'ആരും വിശന്നുറങ്ങേണ്ടിവരില്ല'; 'ബ്രെഡ് ഫോർ ഓൾ' പദ്ധതിയുമായി യു.എ.ഇ
ദിവസവും പാവപ്പെട്ടവർക്കും തൊഴിലാളികൾക്കും സൗജന്യ റൊട്ടി നൽകുന്ന പദ്ധതിയുമായി യു.എ.ഇ
Update: 2022-09-17 18:44 GMT
വിശക്കുന്നവരിലേക്ക് അന്നമെത്തിക്കാൻ പുതിയ പദ്ധതിയുമായി യു.എ.ഇ ഭരണകൂടം. ദിവസവും പാവപ്പെട്ടവർക്കും തൊഴിലാളികൾക്കും സൗജന്യ റൊട്ടി നൽകുന്ന സംവിധാനമാണിത്. 'ബ്രെഡ് ഫോർ ഓൾ'എന്ന പേരിലാണ് പദ്ധതി നടപ്പാക്കുക. യു.എ.ഇയിൽ ആരും വിശന്നുകൊണ്ട് ഉറങ്ങേണ്ടിവരില്ലെന്നാണ് യു.എ.ഇ ഭരണാധികാരികളുടെ പ്രഖ്യാപനം. ഇത് അന്വർഥമാക്കുന്നതാണ് പുതിയ ഭക്ഷണ പദ്ധതി.
ഔഖാഫ് ആൻഡ് മൈനേഴ്സ് അഫയേഴ്സ് ഫൗണ്ടേഷന്റെ കീഴിലുള്ള മുഹമ്മദ് ബിൻ റാശിദ് ഗ്ലോബൽ സെന്റർ ഫോർ എൻഡോവ്മെന്റ് കൺസൾട്ടൻസിയാണ് 'ബ്രെഡ് ഫോർ ഓൾ' സംരംഭം പ്രഖ്യാപിച്ചത്. ഓരോ ദിവസവും വിവിധ സമയങ്ങളിൽ പാവപ്പെട്ടവർക്കും തൊഴിലാളികൾക്കും സൗജന്യ റൊട്ടി നൽകുന്ന സംവിധമാണിത്. വിവിധ ഔട്ട്ലെറ്റുകളിൽ വിന്യസിക്കുന്ന സ്മാർട്ട് മെഷീനുകൾ മുഖേനയാണ് ആവശ്യക്കാർക്ക് ഫ്രഷ് ബ്രഡുകൾ നൽകുക. പദ്ധതിയിലൂടെ ചാരിറ്റി പ്രവർത്തനത്തിന്റെ ആധുനികവും സുസ്ഥിരവുമായ മാതൃക കാണിച്ചു കൊടുക്കുക കൂടിയാണ് യു.എ.ഇ.
അൽ മിസ്ഹാർ, അൽ വർഖ, മിർദിഫ്, നാദ് അൽ ഷെബ, നദ്ദ് അൽ ഹമർ, അൽ ഖൗസ്, അൽ ബദാഅ എന്നിവിടങ്ങളിലെ സൂപ്പർമാർക്കറ്റുകളിലാണ് സ്മാർട്ട് മെഷീനുകൾ സ്ഥാപിക്കുക. മിഷീനിലെ 'ഓർഡർ' ബട്ടൻ അമർത്തിയാൽ അൽപ സമയത്തിനകം ബ്രഡ് ലഭിക്കുന്ന രീതിയിലാണ് സംവിധാനം. പദ്ധതിയിലേക്ക് സംഭാവന നൽകാനും മെഷീനിൽ സൗകര്യമുണ്ട്. ഇതിന് പുറമെ 'ദുബൈ നൗ' ആപ്പ് വഴിയും എസ്.എം.എസ് ചെയ്തും സംഭാവന നൽകാവുന്നതാണ്. 10 ദിർഹം സംഭാവന ചെയ്യാൻ 3656 എന്ന നമ്പറിലേക്കാണ് എസ്.എം.എസ് ചെയ്യേണ്ടത്