​ഗസ്സ വെടിനിർത്തൽ: ദോഹയിൽ ചർച്ചകൾ തുടരും; പ്രതീക്ഷയിൽ മധ്യസ്ഥരാജ്യങ്ങൾ

​ഗസ്സ സിറ്റി: ഗസ്സ വെടിനിർത്തൽ ചർച്ചകൾ ഖത്തർ തലസ്ഥാനമായ ദോഹയിൽ ഇന്നും തുടരും. വ്യാഴാഴ്ചയോടെ താൽക്കാലിക വെടിനിർത്തൽ കരാർ യാഥാർഥ്യമാകുമെന്ന പ്രതീക്ഷയിലാണ് മധ്യസ്ഥ രാജ്യങ്ങളും അമേരിക്കയും. ഗസ്സയിലെ സഹായവിതരണം യുഎൻ നിയന്ത്രണത്തിൽ പുനരാരംഭിക്കണമെന്ന ഹമാസ്​ നിർദേശത്തെ ഇസ്രായേൽ എതിർത്തു. ഇസ്രായേൽ പ്രധാനമന്ത്രി ബിന്യമിൻ നെതന്യാഹു അമേരിക്കയിൽ നേതാക്കളുമായി തിരക്കിട്ട ചർച്ചയിലാണ്. യുദ്ധാനന്തര ഗസ്സയുടെ ഭാവി സംബന്ധിച്ച്​ തീർപ്പിലെത്താൻ അമേരിക്കയ്ക്കും ഇസ്രായേലിനും കഴിഞ്ഞിട്ടില്ല.

ഹമാസ്​, ഇസ്രായേൽ പ്രതിനിധി സംഘങ്ങൾ തമ്മിൽ ദോഹയിൽ തുടരുന്ന ചർച്ച ശരിയായ ദിശയിലെന്ന്​ അമേരിക്ക. ഭിന്നതകൾക്ക്​ പരിഹാരം കണ്ട്​ ഉടൻ വെടിനിർത്തലിലേക്ക്​ നീങ്ങാൻ ഇരുപക്ഷത്തിനും കഴിയുമെന്ന്​ അമേരിക്കയുടെ പശ്ചിമേഷ്യൻ ദൂതൻ സ്റ്റിവ്​ വിറ്റ്​കോഫ്​ പറഞു. ഇന്നും​ ദോഹയിൽ ചർച്ച തുടരും. വെടിനിർത്തൽ വേളയിൽ ഗസ്സയിലേക്കുള്ള സഹായ വിതരണം യുഎന്നിനോ സ്വതന്ത ഏജൻസിക്കോ കൈമാറണം എന്നതാണ്​ ഹമാസ്​ ഉന്നയിച്ച പ്രധാന ആവശ്യങ്ങളിലൊന്ന്​. എന്നാൽ ഇസ്രായേൽ ഇത്​ എതിർക്കുകയാണ്​.

വാഷിങ്​ടണിൽ ഇസ്രായേൽ പ്രധാനമന്ത്രി ബിന്യമിൻ നെതന്യാഹുവുമായി ഇന്നലെ സ്റ്റിവ്​ വിറ്റ്​കോഫ്​ ചർച്ച നടത്തി. യുഎസ്​ സ്​റ്റേറ്റ്​ സെക്രട്ടറി മാർക്കോ റൂബിയോയുമായി ഇന്ന്​ നെതന്യാഹു ചർച്ച നടത്തും. വെടിനിർത്തലിനു പുറമെ യുദ്ധാനന്തര ഗസ്സയുടെ ഭാവി, ഇറാൻ ആണവ പദ്ധതിക്കെതിരായ നടപടി എന്നിവ സംബന്ധിച്ചും അമേരിക്കൻ നേതാക്കളുമായി ചർച്ച നടത്തുമെന്ന്​ നെതന്യാഹു പറഞു. ഇസ്രായേൽ-ഗസ്സ അതിർത്തിയോട്​ ചേർന്ന്​ മുഴുവൻ ഫലസ്തീനികളെയും പ്രത്യേകം പുനരധിവസിപ്പിച്ച്​ ഹമാസിന്‍റെ സ്വാധീനം ഇല്ലാതാക്കുന്നതുൾപ്പെടെയുള്ള ചില നിർദേശങ്ങളാണ്​ നെതന്യാഹു അമേരിക്കക്ക്​ മുമ്പാ​കെ സമർപ്പിച്ചതെന്ന്​ ഇസ്രായേൽ മാധ്യമങ്ങൾ റിപ്പോർട്ട്​ ചെയ്​തു.

ഗസ്സയിൽ ഇസ്രായേൽ ​ആക്രമണത്തിൽ 61 പേർ കൊല്ലപ്പെട്ടു. ഭക്ഷണത്തിന്​ കാത്തുനിന്നവർക്കു നേരെ നടന്ന വെടിവെപ്പിൽ ഇന്നലെയും അഞ്ച് പേർ മരണപ്പെട്ടു. വടക്കൻ ഗസ്സയിൽ ഹമാസ്​ നടത്തിയ അപ്രതീക്ഷിത തിരിച്ചടിയിൽ 16 ഇസ്രായേൽ സൈനികർക്ക്​ പരിക്കേറ്റു. ഇവരിൽ നാല് പേരുടെ നില ഗുരുതരമാണ്​. സൈനിക വാഹനത്തിൽ ഘടിപ്പിച്ച സ്​ഫോടകവസ്തു പൊട്ടിത്തെറിച്ചാണ്​ അപകടം.

അതിനിടെ, യ​മ​നി​ലെ ​കേ​ന്ദ്ര​ങ്ങ​ളി​ൽ ഇസ്രായേൽ നടത്തിയ വ്യോ​മാ​ക്ര​മ​ണത്തിന്​ തിരിച്ചടിച്ച്​ ഹൂതികൾ. ഇസ്രായേലിനു നേരെ മിസൈൽ വർഷിച്ചതിനു പുറമെ ചെങ്കടലിൽ ഒരു കപ്പലിനു നേരെയും ഹൂതികൾ ആക്രമണം നടത്തി. രണ്ട്​ കപ്പൽ ജീവനക്കാർക്ക്​ പരിക്കേൽക്കുകയും രണ്ട്​ പേരെ കാണാതാവുകയും ചെയ്തു. കഴിഞ്ഞ ദിവസം തങ്ങൾ ആക്രമിച്ച മാ​ജി​ക് സീ​സ് എ​ന്ന ച​ര​ക്കു​ക​പ്പ​ൽ കടലിൽ മുങ്ങിയതായും ഹൂ​തികൾ അറിയിച്ചു.