ദുബൈ വളരുന്നു; രണ്ടാംഘട്ട അർബൻ മാസ്റ്റർ പ്ലാനിന്​ അനുമതി

ദുബൈയുടെ വികസനകുതിപ്പിന് സഹായിക്കുന്ന ദുബൈ-ടു തൗസന്റ് ഫോർട്ടി അർബൻ മാസ്റ്റർ പ്ലാൻ രണ്ടാം ഘട്ടത്തിന്​ അനുമതി. ഒന്നാം ഘട്ടത്തിന്‍റെ പ്രവർത്തന പുരോഗതി വിലയിരുത്തിയാണ് അനുമതി നൽകിയത്.

യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമാണ്​​ പദ്ധതിക്ക്​ അംഗീകാരം നൽകിയത്​. നഗര കേന്ദ്രങ്ങൾ മെച്ചപ്പെടുത്തൽ, ദുബൈ റിയൽ എസ്റ്റേറ്റ് സ്ട്രാറ്റജി, അർബൻ ഫാമിങ്​ പ്ലാൻ, നഗര പൈതൃക സംരക്ഷണ പദ്ധതി, 20 മിനിറ്റ് സിറ്റി,കാൽനട പാതയുടെ നെറ്റ്‌വർക്ക് മാസ്റ്റർ പ്ലാൻ എന്നിവയുൾപ്പെടെ 10പദ്ധതികളാണ് പ്രഖ്യാപിച്ചത്​. ​

17പദ്ധതികൾ ഉൾപ്പെട്ടതായിരുന്നു ആദ്യഘട്ടം. 2040വരെ ദുബൈയിലെ നഗര അടിസ്ഥാന സൗകര്യ വികസനവും ഭവന നിർമ്മാണ മേഖലയും എങ്ങനെയാകണമെന്ന വ്യക്തമായ കാഴ്ചപ്പാടുണ്ടെന്ന്​ ശൈഖ്​ മുഹമ്മദ്​ ​ പറഞ്ഞു. ദുബൈ നഗരാസൂത്രണത്തിന്‍റെ സുപ്രീം കമ്മിറ്റി ചെയർമാനായ മത്വാർ അൽ തായർ ശൈഖ്​ മുഹമ്മദിന്​ മുമ്പിൽ പദ്ധതി വിശദീകരിച്ചു.

​൨൦൪൦ വരെ ദുബൈയിലെ റിയൽ എസ്റ്റേറ്റ് മേഖലയുടെ ആവശ്യം പരിഗണിച്ച്​ സമഗ്രമായ പദ്ധതിയും പ്ലാൻ നിർദേശിക്കുന്നു​. ഭക്ഷ്യസുരക്ഷ ഉറപ്പാക്കാൻ ഉയർന്ന വിളവ് ലഭിക്കുന്ന രീതിയിൽ നഗര കൃഷിക്ക് അനുയോജ്യമായ സ്ഥലങ്ങൾ കണ്ടെത്തി കൃഷി ചെയ്യാനും മാസ്റ്റർ പ്ലാൻ പദ്ധതിയിടുന്നുണ്ട്​. കാൽനടയായോ സൈക്കിളിലോ 20 മിനിറ്റ് സമയപരിധിക്കുള്ളിൽ താമസക്കാർക്ക് നഗരത്തിലെ 80ശതമാനം സ്ഥലങ്ങളിലും എത്തിച്ചേരാനുള്ള '20 മിനിറ്റ് സിറ്റി' പദ്ധതിയും മാസ്റ്റർ പ്ലാനിന്‍റെ ഭാഗമാണ്​.