അടുത്ത വർഷം ഇന്ത്യയിൽ നടക്കുന്ന ജി-20 ഉച്ചകോടിയിൽ യു.എ.ഇയും ഒമാനും അതിഥി രാജ്യങ്ങളാകും

അടുത്ത വർഷം ഇന്ത്യയിൽ നടക്കുന്ന ജി-20 രാജ്യങ്ങളുടെ ഉച്ചകോടിയിൽ ഗൾഫ്​ മേഖലയിൽ നിന്ന്​ യു.എ.ഇയും ഒമാനും അതിഥി രാജ്യങ്ങളാകും. കഴിഞ്ഞ ദിവസം ഇന്ത്യ തന്നെയാണ്​​ ഇക്കാര്യം വെളിപ്പെടുത്തിയത്​. 2023സെപ്​റ്റംബർ 9,10 തിയ്യതികളിലാണ്​ ഉച്ചകോടി നടക്കുക.

ലോക രാജ്യങ്ങളുടെ സുപ്രധാന കൂട്ടായ്മയായ ജി-20യുടെ അടുത്ത അധ്യക്ഷ സ്ഥാനം അലങ്കരിക്കുന്നത്​ ഇന്ത്യയാണ്​​. ഈ വർഷം ഡിസംബർ മുതൽ അടുത്ത വർഷം നവംബർ വരെയാണ്​ കൂട്ടായ്മയുടെ അധ്യക്ഷ പദവിയിൽ ഇന്ത്യ ഉണ്ടാവുക. യു.എ.ഇ, ഒമാൻ രാജ്യങ്ങളുമായുള്ള അടുത്ത ബന്​ധം കൂടി മുൻനിർത്തിയാണ്​ ഇരു രാജ്യങ്ങളെയും ഇന്ത്യ ഉച്ചകോടിക്ക്​ ക്ഷണിച്ചിരിക്കുന്നത്​.

ബംഗ്ലാദേശ്​, ഈജിപ്ത്​, മൗറീഷ്യസ്​, നെതർലാൻഡ്​സ്​, നൈജീരിയ, സിംഗപ്പൂർ, സ്​പെയിൻ എന്നീ രാജ്യങ്ങളെയും അതിഥികളായി പ​ങ്കെടുപ്പിക്കും. ന്യൂഡൽഹിയിലാണ്​ ഉച്ചകോടി അരങ്ങേറുക. യു.കെ, യു.എസ്.എ, അർജന്‍റീന, ആസ്‌ട്രേലിയ, ബ്രസീൽ, കാനഡ, ചൈന, ഫ്രാൻസ്, ജർമ്മനി, ഉൾപ്പെടെയുള്ള രാജ്യങ്ങളാണ്​​ ഇന്ത്യക്ക്​ പുറമെ ജി-20 കൂട്ടായ്​മയിലുള്ളത്​. ഏഷ്യൻ ഡെവലപ്‌മെന്‍റ്​ ബാങ്ക് ഉൾപ്പെടെയുള്ള സ്​ഥാപനങ്ങളെയും അന്താരാഷ്ട്ര സംഘടനകളെയും ഉച്ചകോടിക്ക്​ ക്ഷണിക്കുമെന്ന്​ വിദേശകാര്യ മന്ത്രി എസ്.ജയ്​ശങ്കർ അറിയിച്ചു. ജി-20രാജ്യങ്ങളാണ്​ ആഗോള ജി.ഡി.പിയുടെ 85 ശതമാനം, അന്താരാഷ്ട്ര വ്യാപാരത്തിന്‍റെ 75 ശതമാനം, ലോക ജനസംഖ്യയുടെ മൂന്നിൽ രണ്ട് ഭാഗം എന്നിവ നിയന്ത്രിക്കുന്നത്​ ജി 20 രാജ്യങ്ങളാണ്​. അന്താരാഷ്ട്ര സാമ്പത്തിക സഹകരണത്തിനുള്ള പ്രധാന ഫോറം എന്ന നിലയിലാണ്​ കൂട്ടായ്മ വിലയിരുത്തപ്പെടുന്നത്​.