റഫ അതിർത്തി തുറക്കുന്ന കാര്യത്തിൽ തീരുമാനമായില്ല; ഗസ്സയിൽ രണ്ടാംഘട്ട വെടിനിർത്തൽ ചർച്ച സജീവം

ഗസ്സ സിറ്റി: ഇസ്രായേൽ വെടിനിർത്തൽ ലംഘനം തുടരുന്നതിനിടെ രണ്ടാം ഘട്ട നടപടികളുമായി ബന്ധപ്പെട്ട്​ ഖത്തർ. അനിശ്ചിതത്വം തുടരുന്നതിനിടയിലും വെടിനിർത്തൽ രണ്ടാംഘട്ട ചർച്ചകളുമായി മധ്യസ്ഥ രാജ്യങ്ങൾ. ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ശൈഖ്​ മുഹമ്മദ്​ ബിൻ അബ്​ദുർറഹ്​മാൻ ബിൻ ജാസിം ആൽഥാനിയുമായി ഈജിപ്ത്​ വിദേശകാര്യ മന്ത്രി ബദ്​ർ അബ്​ദുല്ലത്തി ടെലിഫോണിൽ ചർച്ച നടത്തി.

അമേരിക്കയുമായി നടന്ന ചർച്ചകളുടെ തുടർ നീക്കം സംബന്ധിച്ച കാര്യങ്ങളാണ്​ ടെലിഫോൺ സംഭാഷണത്തിൽ പ്രധാനമായും കടന്നുവന്നത്​. രണ്ടാംഘട്ട വെടിനിർത്തൽ നടപടികൾ ശക്​തമായി തുടരാൻ വൈകരുതെന്ന്​ മധ്യസ്ഥ രാജ്യങ്ങൾ അമേരിക്കയെ അറിയിച്ചതായി റിപ്പോർട്ടുണ്ട്​. റഫ അതിർത്തി തുറക്കുന്നതു സംബന്​ധിച്ച് ഇസ്രായേൽ​ ഇനിയും തീരുമാനമെടുത്തിട്ടില്ല. അവസാന ബന്ദിയുടെ മൃതദേഹം ലഭിക്കാതെ രണ്ടാംഘട്ട വെടിനിർത്തലിന്​ തയാറല്ലെന്ന കടുംപിടിത്തം ഇസ്രായേൽ തുടരുകയാണ്​. തെക്കൻ ഗസ്സയിൽ അന്താരാഷ്​ട്ര റെഡ്ക്രോസ്​ സഹായത്തോടെ മൃതദേഹത്തിനായുള്ള തെരച്ചിൽ നടപടികൾ ആരംഭിച്ചു.

അതിനിടെ, സ്വതന്ത്ര ഫലസ്തീൻ രാഷ്​ട്രം എന്ന ആശയം തകർക്കാൻ ജറൂസലമിൽ വിപുലമായ അനധികൃത കുടിയേറ്റ പദ്ധതിയുമായി മുന്നോട്ട്​ പോകാൻ ഇസ്രയേൽ തീരുമാനിച്ചു. വിവാദ കുടിയേറ്റ നിർമാണ പദ്ധതിക്ക്​ നിർമാതാക്കളിൽനിന്ന് ഇസ്രായേൽ ​അപേക്ഷ ക്ഷണിച്ചു. ഇ വൺ പദ്ധതിയെന്ന പേരിൽ ജറൂസലമിനെ രണ്ടായി പിളർത്തുന്ന കുടിയേറ്റ നിർമാണമാണിത്​.ഒരു മാസത്തിനകം പ്രാഥമിക ഘട്ട നടപടികൾക്ക് തുടക്കമാകും.ജറൂസലമിന്റെ ഉൾപ്രദേശങ്ങളിൽ ആരംഭിച്ച് അധിനിവിഷ്ട വെസ്റ്റ് ബാങ്ക് വരെ നീളുന്ന പദ്ധതി നടപ്പാക്കുന്നതോടെ മേഖലയിൽ ഫലസ്തീൻ രാഷ്ട്ര സ്ഥാപനം ദുഷ്‍കരമാകും. തീവ്ര വലതുപക്ഷ നേതാവും ധനകാര്യ മന്ത്രിയുമായ ബെസലേ​ൽ ​സ്മോട്രിച്ചിന്റെ മേൽനോട്ടത്തിലാണ് ഇ വൺ പദ്ധതി നടപ്പാക്കുന്നത്.