ഗസ്സ വെടിനിർത്തൽ രണ്ടാം ഘട്ടം: ഇസ്രായേലിനുമേൽ സമ്മർദം തുടർന്ന്​ അമേരിക്ക

ഗസ്സ സിറ്റി: വെടിനിർത്തൽ രണ്ടാം ഘട്ടം നടപ്പാക്കാൻ ഇസ്രായേലിനുമേൽ സമ്മർദം തുടർന്ന്​ അമേരിക്ക. വെടിനിർത്തൽ ശരിയായ ദിശയിൽ മുന്നോട്ടുപോകുന്നതായി യുഎസ്​ സ്റ്റേറ്റ്​ ​സെക്രട്ടറി മാർക്കോ റൂബിയോ പറഞ്ഞു. വെസ്റ്റ് ബാങ്ക് പിടിച്ചെടുത്താൽ ഇസ്രായേലിനുള്ള യുഎസിന്റെ മുഴുവൻ പിന്തുണയും അവസാനിക്കുമെന്ന് ഡോണൾഡ് ട്രംപ്​ വ്യക്തമാക്കി. ഗസ്സയിൽ ആക്രമണവും സഹായനിയന്ത്രണവും ഇസ്രായേൽ തുടരുകയാണ്.

യുദ്ധാനന്തര ഗസ്സയുടെ ഭരണസംവിധാനവും ഹമാസ്​ നിരായുധീകരണവും ഉൾപ്പെടുന്ന വെടിനിർത്തൽ രണ്ടാംഘട്ട ചർച്ചകൾക്ക്​ തയാറാകാനാണ് അമേരിക്കയുടെ സമ്മർദം. മുഴുവൻ ബന്ദികളുടെ മൃതദേഹങ്ങളും ലഭിക്കാതെ ഹമാസുമായി തുടർ ചർച്ചക്കില്ലെന്ന നിലപാടിലാണ്​ ഇസ്രായേൽ. എന്നാൽ ബന്ദികളുടെ മുഴുവൻ മൃതദേഹങ്ങളും കണ്ടെത്തി കൈമാറാൻ സമയംവേണ്ടി വരുമെന്ന യാഥാർഥ്യം ഇസ്രായേലിനെ ബോധ്യപ്പെടുത്താനാണ്​ യുഎസ്​ ശ്രമം.

ഫലസ്തീൻ അതോറിറ്റിക്കും ഗസ്സ ഭരണത്തിൽ പങ്കാളിത്തം നൽകരുതെന്നാണ്​ ഇസ്രയേലിന്‍റെ പിടിവാശി. വൈസ്​ പ്രസിഡന്‍റ്​ ജെ.ഡി വാൻസിനു പിന്നാലെ യുഎസ്​ സ്റ്റേറ്റ്​ സെക്രട്ടറി മാർക്കോ റൂബിയോ ഇന്നലെ ഇസ്രായേലിൽ എത്തി പ്രധാനമന്ത്രി ബിന്യമിൻ നെതന്യാഹുവുമായി ചർച്ച നടത്തി.

വെടിനിർത്തലിൽ പുരോഗതിയുണ്ടെങ്കിലും ഇനിയും ഏറെ ചെയ്യാനുണ്ടെന്ന്​ മാർക്കോ റൂബിയോ പറഞ്ഞ. പ്രതികൂല സാഹചര്യങ്ങൾക്കിടയിലും സമാധാനം തന്നെയാണ്​ ലക്ഷ്യമെന്ന്​ നെതന്യാഹുവും പ്രതികരിച്ചു. ഖാൻ യൂനുസിൽ ഇന്നലെ ഇസ്രായേൽ സേന വ്യാപക ആക്രമണം നടത്തി. റഫ അതിർത്തി തുറന്ന്​ കൂടുതൽ സഹായം ഗസ്സയിൽ എത്തിക്കണമെന്ന ആവശ്യവും ഇസ്രായേൽ തള്ളി.

ഗസ്സയിലുടനീളം ആവശ്യത്തിന്​ വെള്ളവും ഭക്ഷണവും മറ്റ്​ സൗകര്യങ്ങളും ലഭിക്കാതെ ജനങ്ങൾ വലിയ ദുരിതം നേരിടുന്നതായി 'യുനർവ' സാരഥികൾ അറിയിച്ചു. അതിനിടെ, വെസ്റ്റ് ബാങ്കിന് വേണ്ടി ഇസ്രായേൽ നീങ്ങിയാൽ അവർക്കുള്ള യുഎസിന്റെ മുഴുവൻ പിന്തുണയും അവസാനിക്കുമെന്ന്​ ടൈം മാഗസിന്​ നൽകിയ അഭിമുഖത്തിൽ​ ട്രംപ് പറഞ്ഞു.

വെസ്റ്റ് ബാങ്ക് പ്രദേശം ഇസ്രായേൽ പിടിച്ചെടുക്കി​ല്ലെന്ന് അമേരിക്കൻ വൈസ് പ്രസിഡന്റ് ജെ.ഡി വാൻസും പ്രതികരിച്ചു. വെസ്റ്റ് ബാങ്ക് കൂട്ടിച്ചേർക്കാനുള്ള ബില്ലിന് ഇസ്രായേൽ പാർലമെന്റ് പ്രാഥമിക അംഗീകാരം നൽകിയതിന് പിന്നാലെയാണ് അമേരിക്കയുടെ പ്രതികരണം. അമേരിക്കൻ നിലപാടി​നെ ഫലസ്തീൻ അതോറിറ്റി പ്രസിഡന്‍റ്​ മഹ്​മൂദ്​ അബ്ബാസ്​ സ്വാഗതം ചെയ്തു. അൽ അഖ്‌സ മസ്‌ജിദിന്‍റെ താഴെയും ചുറ്റുപാടും ഇസ്രായേൽ നടത്തിക്കൊണ്ടിരിക്കുന്ന ഖനനങ്ങൾ ജറൂസലമിലെ ശേഷിപ്പുകൾക്ക് ഗുരുതര ഭീഷണി ഉയർത്തുന്നതായി ഖുദ്‌സ് ഗവർണറേറ്റ്​ മുന്നറിയിപ്പ് നൽകി.