ഏഴ് ദിവസത്തെ നിരന്തര ശ്രമം; ഒടുവിൽ മാധ്യമ പ്രവർത്തകർക്കെതിരായ എഫ്‌ഐആർ പുറത്തുവിട്ട് ദി വയർ

ന്യൂഡൽഹി: മുതിർന്ന മാധ്യമപ്രവർത്തകരായ സിദ്ധാർഥ് വരദരാജനും കരൺ താപ്പറിനുമെതിരെ അസം പൊലീസ് രജിസ്റ്റർ ചെയ്ത എഫ്‌ഐആർ ലഭിച്ചത് ഏഴ് ദിവസത്തെ നിരന്തര ശ്രമത്തിനൊടുവിലെന്ന് ദി വയർ റിപ്പോർട്ട്. ഗുവാഹത്തി ക്രൈം ബ്രാഞ്ച് ആഗസ്റ്റ് 12ന് ഇവർക്ക് സമൻസ് അയച്ചിരുന്നെങ്കിലും എഫ്‌ഐആറിന്റെ വിശദാംശങ്ങൾ വെളിപ്പെടുത്തിയിരുന്നില്ല. ആഗസ്റ്റ് 14ന് സിദ്ധാർഥ് വരദരാജനും ആഗസ്റ്റ് 18ന് കരൺ താപ്പറിനും ലഭിച്ച സമൻസിൽ ഭാരതീയ ന്യായ സംഹിതയിലെ (ബിഎൻഎസ്) 152, 196, 197(1)(ഡി)/3(6), 353, 45, 61 വകുപ്പുകൾ പ്രകാരമാണ് കേസ് രജിസ്റ്റർ ചെയ്തിരിക്കുന്നത്. ഈ വകുപ്പുകൾ രാജ്യത്തിന്റെ പരമാധികാരവും ഐക്യവും അപകടപ്പെടുത്തൽ, മതം, വർഗം, ഭാഷ എന്നിവയുടെ അടിസ്ഥാനത്തിൽ വിദ്വേഷം പ്രോത്സാഹിപ്പിക്കൽ, ദേശീയ ഐക്യത്തിന് ഹാനികരമായ പ്രസ്താവനകൾ, പൊതുസമൂഹത്തിന് ദോഷം വരുത്തുന്ന പ്രവൃത്തികൾ, ഗൂഢാലോചന തുടങ്ങിയ കുറ്റങ്ങൾ ഉൾപ്പെടുന്നു. എന്നാൽ എഫ്‌ഐആറിന്റെ പകർപ്പ് സമൻസിനൊപ്പം നൽകിയിട്ടില്ലെന്ന് ദി വയർ ആരോപിച്ചു.

കർണാടക ഹൈക്കോടതിയുടെ ഒരു വിധി പ്രകാരം എഫ്‌ഐആറിന്റെ പകർപ്പ് നൽകാതെ പൊലീസ് സമൻസ് അയക്കുന്നത് അസാധുവാണെന്ന് വ്യക്തമാക്കിയിട്ടുണ്ട്. ഗുവാഹത്തിയിലെ ദി വയറിന്റെ നിയമ പ്രതിനിധികൾ മജിസ്‌ട്രേറ്റ് കോടതിയിൽ എഫ്‌ഐആർ ലഭ്യമല്ലെന്ന് വാദിച്ചു. അസമിലെ മാധ്യമപ്രവർത്തകർക്കും പൊലീസിൽ നിന്ന് കേസിന്റെ വിശദാംശങ്ങൾ ലഭിച്ചിട്ടില്ല. സിദ്ധാർഥ് വരദരാജനും കരൺ താപ്പറും സമൻസിനോട് പ്രതികരിച്ചുകൊണ്ട് അന്വേഷണവുമായി സഹകരിക്കാൻ തയ്യാറാണെന്ന് അറിയിച്ചിട്ടുണ്ട്. എന്നാൽ എഫ്‌ഐആറിന്റെ ഉള്ളടക്കം ലഭ്യമാക്കാതെ അന്വേഷണത്തിനായി ചോദ്യം ചെയ്യലിന് ഹാജരാകാൻ കഴിയില്ലെന്ന് അവർ വ്യക്തമാക്കി. 'നിയമപരമായ അന്വേഷണത്തിന്റെ വിശദാംശങ്ങൾ അറിയാതെ ചോദ്യങ്ങൾക്ക് ഉത്തരം നൽകുമെന്ന് പ്രതീക്ഷിക്കുന്നത് യുക്തിരഹിതമാണ്.' അവരുടെ മറുപടിയിൽ പറയുന്നു.

ജൂൺ 28ന് ദി വയർ പ്രസിദ്ധീകരിച്ച "'IAF Lost Fighter Jets to Pak Because of Political Leadership’s Constraints’: Indian Defence Attache'' എന്ന ലേഖനത്തെ അടിസ്ഥാനമാക്കി ഒരു ബിജെപി നേതാവ് നൽകിയ പരാതിയെ തുടർന്നാണ് കേസ്. 'മാധ്യമങ്ങളെ നിശബ്ദമാക്കാനുള്ള വൈരാഗ്യപരമായ ശ്രമം' എന്നാണ് പ്രസ് ക്ലബ് ഓഫ് ഇന്ത്യയും ഇന്ത്യൻ വിമൻസ് പ്രസ് കോർപ്‌സും മാധ്യമ പ്രവർത്തകർക്കെതിരായ സമൻസിനോട് പ്രതികരിച്ചത്. ബിഎൻഎസിന്റെ 152-ാം വകുപ്പ് 2022ൽ സുപ്രിം കോടതി സസ്‌പെൻഡ് ചെയ്ത രാജ്യദ്രോഹ നിയമത്തിന്റെ (ഐപിസി 124എ) പുനർനാമകരണം ചെയ്ത രൂപമാണെന്നും ഇത് മാധ്യമങ്ങളെ ലക്ഷ്യമിടാൻ ഉപയോഗിക്കപ്പെടുന്നുവെന്നും അവർ ആരോപിച്ചു. ദി വയർ ഈ വകുപ്പിന്റെ ഭരണഘടനാപരമായ സാധുതയെ ചോദ്യം ചെയ്ത് സുപ്രിം കോടതിയിൽ ഒരു റിട്ട് ഹർജി സമർപ്പിച്ചിട്ടുണ്ട്. ഈ സാഹചര്യത്തിൽ മാധ്യമ സ്വാതന്ത്ര്യത്തിന് ഭീഷണിയായ ഈ 'ദുഷ്‌കര' നിയമം പിൻവലിക്കണമെന്ന് പ്രസ് ഓർഗനൈസേഷനുകൾ ആവശ്യപ്പെട്ടു.