ്ങളുടെ ലക്ഷ്യസ്ഥാനങ്ങൾ നിരീക്ഷിക്കാനും ആക്രമണങ്ങൾ ആസൂത്രണം ചെയ്യാനും തുടങ്ങാറുണ്ട്. നിലവിലെ ആഗോള സാഹചര്യത്തിൽ, പ്രത്യേകിച്ച് പശ്ചിമേഷ്യയിലെ സംഘർഷങ്ങൾ നിലനിൽക്കുന്ന പശ്ചാത്തലത്തിൽ, ഈ നീക്കം പാശ്ചാത്യ രാജ്യങ്ങളെയും അവരുടെ സഖ്യകക്ഷികളെയും അതീവ ജാഗ്രതയിലാക്കിയിരിക്കുകയാണ്.

യൂറോപ്പ്, അമേരിക്ക തുടങ്ങിയ മേഖലകളിൽ ഇറാന്റെ സ്വാധീനമുള്ള സായുധ സംഘങ്ങൾ പ്രവർത്തിക്കുന്നുണ്ടെന്ന് ഇന്റലിജൻസ് ഏജൻസികൾ നേരത്തെ തന്നെ മുന്നറിയിപ്പ് നൽകിയിരുന്നു. പുതിയ നിർദേശം പുറത്തുവന്നതോടെ ഈ രാജ്യങ്ങളിലെ സുരക്ഷാ ഏജൻസികൾ നിരീക്ഷണം ശക്തമാക്കിയിട്ടുണ്ട്. പ്രധാന നയതന്ത്ര കാര്യാലയങ്ങൾ, സൈനിക താവളങ്ങൾ, ജനത്തിരക്കുള്ള പൊതുസ്ഥലങ്ങൾ എന്നിവിടങ്ങളിൽ കനത്ത സുരക്ഷയാണ് ഏർപ്പെടുത്തിയിരിക്കുന്നത്.

ഇറാൻ എന്തിനാണ് ഇപ്പോൾ ഇത്തരമൊരു നിർദേശം നൽകിയത് എന്ന കാര്യത്തിൽ വ്യക്തതയില്ലെങ്കിലും, തങ്ങൾക്കെതിരെ ഉണ്ടാകാൻ സാധ്യതയുള്ള നീക്കങ്ങളെ പ്രതിരോധിക്കാനോ പ്രത്യാക്രമണം നടത്താനോ ഉള്ള തന്ത്രത്തിന്റെ ഭാഗമാണിതെന്ന് നിരീക്ഷകർ കരുതുന്നു. ആഗോള രാഷ്ട്രീയത്തിൽ വരും ദിവസങ്ങളിൽ ഈ നീക്കം വലിയ സ്വാധീനം ചെലുത്താൻ സാധ്യതയുണ്ട്. ഇതിനോടകം തന്നെ പല രാജ്യങ്ങളും തങ്ങളുടെ പൗരന്മാർക്ക് ജാഗ്രതാ നിർദേശം നൽകിയിട്ടുണ്ട്.