സൗദി ഹോത്തയിലെ ചരിത്രപ്രസിദ്ധമായ അൽ ഖൽഅ പള്ളി പുനരുദ്ധരിച്ചു

റിയാദ്: സൗദി അറേബ്യയിലെ ചരിത്രപ്രസിദ്ധമായ പള്ളികൾ സംരക്ഷിക്കുന്നതിനായുള്ള പ്രിൻസ് മുഹമ്മദ് ബിൻ സൽമാൻ പദ്ധതിയുടെ ഭാ​ഗമായി റിയാദിലെ ചരിത്രപ്രസിദ്ധമായ അൽ ഖൽഅ പള്ളി പുനരുദ്ധരിച്ചു. ഹോത്താ ബനീ തമീമിൽ സ്ഥിതി ചെയ്യുന്ന ഈ പള്ളി സൗദി അറേബ്യയുടെ സാംസ്കാരികവും ചരിത്രപരവുമായ അടയാളങ്ങളിലൊന്നാണ്.

രണ്ടാം സൗദി ഭരണകൂടത്തിന്റെ സ്ഥാപകൻ ഇമാം തുർക്കി ബിൻ അബ്ദുള്ളയുടെ കോട്ടയ്ക്കുള്ളിലാണ് ഈ പള്ളി സ്ഥിതി ചെയ്യുന്നത്. ഹിജ്റ 1250-ൽ നിർമ്മിക്കപ്പെട്ട ഈ മസ്ജിദ്, നജ്ദി വാസ്തുവിദ്യയുടെ ഉത്തമ ഉദാഹരണമാണ്. കല്ല് പാകിയ അടിത്തറ, മണ്ണും ഇഷ്ടികയും ഉപയോഗിച്ചുള്ള ചുവരുകൾ, ഈന്തപ്പനയോലകളും തമാറിസ്ക് മരത്തടികളും കൊണ്ട് നിർമ്മിച്ച മേൽക്കൂര എന്നിവയാണ് ഇതിന്റെ പ്രത്യേകത. വൃത്താകാരമായ ആകൃതിയിലുള്ള കല്ല് തൂണുകളാണ് പള്ളിയുടെ മേൽക്കൂരയ്ക്ക് താങ്ങായി നിൽക്കുന്നത്.

വിദഗ്ധരായ സൗദി എൻജിനീയർമാരുടെ മേൽനോട്ടത്തിൽ പള്ളിയുടെ തനതായ ശൈലി നിലനിർത്തിക്കൊണ്ട് തന്നെയാണ് നവീകരണം പൂർത്തിയാക്കിയത്. നവീകരണത്തിന് ശേഷം പള്ളിയുടെ വിസ്തൃതി 608.68 ചതുരശ്ര മീറ്ററിൽ നിന്ന് 625.78 ചതുരശ്ര മീറ്ററായി വർധിപ്പിച്ചു. ഇതോടെ ഒരേസമയം 180 പേർക്ക് ഇവിടെ പ്രാർത്ഥന നടത്താനാകും.