ന്യൂഡൽഹി: ഡൽഹിയിൽ യുവ ജഡ്ജിയെ മരിച്ച നിലയിൽ കണ്ടെത്തി. സഫ്ദർജംഗ് ഏരിയയിൽ താമസിക്കുന്ന യുവ ജഡ്ജി അമൻ കുമാർ ശർമ്മ(30)യെ മരിച്ച നിലയിൽ കണ്ടെത്തിയത്. ആത്മഹത്യയാണെന്നാണ് പ്രാഥമിക നിഗമനം. വീടിനുള്ളിൽ തൂങ്ങിമരിച്ച നിലയിലാണ് അദ്ദേഹത്തിന്റെ മൃതദേഹം കണ്ടെത്തിയത്. ശനിയാഴ്ച വൈകീട്ടാണ് പൊലീസിന് വിവരം ലഭിച്ചത്. ഉടൻ പൊലീസ് സംഘം സ്ഥലത്തെത്തി ഇൻക്വസ്റ്റ് നടപടികൾ ആരംഭിച്ചു.
മൃതദേഹം പോസ്റ്റ്മോർട്ടത്തിനായി അയച്ചിരിക്കുകയാണെന്നും സംഭവത്തിൽ വിശദമായ അന്വേഷണം നടക്കുകയാണെന്നും പൊലീസ് ഉദ്യോഗസ്ഥർ അറിയിച്ചു. 2021 ജൂൺ 19-നാണ് അമൻ കുമാർ ശർമ്മ ഡൽഹി ജുഡീഷ്യൽ സർവീസിൽ ചേർന്നത്. പൂനെയിലെ സിംബയോസിസ് ലോ സ്കൂളിൽ നിന്ന് നിയമബിരുദം നേടിയ അദ്ദേഹം 2018-ലാണ് എൽഎൽബി പൂർത്തിയാക്കിയത്.
2025 ഒക്ടോബർ 18 മുതൽ കർക്കർദൂമ കോടതിയിലെ നോർത്ത്-ഈസ്റ്റ് ഡിസ്ട്രിക്റ്റ് ലീഗൽ സർവീസസ് അതോറിറ്റി ഫുൾടൈം സെക്രട്ടറിയായി സേവനമനുഷ്ഠിച്ചു വരികയായിരുന്നു. ഭാര്യയും രണ്ട് മക്കളുമുണ്ട്. ഒരു കുഞ്ഞിന് 9 മാസത്തിൽ താഴെയാണ് പ്രായം. ഭാര്യയും ജഡ്ജിയാണ്.