ആക്രമണ ഭീതിക്കിടെ ഹോർമുസ് കടലിടുക്കിൽ ഇറാന്റെ നാവികാഭ്യാസം; കപ്പലുകളെ ലക്ഷ്യമിട്ടാൽ കനത്ത വില നൽകേണ്ടിവരുമെന്ന് യുഎസ്

തെഹ്റാൻ: ആഗോള വിപണിയിലേക്കുള്ള എണ്ണയിൽ നാലിലൊന്നും കടന്നുപോകുന്ന പ്രധാന കപ്പൽപാതയായ ഹോർമുസ്​ കടലിടുക്ക്​ വീണ്ടും സംഘർഷ കേന്ദ്രമാകുന്നു. ഇന്നും നാളെയും വെടിക്കോപ്പുകൾ ഉപയോഗിച്ചുള്ള വിപുലമായ സൈനികാഭ്യാസമാകും ഇവിടെ നടക്കുകയെന്ന്​ ഇറാൻ നാവികസേന അറിയിച്ചു. ഹോർമുസ്​ വഴി കടന്നുപോകുന്ന കപ്പലുകളും മറ്റും അതീവ ജാഗ്രത പുലർത്തണമെന്നും ഇറാൻ നിർദേശിച്ചു. അതേസമയം മേഖലയിൽ നങ്കൂരമിട്ട തങ്ങളുടെ യുദ്ധകപ്പലുകൾക്ക്​ നേരെ തിരിഞ്ഞാൽ ഗുരുതര പ്രത്യാഘാതം ഉണ്ടാകുമെന്ന്​ യു.എസ്​ സെൻട്രൽ കമാൻഡ്​ മുന്നറിയിപ്പ്​ നൽകി. അഭ്യാസം പ്രൊഫഷണൽ സ്വഭാവത്തിൽ വേണമെന്നും അമേരിക്ക ഓർമിപ്പിച്ചു.

ഇരുപക്ഷവും യുദ്ധസന്നാഹങ്ങൾ വർധിപ്പിക്കുന്നതിനിടയിലും നയതന്ത്ര നീക്കങ്ങൾ സജീവമാണ്​. അമേരിക്കയുമായി ചർച്ചാഘടനക്ക്​ രൂപം നൽകി വരികയാണെന്ന്​ ഇറാൻ ദേശീയ സുരക്ഷാ മേധാവി അലി ലാറിജാനി എക്​സിൽ കുറിച്ചു. എന്നാൽ മറ്റു വിശദാംശങ്ങളൊന്നും അദ്ദേഹം പങ്കുവെച്ചില്ല. ഇറാനുമായി ആശയവിനിമയം തുടരുന്നതായി യുഎസ്​ പ്രസിഡൻറ്​ ഡോണൾ‍ഡ് ട്രംപ്​ ഫോക്​സ്​ ന്യൂസിന്​ നൽകിയ അഭിമുഖത്തിൽ പറഞ്ഞു. എന്ത് സംഭവിക്കുമെന്ന്​ കാത്തിരുന്നു കാണാമെന്നും ട്രംപ്​ പ്രതികരിച്ചു. ഇറാനെതിരെ സ്വീകരിക്കുന്ന നടപടിയെ കുറിച്ച്​ ഗൾഫിലെ സഖ്യരാജ്യങ്ങളെ ഇതുവരെ വിവരം അറിയിച്ചിട്ടില്ലെന്നും അദ്ദേഹം കൂട്ടിച്ചേർത്തു.

അതിനിടെ യുദ്ധം ഉണ്ടായാൽ സ്വീകരിക്കേണ്ട മുൻകരുതൽ നടപടികൾ ശക്​തമാക്കുകയാണ്​ ഇറാനും ഇസ്രായേലും. തെഹ്​റാനിൽ 82 മെട്രോ സ്​റ്റേഷനുകൾ താൽക്കാലിക ഷെൽട്ടറുകളാക്കി മാറ്റുമെന്ന്​ ക്രൈസിസ്​ മാനേജ്​മെൻറ്​ സംഘടനാമേധാവി അലി നസ്രി അറിയിച്ചു. ആശുപത്രികൾ ഉൾപ്പടെ എല്ലാം സജ്ജമായിരിക്കണമെന്ന്​ ഇസ്രായേലും നിർദേശം നൽകി.

ഇ​റാ​നു​മേ​ൽ ആ​ക്ര​മ​ണ ഭീ​തി ഉ​രു​ണ്ടു​കൂ​ടി​യ​തി​നി​ടെ, 667 കോ​ടി ഡോ​ള​റി​ന്റെ ആ​യു​ധ​ങ്ങ​ൾ കൂടി അമേരിക്ക ഇസ്രായേലിന് നൽകി. യു.​എ​സ് കോ​ൺ​ഗ്ര​സ് അം​ഗീ​ക​രി​ച്ച ഇ​ട​പാ​ടി​ൽ സൗ​ദി അ​റേ​ബ്യ​ക്ക് 900 കോ​ടി ഡോ​ള​റി​ന്റെ ആ​യു​ധ​ങ്ങ​ൾ ന​ൽ​കാ​നും തീ​രു​മാ​നി​ച്ചി​ട്ടു​ണ്ട്. 30 അ​പ്പാ​ച്ചെ ഹെ​ലി​കോ​പ്ട​റും അ​നു​ബ​ന്ധ ഉ​പ​ക​ര​ണ​ങ്ങ​ളു​മാ​ണ് ഇ​സ്രാ​യേ​ലി​ന് ന​ൽ​കുക.