38 വര്‍ഷങ്ങൾക്ക് ശേഷം വീണ്ടും പ്രിയദര്‍ശന്‍റെ ക്യാമറക്ക് മുന്നിൽ ലിസ്സി; ഒപ്പം കല്യാണിയും

കൊച്ചി: മലയാളികളുടെ മനസ്സിൽ ഇന്നും മായാതെ നിൽക്കുന്ന ഒട്ടേറെ കഥാപാത്രങ്ങൾ സമ്മാനിച്ച നടി ലിസി വീണ്ടും ക്യാമറയ്ക്ക് മുന്നിലേക്ക്. 38 വർഷത്തെ ഇടവേളയ്ക്ക് ശേഷം സംവിധായകൻ പ്രിയദർശന്റെ സംവിധാനത്തിൽ അഭിനയിക്കുന്നതിന്റെ സന്തോഷമാണ് താരം സോഷ്യൽ മീഡിയയിലൂടെ പങ്കുവെച്ചത്. ഒരു പരസ്യ ചിത്രത്തിലൂടെയാണ് ലിസിയുടെ തിരിച്ചുവരവ്. ഈ തിരിച്ചുവരവിനെ കൂടുതൽ പ്രത്യേകമാക്കുന്നത് മകൾ കല്യാണി പ്രിയദർശനും ഇതേ പരസ്യ ചിത്രത്തിന്റെ ഭാഗമാണെന്നതാണ്.

1988-ൽ പുറത്തിറങ്ങിയ എക്കാലത്തെയും ക്ലാസിക് ചിത്രമായ ‘ചിത്ര’ത്തിന് ശേഷം ആദ്യമായാണ് പ്രിയദർശന്റെ സംവിധാനത്തിൽ ലിസി അഭിനയിക്കുന്നത്. കല്യാൺ ജൂവല്ലേഴ്‌സിന്റെ പുതിയ പരസ്യ ചിത്രത്തിലാണ് പ്രിയദർശൻ, ലിസി, കല്യാണി പ്രിയദർശൻ എന്നിവർ ആദ്യമായി ഒരുമിക്കുന്നത്. മുതിർന്ന തമിഴ് നടൻ പ്രഭു ഗണേശനും പരസ്യ ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നുണ്ട്.

ഇൻസ്റ്റഗ്രാമിൽ ചിത്രങ്ങൾ പങ്കുവെച്ചുകൊണ്ടാണ് ലിസി സന്തോഷം പങ്കുവെച്ചത്. “പ്രിയേട്ടനോടൊപ്പം ഞാൻ അവസാനമായി ജോലി ചെയ്തിട്ട് 38 വർഷങ്ങൾ കഴിഞ്ഞിരിക്കുന്നു. ഇപ്പോൾ വീണ്ടും അദ്ദേഹത്തോടൊപ്പം പ്രവർത്തിക്കാൻ കഴിഞ്ഞതിൽ എനിക്ക് അളവറ്റ സന്തോഷമുണ്ട്. ഞങ്ങൾ ഒരുമിച്ച് ചെയ്ത അവസാന ചിത്രം ‘ചിത്രം’ ആയിരുന്നു,” എന്നാണ് ലിസി കുറിച്ചത്.

ഈ പരസ്യ ചിത്രത്തിലെ ഏറ്റവും മനോഹരമായ അനുഭവം യഥാർഥ ജീവിതത്തിലെ മകളായ കല്യാണിയുടെ റീൽ അമ്മയായി അഭിനയിക്കാനായതാണെന്നും ലിസി പറയുന്നു. സെറ്റിലെത്തിയപ്പോൾ പരിഭ്രമമില്ലായിരുന്നുവെന്നും, “എന്റെ ഏറ്റവും നല്ലതും മോശവുമായ ഫേഷ്യൽ ആംഗിളുകൾ വരെ പ്രിയേട്ടന് അറിയാം” എന്ന് പറഞ്ഞപ്പോൾ, പ്രിയദർശൻ തമാശയായി “അവളുടെ ഏറ്റവും നല്ലതും മോശവുമായ സ്വഭാവങ്ങളും എനിക്കറിയാം” എന്ന് മറുപടി പറഞ്ഞതും താരം കുറിപ്പിൽ പങ്കുവെച്ചു.

ഷൂട്ടിങ് സെറ്റ് തനിക്ക് ഓർമ്മകളുടെ വസന്തമായിരുന്നുവെന്നും, സന്തോഷം കൊണ്ട് കണ്ണീരടക്കാൻ പോലും പ്രയാസപ്പെട്ട നിമിഷങ്ങളായിരുന്നുവെന്നും ലിസി പറഞ്ഞു. കല്യാൺ ജൂവല്ലേഴ്‌സിനും പ്രിയദർശനും മകൾ കല്യാണിക്കും നന്ദി അറിയിച്ച താരം, “ജീവിതം ഒരു പൂർണ വൃത്തമായി പൂർത്തിയായതുപോലെ തോന്നുന്നു. നിങ്ങളുടെ സ്നേഹവും പ്രാർത്ഥനയും എപ്പോഴും എനിക്കൊപ്പമുണ്ടാകണം,” എന്നും ആരാധകരോട് അഭ്യർഥിച്ചു.

ലിസിയുടെ ഈ തിരിച്ചുവരവ് സിനിമാപ്രേമികളിലും വലിയ ആവേശമാണ് സൃഷ്ടിച്ചിരിക്കുന്നത്. 1980-കളിൽ മലയാള സിനിമയിൽ ഹിറ്റുകൾ സമ്മാനിച്ച പ്രിയദർശൻ-ലിസി കൂട്ടുകെട്ട് വീണ്ടും ഒന്നിക്കുന്നതും, അതോടൊപ്പം ആദ്യമായി ഒരേ ഫ്രെയിമിൽ ലിസിയും മകൾ കല്യാണി പ്രിയദർശനും എത്തുന്നതുമാണ് ഈ പരസ്യ ചിത്രത്തെ ശ്രദ്ധേയമാക്കുന്നത്.