മലപ്പുറം: എടപ്പാൾ നഗരത്തിലെ പൊട്ടിത്തെറിയുമായി ബന്ധപ്പെട്ട് ഇരു ചക്ര വാഹനത്തിലെത്തിയ രണ്ട് പേർ സ്ഫോടക വസ്തു പൊട്ടിക്കുന്ന സിസി ടിവി ദൃശ്യങ്ങൾ മീഡിയവണിന് ലഭിച്ചു . എടപ്പാൾ മേൽപാലത്തിന് താഴെ റൗണ്ട് എബൗട്ടിന് സമീപം ഇന്നലെ വൈകിട്ടാണ് പൊട്ടിത്തെറിയുണ്ടായത്.
ഇരുചക്ര വാഹനത്തിൽ എത്തിയ രണ്ട് പേർ അൽപ നേരം റൌണ്ട് എ ബൗട്ടില് വാഹനം നിർത്തിയ ശേഷമാണ് , കോൺക്രീറ്റ് മതിലിൽ സ്ഫോടക വസ്തു വെച്ചത് . പിന്നീട് സ്ഫോടക വസ്തുവിന് തീ കൊളുത്തുന്നതും ദൃശ്യങ്ങളിൽ കാണാം. പട്ടാമ്പി ഭാഗത്ത് നിന്ന് എടപ്പാളിലേക്കുള്ള റോഡിലാണ് ഇരു ചക്ര വാഹനത്തിലുള്ളവർ എത്തിയത് .സ്ഫോടക വസ്തു പൊട്ടിച്ച ശേഷം ഇവർ പൊന്നാനി ഭാഗത്തേക്കുള്ള റോഡിലേക്ക് പോയി.
പൊട്ടിത്തെറിയിൽ റൗണ്ട് എബൗട്ടിന്റെ കോൺക്രീറ്റിൽ പൊട്ടലുണ്ടായി . സിസി ടിവി ദൃശ്യങ്ങൾ പൊലീസ് വിശദമായി പരിശോധിക്കുകയാണ് .സ്ഫോടകവസ്തുവിന്റേതെന്ന് കരുതുന്ന പ്ലാസ്റ്റിക് വസ്തുക്കൾ സമീപത്ത് നിന്ന് ലഭിച്ചിട്ടുണ്ട് .ഇന്നലെ വൈകിട്ട് 07:15 ഓടെയാണ് പൊട്ടിത്തെറിയുണ്ടായത് . ഈ സമയം വലിയ ശബ്ദമുണ്ടായതായി പ്രദേശത്തുണ്ടായിരുന്നവർ പറഞ്ഞു.