വാഷിംഗ്ടൺ: അമേരിക്കൻ ഐക്യനാടുകളിലെ 2028ലെ പ്രസിഡന്റ് തെരഞ്ഞെടുപ്പിന് മുന്നോടിയായി നടക്കുന്ന പ്രാരംഭ അഭിപ്രായ സർവേകളിൽ ഡെമോക്രാറ്റിക്, റിപ്പബ്ലിക്കൻ പാർട്ടികളിലെ സ്ഥാനാർഥി സാധ്യതകളിൽ മുൻപന്തിയിലെത്തി മുൻ വൈസ് പ്രസിഡന്റ് കമല ഹാരിസും ഇപ്പോഴത്തെ വൈസ് പ്രസിഡന്റ് ജെ.ഡി വാൻസും. അടുത്തിടെ പുറത്തുവന്ന ഹാർവാർഡ് ക്യാപ്സ്/ഹാരിസ്, എമേഴ്സൺ കോളജ് പോളിങ് എന്നിവ ഉൾപ്പെടെയുള്ള സർവേ ഫലങ്ങളിലാണ് ഈ വിവരങ്ങൾ വ്യക്തമാക്കുന്നത്. ഇരു പാർട്ടികൾക്കുള്ളിലും ശക്തമായ മത്സരമാണ് വരും നാളുകളിൽ പ്രതീക്ഷിക്കുന്നത്.
റിപ്പബ്ലിക്കൻ പാർട്ടിയുടെ സ്ഥാനാർഥിത്വത്തിനായി വൈസ് പ്രസിഡന്റ് ജെ.ഡി വാൻസാണ് മുൻനിരയിലുള്ളത്. പുതിയ സർവേ ഫലങ്ങൾ പ്രകാരം 45 ശതമാനത്തോളം റിപ്പബ്ലിക്കൻ വോട്ടർമാരുടെ പിന്തുണ വാൻസിനുണ്ട്. എന്നാൽ അദ്ദേഹത്തിന് കനത്ത വെല്ലുവിളിയുയർത്തിക്കൊണ്ട് സ്റ്റേറ്റ് സെക്രട്ടറി മാർക്കോ റൂബിയോയും തൊട്ടുപിന്നിലായുണ്ട്. ചില സർവേകളിൽ ഇരുവരും തമ്മിലുള്ള വ്യത്യാസം വളരെ നേരിയതാണ്. 50 വയസിന് മുകളിലുള്ള വോട്ടർമാരുടെ ഇടയിൽ റൂബിയോയ്ക്ക് പിന്തുണ വർധിക്കുമ്പോൾ, യുവാക്കളായ റിപ്പബ്ലിക്കൻ വോട്ടർമാർക്കിടയിൽ വാൻസാണ് കൂടുതൽ സ്വാധീനം ചെലുത്തുന്നത്. ഇവരെക്കൂടാതെ ഡൊണാൾഡ് ട്രംപ് ജൂനിയർ, റോൺ ഡിസാന്റിസ് തുടങ്ങിയവരും റിപ്പബ്ലിക്കൻ പട്ടികയിലുണ്ട്.
ഡെമോക്രാറ്റിക് പാർട്ടിയുടെ സ്ഥാനാർഥി പട്ടികയിൽ കമല ഹാരിസ് 44 ശതമാനത്തോളം വോട്ടർമാരുടെ പിന്തുണയോടെയാണ് പ്രധാനമായും മുന്നിട്ട് നിൽക്കുന്നത്. 2028ലെ തെരഞ്ഞെടുപ്പിൽ താൻ മത്സരിക്കാൻ സാധ്യതയുണ്ടെന്ന് അടുത്തിടെ നടന്ന ഒരു പരിപാടിയിൽ അവർ സൂചിപ്പിച്ചിരുന്നു. എങ്കിലും മറ്റ് നേതാക്കളായ മുൻ ഗതാഗത സെക്രട്ടറി പീറ്റ് ബുട്ടിഗീഗ്, കാലിഫോർണിയ ഗവർണർ ഗാവിൻ ന്യൂസോം എന്നിവരും ഡെമോക്രാറ്റിക് വോട്ടർമാർക്കിടയിൽ തങ്ങളുടെ സ്വാധീനം ശക്തമാക്കുന്നുണ്ട്. ചില പോളിങ്ങുകളിൽ ഈ നേതാക്കൾ കമല ഹാരിസിനെ മറികടക്കുന്ന പ്രവണതയും കാണിക്കുന്നുണ്ട്.
രാജ്യത്തിന്റെ സാമ്പത്തിക ഭദ്രത, പണപ്പെരുപ്പം, കുറഞ്ഞ നികുതി നിരക്കുകൾ എന്നീ വിഷയങ്ങളാണ് വോട്ടർമാരെ ഏറ്റവും കൂടുതൽ സ്വാധീനിക്കുന്നത് എന്ന് സർവേകൾ ചൂണ്ടിക്കാട്ടുന്നു. സർക്കാരിന്റെ പദ്ധതികളിലെ അഴിമതികൾ തടയുക, അതിർത്തി സുരക്ഷ എന്നിവയും വോട്ടർമാർക്കിടയിൽ ചർച്ചാവിഷയമാണ്. തെരഞ്ഞെടുപ്പിന് മുൻപായി ഇരു പാർട്ടികളും വോട്ടർമാരുടെ ഈ ആശങ്കകൾ പരിഹരിക്കാൻ കൂടുതൽ വ്യക്തമായ പദ്ധതികൾ മുന്നോട്ടുവെക്കേണ്ടതുണ്ട്.