യു.എ.ഇ ഇന്ധനവിലയിൽ ഗണ്യമായ കുറവ്: പെട്രോൾ വിലയിൽ 15 ശതമാനം കുറയും
എണ്ണ വില കുറഞ്ഞത് മലയാളികൾ ഉൾപ്പെടെ പ്രവാസികൾക്ക് വലിയ ആശ്വാസമാകും
Update: 2022-12-31 19:16 GMT
ദുബൈ: യുഎഇയിൽ നാളെ മുതൽ പെട്രോൾ വിലയിൽ ഗണ്യമായ കുറവുണ്ടാകും. കഴിഞ്ഞ മാസത്തെ അപേക്ഷിച്ച് ലിറ്ററിന് പതിനഞ്ചു ശതമാനത്തിലേറെയാണ് നിരക്കിളവ്. എണ്ണ വില കുറഞ്ഞത് മലയാളികൾ ഉൾപ്പെടെ പ്രവാസികൾക്ക് വലിയ ആശ്വാസമാകും.
സൂപ്പർ 98 പെട്രോളിന് ലിറ്ററിന് നാളെ 52 ഫിൽസിന്റെ കുറവാണ് ഉണ്ടാവുക. 2 ദിർഹം 78 ഫിൽസായിരിക്കും ഒരു ലിറ്റർപെട്രോളിന്റെ പുതുക്കിയ നിരക്ക്. അതായത് ഡിസംബറിലെ വിലയുമായി
തട്ടിച്ചു നോക്കുമ്പോൾ 15.7 ശതമാനത്തിന്റെ കുറവ്. സൂപ്പർ 95 പെട്രോൾ ലിറ്ററിന്2 ദിർഹം 67 ഫിൽസായിരിക്കും പുതുവർഷം ആദ്യമാസ നിരക്ക്. ഏതാണ്ട് 16 ശതമാനം കുറവാണിത്. ഇ പ്ലസ് പെട്രോളിനും ലിറ്ററിന് 16 ശതമാനത്തിനു മേൽ ജനുവരിയിൽ കുറവുണ്ട്. രണ്ട് ദിർഹം 59 ഫിൽസാണ് ഇ പ്ലസ് പെട്രോൾ വില. ഡീസൽ വിലയിലും ആനുപാതിക കുറവുണ്ട്. 11 മാസത്തെ ഏറ്റവും കുറഞ്ഞ നിരക്കിലാണ് യു.എ.ഇയിൽ ജനുവരിയിലെ ഇന്ധനവില. അന്താരാഷ്ട്ര വിലയുടെ അടിസ്ഥാനത്തിൽ അതാത്മാസത്തെ തോത് കണക്കിലെടുത്താണ് ആഭ്യന്തര വില നിർണയിക്കുക. വില കുറഞ്ഞത് മലയാളികൾ ഉൾപ്പെടെ പ്രവാസികൾക്ക് വലിയ ആശ്വാസമാകും.