ഗസ്സയിലേക്ക്​ അടിയന്തര സഹായം ഉടൻ എത്തിക്കണം; യുഎൻ അഭ്യർഥന തള്ളി ഇസ്രായേൽ

ഗസ്സ സിറ്റി: പട്ടിണി പിടിമുറുക്കിയ ഗസ്സയിലേക്ക്​ അടിയന്തര സഹായം ഉടൻ എത്തിക്കണമെന്ന യുഎൻ അഭ്യർഥന തള്ളി ഇസ്രായേൽ. ഇന്നുമുതൽ ആക്രമണം വ്യാപിപ്പിക്കുമെന്ന്​ മുന്നറിയിപ്പ്​ നൽകി. ഭക്ഷ്യശേഖരം പൂർണമായും അവസാനിച്ചതോടെ ഗസ്സയിൽ ലക്ഷങ്ങൾ പട്ടിണി മൂലം മരിക്കേണ്ട സാഹചര്യം രൂപപ്പെട്ടതായി ലോക ഭക്ഷ്യപദ്ധതി സാരഥികൾ വെളിപ്പെടുത്തി. രണ്ടു മാസത്തിലേറെയായി ഒരു ട്രക്ക്​ പോലും ഗസ്സയിലേക്ക്​ കടത്തി വിടാൻ ഇസ്രായേൽ തയാറായിട്ടില്ല.

ഭക്ഷണം, വെള്ളം, മരുന്ന്​ എന്നിവയുടെ ശേഖരം അവസാനിച്ചിരിക്കെ, എത്രയും വേഗം സാധന സാമഗ്രികൾ ഗസ്സയിൽ എത്തിക്കേണ്ട ബാധ്യത ലോകസമൂഹം ഏറ്റെടുക്കണമെന്ന യു.എൻ അഭ്യർഥനയും ഇസ്രായേൽ തള്ളി. ഇന്നുമുതൽ ഗസ്സയിൽ യുദ്ധം വ്യാപിപ്പിക്കാനുള്ള പദ്ധതിക്ക്​ തുടക്കം കുറിക്കുമെന്ന്​ ഇസ്രായേൽ സൈനികമേധാവി അറിയിച്ചു. ഹമാസ്​ പോരാളികളെ വകവരുത്താൻ ആക്രമണം വിപുലപ്പെടു​ത്തേണ്ട ഘട്ടത്തിലാണ്​ ഇസ്രായേലെന്നും സൈനിക മേധാവി വ്യക്​തമാക്കി.

ബന്ദികളുടെ മോചനത്തിന്​ ശക്​തമായ നടപടി സ്വീകരിക്കുമെന്ന്​ യു.എസ്​ പ്രസിഡന്‍റ്​ ഡോണാൾഡ്​ ട്രംപ്​. ബന്ദികളുടെ മോചനം പരമപ്രധാനമാണെന്നും അതിനായി ശക്​തമായ നടപടികൾ സ്വീകരിച്ചു വരുന്നതായും അമേരിക്കൻ പ്രസിഡന്‍റ്​ ഡോണാൾഡ്​ ട്രംപ്​ വെളിപ്പെടുത്തി. എന്നാൽ ഇതുമായി ബന്ധപ്പെട്ട വിശദാംശങ്ങൾ വ്യക്​തമാക്കാൻ ട്രംപ്​ വിസമ്മതിച്ചു.

കെയ്‌റോയിലും ദോഹയിലും കേന്ദ്രീകരിച്ച്​ വെടിനിർത്തൽ ചർച്ച തുടരുന്നുണ്ടെങ്കിലും കാര്യമായ പുരോഗതി ഉണ്ടായിട്ടില്ലെന്നാണ്​ മധ്യസ്ഥ രാജ്യങ്ങൾ നൽകുന്ന സൂചന. ഹേഗിലെ അന്താരാഷ്ട്ര ക്രിമിനൽ കോടതിക്കു മുമ്പാകെ ഗസ്സയുടെ ദുരിതം സംബന്ധിച്ച വാദം കേൾക്കൽ ഇന്ന്​ പൂർത്തിയാകും. പിന്നിട്ട നാലു ദിവസങ്ങളായി നിരവധി രാജ്യങ്ങളും കൂട്ടായ്മകളുമാണ്​ ഇസ്രായേലിന്‍റെ വംശഹത്യാ നടപടികളുമായി ബന്ധപ്പെട്ട തെളിവുകൾ കോടതിക്ക്​ കൈമാറിയത്​. ഇസ്രായേലിന്‍റെ ക്രൂരത തടയേണ്ട ഉത്തരവാദിത്വം എല്ലാവർക്കും ഉണ്ടെന്ന്​ ഇന്തോനേഷ്യയും ഖത്തറും വ്യക്​തമാക്കി.

അതിനി​ടെ, ഇസ്രായേലിലെ ജറുസലേമിൽ ആളിപ്പടർന്ന കാട്ടുതീ അണക്കാനുള്ള ശ്രമങ്ങൾ തുടരുന്നു. 24 മണിക്കൂറിനുള്ളിൽ ആയിരക്കണക്കിന് ആളുകളെയാണ് ഒഴിപ്പിച്ചത്. ഏകദേശം 3,000 ഏക്കർ ഭൂമി കത്തിനശിച്ചു. ഫ്രാൻസ്​, ഇറ്റലി, ക്രൊയേഷ്യ, സൈപ്രസ്​ ഉൾപ്പെടെ വിവിധ രാജ്യങ്ങൾ ഇസ്രായേലിന്​ സഹായം വാദ്​ഗാനം ചെയ്തു