ലോക രാജ്യങ്ങളുടെ സമ്മർദം; ഗസ്സയിൽ വെടിനിർത്തൽ ചർച്ചക്ക് ഇസ്രായേൽ നീക്കം

ദുബൈ: ഗസ്സയിൽ വെടിനിർത്തലിന്​ ഹമാസുമായി വീണ്ടും ചർച്ചക്കൊരുങ്ങാൻ ഇസ്രായേൽ തീരുമാനിച്ചതായി റിപ്പോർട്ട്. അമേരിക്കയും ചില യൂറോപ്യൻ രാജ്യങ്ങളും ഉയർത്തിയ സമ്മർദത്തെ തുടർന്നാണ്​ ഹമാസുമായി വീണ്ടും ചർച്ചക്ക്​ തയാറാകാൻ ഇസ്രായേൽ ഒരുങ്ങുന്നത്​. അമേരിക്കയുടെ പശ്​ചിമേഷ്യൻ പ്രതിനിധി സ്റ്റിവ്​ വിറ്റ്​കോഫ്​ മുന്നോട്ടു വെച്ച വെടിനിർത്തൽ നിർദേശം അംഗീകരിച്ചാണ്​ വീണ്ടും ചർച്ചയെന്ന്​ ഇസ്രായേൽ പ്രധാനമന്ത്രി ബിന്യമിൻ നെതന്യാഹുവിന്‍റെ വക്​താവിനെ ഉദ്ധരിച്ച്​ വാഷിങ്​ടൺ പോസ്റ്റ്​ റിപ്പോർട്ട്​ ചെയ്തു.

ഇന്നലെ വിളിച്ചുചേർത്ത ഇസ്രയേൽ സുരക്ഷാ സമിതിയോഗവും വെടിനിർത്തൽ ചർച്ച ചെയ്തു. എന്നാൽ ഹമാസുമായി വീണ്ടും ചർച്ചക്ക്​ പോകാൻ നെതന്യാഹു തയാറാകില്ലെന്നാണ്​ പ്രതീക്ഷയെന്ന്​ തീവ്ര വലതുപക്ഷ മന്ത്രിമാരായ ബെൻ ഗവിറും സ്മോട്രികും പറഞു. അതേസമയം, ഗസ്സയിലെ യുദ്ധവിരാമമാണ്​ ട്രംപ്​ ഭരണകൂടത്തിന്‍റെ അടുത്ത ലക്ഷ്യമെന്ന്​ യു.എസ്​ സ്​റ്റേറ്റ്​ വകുപ്പ്​ അറിയിച്ചു. ഗസ്സയിലേക്ക് ഉടൻ സഹായം അനുവദിക്കാനും അമേരിക്ക ഇസ്രായേലിനോട്​ ആവശ്യപ്പെട്ടു.

ഗസ്സയിൽ ഉടൻ വെടിനിർത്തൽ വേണമെന്നാവശ്യപ്പെട്ട്​ തെൽ അവിവിൽ റാലി നടന്നു. നിരവധി പ്രക്ഷോഭകരെ സുരക്ഷാ സൈന്യം അറസ്റ്റ്​ ചെയ്തു. ഗസ്സയിൽ പട്ടിണി വ്യാപിച്ചതോടെ ആയിരങ്ങൾ കൂടുതൽ ദുരിതത്തിലായി. ഇസ്രായേൽ നടത്തിയ ആക്രമണങ്ങളിൽ 69 ഫലസ്തീനികളാണ്​ ഇന്നലെ കൊല്ലപ്പെട്ടത്​.

അതിനിടെ, ഗസ്സയിൽ ഫലസ്തീനിക​ളെ കൂട്ടക്കൊല ചെയ്യുന്ന ഇസ്രായേൽ ​സൈനികർക്ക് യാത്ര ചെയ്യാൻ ഐഡിഎഫ് നൽകുന്നത് കാലഹരണപ്പെട്ട കവചിത വാഹനങ്ങളെന്ന് കൊല്ലപ്പെട്ട സൈനികന്റെ മാതാവ് കുറ്റപ്പെടുത്തി. ചൊവ്വാഴ്ച ഹമാസ് ആക്രമണത്തിൽ കൊല്ലപ്പെട്ട ഏഴ് ഇസ്രായേൽ സൈനികരിലൊരാളുടെ മാതാവാണ് ആരോപണവുമായി രംഗത്തു വന്നത്​.