കഴിഞ്ഞ 9 മാസത്തിനിടെ ഒഡിഷയിൽ കാണാതായത് 20,060 പേരെ; കണക്കുകൾ നിരത്തി മുഖ്യമന്ത്രി മോഹൻ ചരൺ മാജി

ഭുവനേശ്വര്‍: 2024 ജൂണിനും 2025 ഫെബ്രുവരിക്കും ഇടയിൽ ഒഡിഷയിലുടനീളം 20,060 പേരെ കാണാതായതായി മുഖ്യമന്ത്രി മോഹൻ ചരൺ മാജി തിങ്കളാഴ്ച നിയമസഭയെ അറിയിച്ചു.കോൺഗ്രസ് എംഎൽഎ സോഫിയ ഫിർദൗസിന്‍റെ ചോദ്യത്തിന് രേഖാമൂലം നൽകിയ മറുപടിയിൽ, ആകെ കേസുകളിൽ 7,048 പേരെ കണ്ടെത്തിയതായും 13,012 പേരെ ഇനിയും കണ്ടെത്താനായിട്ടില്ലെന്നും മാജി വ്യക്തമാക്കി. 2024 ജൂൺ 12നാണ് ബിജെപി സര്‍ക്കാര്‍ ഒഡിഷയിൽ അധികാരത്തിലെത്തുന്നത്.

കെട്ടിക്കിടക്കുന്ന കേസുകൾ പരിഹരിക്കുന്നതിലെ കാലതാമസത്തിനുള്ള കാരണങ്ങൾ വിശദീകരിച്ചുകൊണ്ട്, മാജി നിരവധി വെല്ലുവിളികൾ ചൂണ്ടിക്കാട്ടി. സാമൂഹികമായ അപമാനം, അജ്ഞത അല്ലെങ്കിൽ മറ്റ് കാരണങ്ങളാൽ ബന്ധുക്കൾ പലപ്പോഴും കാണാതായവരുടെ റിപ്പോർട്ടുകൾ വൈകിപ്പിക്കാറുണ്ടെന്ന് അദ്ദേഹം പറഞ്ഞു.നിരവധി ആളുകൾ തങ്ങളുടെ കുടുംബങ്ങളെ അറിയിക്കാതെ ജോലിക്കായി സംസ്ഥാനം വിടുന്നതിനാൽ ചില കേസുകൾ തെറ്റിദ്ധരിക്കപ്പെടുന്നുണ്ടെന്നും മാജി കൂട്ടിച്ചേര്‍ത്തു.

"ഗണ്യമായ എണ്ണം കേസുകളിൽ പ്രായപൂർത്തിയാകാത്ത പെൺകുട്ടികൾ ഒളിച്ചോടുന്നത് ഉൾപ്പെടുന്നു, കാരണം പങ്കാളികൾക്കെതിരെ ക്രിമിനൽ നടപടി ഉണ്ടാകുമെന്ന ഭയം കാരണം അവർ പൊലീസിന്‍റെ നോട്ടീസ് ഒഴിവാക്കുന്നു. പല കേസുകളിലും കുടുംബങ്ങളും വിവരം നൽകുന്നവരും പൊലീസിനോട് പൂർണ വിവരങ്ങൾ വെളിപ്പെടുത്താൻ മടിക്കുന്നു.ഇത് അന്വേഷണങ്ങളിൽ കാലതാമസത്തിന് കാരണമാകുന്നു," മാജി പറഞ്ഞു.

കാണാതായ കുട്ടികളെ കണ്ടെത്തുന്നതിനും അവരുടെ കുടുംബങ്ങളുമായി വീണ്ടും ഒന്നിപ്പിക്കുന്നതിനുമായി വനിതാ-ശിശു വികസന മന്ത്രാലയം മിഷൻ വാത്സല്യ പോർട്ടൽ ആരംഭിച്ചിട്ടുണ്ടെങ്കിലും ശുക്ഷേമ സമിതികളും (സിഡബ്ല്യുസി) ശിശു സംരക്ഷണ സ്ഥാപനങ്ങളും (സിസിഐ) പ്രസക്തമായ ഡാറ്റ അപ്‌ലോഡ് ചെയ്യുന്നതിൽ പരാജയപ്പെടുന്നത് അതിന്‍റെ ലപ്രാപ്തിയെ തടസ്സപ്പെടുത്തുന്നുവെന്ന് മുഖ്യമന്ത്രി വ്യക്തമാക്കി.