രണ്ടാംഘട്ട വെടിനിർത്തൽ ചർച്ചകൾക്കിടയിലും ഗസ്സയിൽ ആക്രമണം തുടർന്ന് ഇസ്രായേൽ; ഒരു ഫലസ്തീനി കൂടി കൊല്ലപ്പെട്ടു

ഗസ്സ സിറ്റി: രണ്ടാംഘട്ട വെടിനിർത്തൽ ചർച്ചാനീക്കത്തിനിടയിലും ഗസ്സയിൽ ആക്രമണം തുടർന്ന്​ ഇസ്രായേൽ. വടക്കൻ ഗസ്സക്ക്​ നേരെ നടന്ന ആക്രമണത്തിൽ ഒരു ഫലസ്തീനി കൊല്ലപ്പെട്ടു. ലോകം തയ്യാറായില്ലെങ്കിൽ ഹമാസിന്‍റ നിരായുധീകരണം ഇസ്രയേൽ നേരിട്ട്​ നടപ്പാക്കുമെന്ന്​ ഊർജമന്ത്രി ഏലി കോഹൻ. ലക്ഷത്തിലേറെ കുട്ടികൾ ഇപ്പോഴും പോഷകാഹാരക്കുറവിന്‍റെ പിടിയിലെന്ന്​ ലോകാരോഗ്യ സംഘടന. ഇറാനെ ആക്രമിക്കാൻ വീണ്ടും ഇ​സ്രയേൽ ഒരുങ്ങുന്നതായും റിപ്പോർട്ടുകളുണ്ട്.

രണ്ടാം ഘട്ടവെടിനിർത്തലിനായി പല തലങ്ങളിൽ ചർച്ച പുരോഗമിക്കുമ്പോഴും ഗസ്സയിൽ ആക്രമണം തുടരുകയാണ് ഇസ്രായേൽ. വടക്കൻ ഗസ്സയിൽ നടത്തിയ ആക്രമണത്തിൽ ഒരു ഫലസ്തീനി കൂടി ഇന്നലെ കൊല്ലപ്പെട്ടു. ഖാൻ യൂനുസിന്​ നേരെയും രാത്രി ഇസ്രായേൽ വ്യോമാക്രമണം നടത്തി. അതിശൈത്യം തുടരുന്ന ഗസ്സയിൽ ഇസ്രയേലിന്‍റെ സഹായവിലക്ക്​ ജനജീവിതം കൂടുതൽ ദുസ്സഹമാക്കിയെന്ന്​ യു.എൻ ഏജൻസികൾ ചൂണ്ടിക്കാട്ടി. താൽക്കാലിക താമസ സംവിധാനങ്ങൾ, പുതപ്പ്​, ഇന്ധനം എന്നിവ അടിയന്തരമായി എത്തിക്കണമെന്ന അഭ്യർഥന ഇസ്രായേൽ തള്ളുകയാണ്​.വെടിനിർത്തൽ തുടരുന്നതിനിടയിലും ഗസ്സയിൽ പട്ടിണിയും പോഷകാഹാര കുറവും വലിയ വെല്ലുവിളിയാണെന്ന്​ ലോകാരോഗ്യ സംഘടനാ മേധാവി ടെഡ്രോസ്​ അദാനം ഗബ്രിയസസ്​ പറഞ്ഞു. ഒരു ലക്ഷം കുഞുങ്ങൾ കടുത്ത പോഷകാഹാരക്കുറവ് നേരിടുന്നതായും അദ്ദേഹം ചൂണ്ടിക്കാട്ടി.

രണ്ടാം ഘട്ട വെടിനിർത്തലിനായുള്ള മുന്നൊരുക്ക ചർച്ചകൾ മധ്യസ്ഥ രാജ്യങ്ങളും ​അമേരിക്കയും തമ്മിൽ തുടരുകയാണ്​. ഹമാസിന്‍റെ നിരായുധീകരണം സമയബന്ധിതമായിരിക്കണമെന്നും അത്​ നടപ്പായില്ലെങ്കിൽ ഇസ്രായേലിന്​ ആക്രമണം പുനരാരംഭിക്കാമെന്നും തെൽ അവീവിൽ സന്ദർശനം നടത്തുന്ന യുഎസ്​ സെനറ്റർ ലിൻഡ്​സി ഗ്രഹാം പറഞു. ഹമാസിന്‍റെ നിരായുധീകരണം ആവശ്യമെങ്കിൽ ഇസ്രാ​യേൽ തന്നെ നേരിട്ട്​ നടപ്പാക്കുമെന്ന്​ ഊർജ മന്ത്രി ഏലി കൊഹൻ പ്രതികരിച്ചു. അതിനിടെ,ഇറാനെ ആക്രമിക്കാൻ വീണ്ടും ഇസ്രായേൽ ഒരുങ്ങുന്നതായി റിപ്പോർട്ട്. ഡോണൾഡ് ട്രംപുമായി നടത്തുന്ന കൂടിക്കാഴ്ചയിൽ ഇതു സംബന്ധിച്ച വിവരങ്ങൾ നെതന്യാഹു പങ്കുവെക്കുമെന്ന്​ ഉദ്യോഗസ്​ഥരെ ഉദ്ധരിച്ച്​ എൻബിസി ന്യൂസ്​ റിപ്പോർട്ട്​ചെയ്തു. ഇറാൻ വീണ്ടും ബാലിസ്റ്റിക് മിസൈൽ വികസിപ്പിക്കുമെന്ന ആശങ്ക മുൻനിർത്തിയാണ്​ ഇസ്രായേൽ നീക്കമെന്നും റിപ്പോർട്ടിലുണ്ട്.