ന്യൂഡല്ഹി: ബംഗാള് തീവ്ര വോട്ടര്പട്ടിക പരിഷ്കരണത്തില് നിര്ണായക ഇടപെടലുമായി സുപ്രിംകോടതി. അപ്പീല് ട്രൈബ്യൂണലുകള് രൂപീകരിക്കണമെന്ന് സുപ്രിംകോടതി നിര്ദേശിച്ചു. വോട്ടര്പട്ടികയിലെ ഒഴിവാക്കലുകള്ക്കെതിരെയുള്ള അപ്പീലുകള് ഈ ട്രൈബ്യൂണലുകള് കേള്ക്കും.
ബംഗാളിലെ തീവ്ര വോട്ടര് പരിഷ്കരണവുമായി ബന്ധപ്പെട്ട ഹരജികള് പരിഗണിക്കുന്നതിനിടെയാണ് സുപ്രിംകോടതിയുടെ നിർണായക ഇടപെടൽ. അപ്പീല് ട്രൈബ്യൂണലുകള് രൂപീകരിക്കാനാണ് നിര്ദേശം. നിലവില് വോട്ടര്പട്ടികയില് നിന്ന് ഒഴിവാക്കപ്പെട്ടവര്ക്ക് തുടര്നടപടികള്ക്കായി ട്രൈബ്യൂണലുകളെ സമീപിക്കാമെന്നും അവരുടെ പരാതികള് ട്രൈബ്യൂണലുകള് കേള്ക്കണമെന്നും സുപ്രിംകോടതി നിര്ദേശം നല്കിയിട്ടുണ്ട്.
അപ്പീല് കേള്ക്കാന് സ്വതന്ത്രമായൊരു സംവിധാനത്തിന്റെ അഭാവം നിലവിലുണ്ടെന്ന് ബംഗാള് സര്ക്കാരും കേസുമായി ബന്ധപ്പെട്ട് ഹരജി നല്കിയവരും നേരത്തെ കോടതിയെ അറിയിച്ചിരുന്നു. ഈ ആശങ്കകള് കൂടി പരിഗണിച്ചുകൊണ്ടാണ് സുപ്രിംകോടതിയുടെ ഇടപെടല്. ബംഗാളിലെ വോട്ടര്പട്ടികയില് വ്യാപകമായ ക്രമക്കേടുകള് നടക്കുന്നുവെന്ന് പ്രതിപക്ഷം ആരോപണമുന്നയിച്ചിരുന്നു.