ദനം നാഗേന്ദർ
ഹൈദരാബാദ്: ഡല്ഹി മദ്യനയ അഴിമതിക്കേസുമായി ബന്ധപ്പെട്ട് ബി.ആര്.എസ് നേതാവും തെലങ്കാന മുഖ്യമന്ത്രി കെ.ചന്ദ്രശേഖര് റാവുവിന്റെ മകളുമായ കെ.കവിതയെ ഇ.ഡി ചോദ്യം ചെയ്യുന്നതില് പ്രതികരണവുമായി ബി.ആര്.എസ് എം.എല്.എ. ഉചിതമായ സമയത്ത് ബി.ജെ.പിയെ പാഠം പഠിപ്പിക്കുമെന്ന് ദനം നാഗേന്ദർ പറഞ്ഞു.
''ഇത് തികച്ചും വ്യക്തമായ കാര്യമാണ്. ബി.ജെ.പി സർക്കാരിന്റെ പ്രതികാര നടപടികളെ കുറിച്ച് ജനങ്ങൾക്ക് നല്ല ബോധ്യമുണ്ട്.ബി.ജെ.പിയുടെയും കേന്ദ്ര സർക്കാരിന്റെയും മുഖപത്രമായാണ് ഇ.ഡി പ്രവർത്തിക്കുന്നത്. ഇത് അന്യായമാണ്. തനിക്ക് ഇതിലൊന്നും പങ്കില്ലെന്നും ഈ മദ്യവ്യാപാരവുമായി തനിക്ക് ഒരു തരത്തിലും ബന്ധമില്ലെന്നും അവർ (കവിത) ഇന്നലെ വ്യക്തമാക്കിയിരുന്നു.'' നാഗേന്ദര് എ.എന്.ഐയോട് പറഞ്ഞു. "എക്സ്, വൈ അല്ലെങ്കിൽ ഇസഡ് ആരെങ്കിലും അവളുടെ പേര് പരാമർശിച്ചാൽ, അവർക്ക് (ഇ.ഡി) അത് ഗൂഢാലോചനയായി കണക്കാക്കാനാവില്ല.ഓരോ തവണയും അവൾ ഒരു നിശ്ചിത സമയ പരിധി സൂചിപ്പിക്കാൻ ഇ.ഡിയോട് അഭ്യർത്ഥിക്കുന്നു എന്നതാണ് പ്രധാന കാര്യം. എന്നിട്ടും ഇന്നലെയും രാത്രി 10 മണിയോടെ അവൾ പുറത്തിറങ്ങി. ബി.ആർ.എസ് പാർട്ടി പിന്നോട്ട് പോകില്ല, ഏത് പ്രത്യാഘാതവും നേരിടാൻ ഞങ്ങൾ തയ്യാറാണ്. ഉചിതമായ സമയത്ത് ഞങ്ങൾ തീർച്ചയായും ബി.ജെ.പിയെ പാഠം പഠിപ്പിക്കും.'' നാഗേന്ദര് കൂട്ടിച്ചേര്ത്തു.
മദ്യനയക്കേസുമായി ബന്ധപ്പെട്ട് കവിതയെ ഇന്നലെ ഇ.ഡി പത്ത് മണിക്കൂറോളം ചോദ്യം ചെയ്തിരുന്നു. ഇത് മൂന്നാം തവണയാണ് കവിതയെ ചോദ്യം ചെയ്യുന്നത്. താനിതുവരെ ഉപയോഗിച്ച എല്ലാ ഫോണുകളും ഇ.ഡിക്ക് സമര്പ്പിച്ചതായി കവിത വ്യക്തമാക്കിയിരുന്നു.