യുപിയിൽ കൈയേറ്റമാരോപിച്ച്​ പള്ളിക്ക്​ നേരെ ബുൾഡോസർ രാജ്​

ലഖ്​നൗ: സർക്കാർ ഭൂമി കൈയേറി നിർമിച്ചെന്നാരോപിച്ച്​ ഉത്തർ പ്രദേശിൽ പള്ളിക്ക്​ നേരെ ബുൾഡോസർ രാജുമായി അധികൃതർ. കുശിനഗർ ജില്ലയിലെ ഹത്ത മേഖലയിലെ മദനി മസ്​ജിദിന്‍റെ ഭാഗമാണ്​ ഞായറാഴ്ച പൊളിച്ചുനീക്കാൻ തുടങ്ങിയത്​. പള്ളിക്കെതിരായ നടപടിയിൽ ഹൈക്കോടതിയുടെ സ്​റ്റേയുണ്ടായിരുന്നു. ശനിയാഴ്ച ഇതിന്‍റെ സമയപരിധി അവസാനിച്ചതോടെയാണ്​ അധികൃതർ പൊളിക്കാൻ തുടങ്ങിയത്​.

കനത്ത പൊലീസ്​ സുരക്ഷയിലായിരുന്നു നടപടി. കുശിനഗർ എസ്പി സന്തോഷ്​ മിശ്രയുടെ നേതൃത്വത്തിൽ പൊലീസും ബിഎസ്​എഫും സ്ഥലത്തുണ്ടായിരുന്നു. പള്ളിയുടെ ചുറ്റും ബാരിക്കേഡുകൾ സ്​ഥാപിക്കുകയും ചെയ്തു.

പള്ളി കൈയേറിയാണ്​ നിർമിച്ചതെന്ന്​ ആരോപിച്ച്​ ഹിന്ദുത്വ പ്രവർത്തകർ 2024 ഡിസംബർ 18നാണ്​ ഉത്തർ പ്രദേശ്​ മുഖ്യമന്ത്രിയുടെ പോർട്ടൽ വഴി പരാതി നൽകിയത്​. എന്നാൽ, 15 വർഷം മുമ്പ്​ 33 സെന്‍റ്​ ഭൂമി പള്ളി നിർമാണത്തിന്​ ​​വേണ്ടി വാങ്ങിയതാണെന്ന്​ മസ്​ജിദ്​ കമ്മിറ്റി മറുപടി നൽകി.

പരാതിക്ക്​ പിന്നാലെ ജില്ലാ അധികൃതർ സർവേ നടത്തുകയും പള്ളിയുടെ ഒരു ഭാഗം സർക്കാർ ഭൂമിയിലാണ്​ നിൽക്കുന്നതെന്ന നിഗമനത്തിലെത്തുകയും ചെയ്തു. തുടർന്ന് അംഗീകൃത പ്രോപ്പർട്ടി മാപ്പിന്‍റെ യഥാർത്ഥ പകർപ്പ് ഹാജരാക്കാൻ പള്ളി കമ്മിറ്റിയോട് അധികൃതർ ആവശ്യപ്പെട്ടു. മുനിസിപ്പൽ റെക്കോർഡ് ഉദ്യോഗസ്ഥർക്ക് ഈ മാപ്പ്​​ കണ്ടെത്താനായില്ല. ഇതിനാൽ ഈ രേഖ പള്ളി കമ്മിറ്റിക്കും ഹാജരാക്കാൻ കഴിഞ്ഞില്ല. ഇതേതുടർന്ന്​ സർക്കാർ ഭൂമി വ്യാജ രേഖ ഉപയോഗിച്ച്​ കൈവശപ്പെടുത്തിയെന്ന്​ കാണിച്ച്​ മസ്ജിദ് കമ്മിറ്റിയിലെ മൂന്ന് പേർക്കെതിരെ കേസെടുത്തു.

അതേസമയം, പള്ളിക്കെതിരെ ബുൾഡോസർ നടപടി സുപ്രിംകോടതി മാർഗനിർദേശങ്ങളുടെ ലംഘനമാണെന്ന്​ മസ്ജിദ് കമ്മിറ്റി പ്രതിനിധി സെയ്ഫുല്ല ഖാൻ പറഞ്ഞു. കൈയേറിയെന്ന ആരോപണത്തിൽ കൃത്യമായ മറുപടി അധികൃതർക്ക്​ നൽകിയതാണ്​. പള്ളി പൊളിക്കുന്നത്​ സംബന്ധിച്ച ഉത്തരവ്​ ഞങ്ങൾ ചോദിച്ചെങ്കിലും അവരത്​ കാണിച്ചില്ല. മുൻ ജില്ലാ മജിസ്‌ട്രേറ്റ് ഭൂമി അളന്ന് തിട്ടപ്പെടുത്തിയതാണ്​. 33 സെന്‍റ്​ ഭൂമി പള്ളിയുടേതാണെന്നും 29 സെന്‍റ്​ ഭൂമിയിലാണ് പള്ളി സ്ഥിതി ചെയ്യുന്നതെന്നുമാണ്​​ കണ്ടെത്തിയിട്ടുള്ളത്​​. ബിജെപിയുടെ ലെറ്റർഹെഡിൽ ആരെങ്കിലും പരാതി നൽകിയാൽ ഉടൻ തന്നെ മതപരമായ കെട്ടിടങ്ങൾ പൊളിക്കുകയാണ്​. ഇത് നഗ്നമായ അനീതിയാണെന്നും സെയ്​ഫുല്ല ഖാൻ പറഞ്ഞു.