'യുനൈറ്റഡ്​ ഗ്ലോബൽ എമിറേറ്റ്​സ്'; ആഗോള നിക്ഷേപകരെ സ്വാഗതം ചെയ്​ത്​ യു.എ.ഇ

നിക്ഷേപകരെയും പ്രതിഭകളെയും യു.എ.ഇയിലേക്ക്​ സ്വാഗതം ചെയ്യുന്ന കാമ്പയിന്​ തുടക്കം കുറിച്ച്​ രാഷ്​ട്ര നേതാക്കൾ. 'യുനൈറ്റഡ്​ ഗ്ലോബൽ എമിറേറ്റ്​സ്' എന്ന ശീർഷകത്തിലായിരിക്കും കാമ്പയിൻ. ലോകത്തെ 190 രാജ്യങ്ങളിൽ നിന്നുള്ളവർക്ക്​ വളരാനും വികസിക്കാനും യു.എ.ഇയിലൂടെ സാധിക്കുമെന്ന്​ പ്രചരിപ്പിക്കുകയുമാണ്​ കാമ്പയിൻ ലക്ഷ്യം.

നിക്ഷേപകർക്ക്​ യു.എ.ഇ വാഗ്​ദാനം ചെയ്യുന്ന ആനുകൂല്യങ്ങളും പ്രോത്സാഹനവും ഉയർത്തിക്കാണിക്കുന്ന അന്താരാഷ്ട്ര തലത്തിലുള്ള പ്രചാരണമായിരിക്കും നടക്കുക.​ യു.എ.ഇ വൈസ്​ പ്രസിഡന്‍റും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം ആണ്​ കാമ്പയിൻ പ്രഖ്യാപനം​ ട്വിറ്റർ മുഖേന നടത്തിയത്​. 'ഞങ്ങളുടെ വേരുകൾ അറബാണ്​, എന്നാൽ അഭിലാഷങ്ങൾ ആഗോളമാണ്​. ആശയങ്ങൾ യാഥാർത്ഥ്യമാക്കാൻ ലോകമെമ്പാടുമുള്ള പ്രതിഭകളെ ക്ഷണിക്കുന്നു' -ശൈഖ്​ മുഹമ്മദ്​ പറഞ്ഞു.

അബൂദബി കിരീടാവകാശിയും യു.എ.ഇ സായുധ സേനയുടെ ഡെപ്യൂട്ടി സുപ്രീം കമാൻഡറുമായ ശൈഖ്​ മുഹമ്മദ്​ ബിൻ സായിദ്​ ആൽ നെഹ്​യാനും വിശാലമായ കാമ്പയിൻ ട്വിറ്ററിലൂടെ പ്രഖ്യാപിച്ചു. അടുത്ത 50 വർഷത്തിനിടയിൽ ഏറ്റവും കരുത്തുറ്റ ആഗോള സമ്പദ്​ വ്യവസ്​ഥകളിലൊന്നാവുക എന്നതാണ് പുതിയ പ്രചാരണ ലക്ഷ്യമെന്ന്​ അദ്ദേഹം വ്യക്​തമാക്കി. കാമ്പയിൻ പ്രഖ്യാപിച്ച്​ പുറത്തിറക്കിയ വീഡിയോയിൽ ഇമാറാത്തിനെ 'അവസരങ്ങളുടെ ഭൂമി' എന്നാണ്​ പ്രകീർത്തിക്കുന്നത്​.​ രാജ്യത്തി​ന്‍റെ ബഹിരാകാശ നേട്ടങ്ങളും ​ചൊവ്വാ ദൗത്യവും ഇതിൽ പരാമർശിക്കുന്നുണ്ട്​.