ദുബൈ നിരത്തിലേക്ക് കൂടുതൽ ടെസ്ല ടാക്സികൾ; 269 പുതിയ കാറുകൾ ഉൾപ്പെടുത്തി അറേബ്യ ടാക്സി
പരിസ്ഥിതി സൗഹൃദമാക്കുന്നതിന് ഹൈബ്രിഡ്, ഇലക്ട്രിക്, ഹൈഡ്രജന് വാഹനങ്ങളാണ് ടാക്സികളിൽ ഉൾപ്പെടുത്തുന്നത്.
Update: 2023-04-24 19:08 GMT
ദുബൈ: സുസ്ഥിര ഗതാഗത സംവിധാനങ്ങൾ വർധിപ്പിക്കുന്നതിന്റെ ഭാഗമായി ദുബൈ നിരത്തുകളിലേക്ക് കൂടുതൽ ടെസ്ല ടാക്സികൾ എത്തിക്കും. ശൈഖ് മാജിദ് ബിൻ ഹമദ് അല് ഖാസിമിയുടെ ഉടമസ്ഥതയിലുള്ള എക്കണോമിക് ഗ്രൂപ്പ് ഹോള്ഡിങ്സിന്റെ അറേബ്യ ടാക്സി 269 പുതിയ ടെസ്ല മോഡല്-ത്രീ കാറുകളാണ് എത്തിക്കുക.
പരിസ്ഥിതി സൗഹൃദമാക്കുന്നതിന് ഹൈബ്രിഡ്, ഇലക്ട്രിക്, ഹൈഡ്രജന് വാഹനങ്ങളാണ് ടാക്സികളിൽ ഉൾപ്പെടുത്തുന്നത്. യു.എ.ഇയിൽ സ്വകാര്യ ടാക്സി വാഹനങ്ങൾ ഏറ്റവും കൂടുതൽ സ്വന്തമായുള്ളത് എകണോമിക് ഗ്രൂപ്പിനാണ്. 6000 ടാക്സി വാഹനങ്ങളാണ് കമ്പനിക്കുള്ളത്.
നിലവിൽ ദുബൈയിലെ 83 ശതമാനം കാറുകളും പരിസ്ഥിതി സൗഹൃദ ഹൈബ്രിഡ് എഞ്ചിൻ സാങ്കേതിക വിദ്യയിൽ പ്രവര്ത്തിക്കുന്നതാണ്.അതുകൊണ്ടുതന്നെ ഈ രംഗത്ത് ശ്രദ്ധേയമായ പുരോഗതി കൈവരിച്ചതായി എക്കണോമിക് ഗ്രൂപ്പ് ചെയര്മാൻ ശൈഖ് ശൈഖ് മാജിദ് ബിൻ ഹമദ് അല് ഖാസിമി പറഞ്ഞു.
ബാക്കിയുള്ള വാഹനങ്ങളെയും ഇലക്ട്രിക് കാറുകളാക്കി മാറ്റാനാണ് കമ്പനിയുടെ നീക്കം. എമിറേറ്റിലെ ശുചിത്വപൂർണമായ അന്തരീക്ഷം നിലനിർത്താനായി ഹരിതവാഹനങ്ങൾ വർധിപ്പിക്കുന്ന ദുബൈ സർക്കാരിന്റെ പദ്ധതികളെ പ്രോത്സാഹിപ്പിക്കുന്നതാണ് കമ്പനിയുടെ നീക്കമെന്ന്ആർ.ടിഎയിലെ പൊതുഗതാഗത ഏജന്സി സി.ഇ.ഒ അഹ്മദ് ബഹ്റൂസിയൻ പറഞ്ഞു.
അടുത്ത അഞ്ച് വർഷത്തിനുള്ളിൽ എമിറേറ്റിലെ കാര്ബൺ പുറന്തള്ളൽ കുറയ്ക്കാനും വായുവിന്റെ ഗുണനിലവാരം മെച്ചപ്പെടുത്താനുമാണ്ആർ.ടി.എ പദ്ധതികളിലൂടെ ലക്ഷ്യം വയ്ക്കുന്നത്.