റെൻഡർ കേരള ഡിസൈൻ ഫെസ്റ്റിവലിന്റെ രണ്ടാം ദിനത്തിൽ ലേക്ക് വ്യൂ വേദിയിൽ അരങ്ങേറിയ സി.കെ. സാദിഖ് ഗസലിന്റെ സംഗീതസന്ധ്യ
കൊച്ചി: കൊച്ചി തേവര സേക്രഡ് ഹാർട്ട് കോളേജിലെ ലേക്ക് വ്യൂ വേദിയിൽ നടന്ന ഗസൽ സംഗീതസന്ധ്യയാണ് റെൻഡർ കേരള ഡിസൈൻ ഫെസ്റ്റിവലിന്റെ രണ്ടാം ദിനത്തെ ആകർഷകമാക്കി മാറ്റിയത്. പ്രശസ്ത ഗസൽ ഗായകനും പ്ലേബാക്ക് സിംഗറുമായ സി.കെ സാദിഖ് ഗസൽ അവതരിപ്പിച്ച ലൈവ് സംഗീത പരിപാടി കലയും ഡിസൈനും ഒരേ വേദിയിൽ ലയിച്ച അപൂർവ അനുഭവമായി.
ക്ലാസിക്കൽ ഗസലുകളും സമകാലിക ആവിഷ്കരണങ്ങളും ഉൾപ്പെടുത്തിയ സംഗീതസന്ധ്യയിൽ സാദിഖ് അവതരിപ്പിച്ച ഗാനങ്ങൾ പ്രേക്ഷകരെ ദീർഘനേരം ആസ്വാദനലോകത്തേക്ക് കൊണ്ടുപോയി. ലേക്ക് വ്യൂവിന്റെ സ്വാഭാവിക പശ്ചാത്തലത്തിൽ അരങ്ങേറിയ പരിപാടി, ഡിസൈൻ ഫെസ്റ്റിവലിന് ഒരു സാംസ്കാരിക മികവിന്റെ മേന്മ കൂടി നൽകി.
ഫെസ്റ്റിവലിന്റെ ഭാഗമായി നടന്ന മറ്റൊരു ശ്രദ്ധേയ പരിപാടിയായിരുന്നു സിനിമാ പോസ്റ്റർ ഡിസൈനർമാരുടെ സംവാദം. മലയാള സിനിമയുടെ വിപണനത്തിലും കലാപരമായ വളർച്ചയിലും നിർണായക പങ്കുവഹിക്കുന്ന പോസ്റ്റർ ഡിസൈനർമാർക്ക് സംസ്ഥാന ചലച്ചിത്ര അവാർഡുകളിൽ പ്രത്യേക പ്രാതിനിധ്യം നൽകണമെന്ന ആവശ്യം ചർച്ചയിൽ ശക്തമായി ഉയർന്നു. ഫെഫ്ക അംഗങ്ങളായ എം. സജീഷ്, ആന്റണി സ്റ്റീഫൻ, ഇലുമിനാർട്ടിസ്റ്റ് ക്രിയേറ്റീവ്സ് സി.ഇ.ഒ ആനന്ദ് രാജേന്ദ്രൻ, ഫെഫ്ക പബ്ലിസിറ്റി ഡിസൈനേഴ്സ് യൂണിയൻ ജനറൽ സെക്രട്ടറി ജിസ്സൻ പോൾ എന്നിവർ സംവാദത്തിൽ പങ്കെടുത്തു.
ഒരു സിനിമയുടെ ഉള്ളടക്കവും ആത്മാവും പ്രേക്ഷകനിലേക്ക് എത്തിക്കുന്ന ആദ്യ ദൃശ്യഭാഷയാണ് പോസ്റ്ററെന്നും, അത് വെറും പരസ്യമല്ല, സ്വതന്ത്രമായ കലാരൂപമാണെന്നും പാനൽ വ്യക്തമാക്കി. മലയാള സിനിമയിലെ ടൈപ്പോഗ്രാഫിയിലൂടെ കഥയുടെ സൂചനകൾ ഒളിപ്പിച്ചുവെക്കുന്ന ‘ഈസ്റ്റർ എഗ്ഗ്’ ശൈലിയും, ആർട്ടിഫിഷ്യൽ ഇന്റലിജൻസ് മനുഷ്യ സൃഷ്ടിപരമായ ചിന്തയ്ക്ക് പകരമാകില്ലെന്നും, അത് ഒരു സഹായ ഉപകരണമാത്രമാണെന്നും ചർച്ചയിൽ അഭിപ്രായപ്പെട്ടു.
വിദ്യാർഥികൾക്കും യുവകലാകാരർക്കുമായി ഗ്രാഫിറ്റി വർക് ഷോപ്പ് ഉൾപ്പെടെ നിരവധി കൈമുറ ശില്പശാലകളും ഫെസ്റ്റിവലിന്റെ രണ്ടാം ദിനത്തിൽ സംഘടിപ്പിച്ചു. പ്രശസ്ത ഗ്രാഫിറ്റി ആർട്ടിസ്റ്റ് ലെഫ്റ്റ് നയിച്ച വർക്ക്ഷോപ്പിൽ സ്ട്രീറ്റ് ആർട്ടിന്റെ സാമൂഹിക പ്രാധാന്യവും, പൊതു ഇടങ്ങളിലെ ദൃശ്യസംവാദത്തിന്റെ സാധ്യതകളും വിശദീകരിച്ചു.
ഇതോടൊപ്പം അപ്സ്കില്ലിംഗ് വർക്ക്ഷോപ്പ്, അഭിനയ വർക്ക്ഷോപ്പ്, കൊറിയോഗ്രഫി വർക്ക്ഷോപ്പ് എന്നിവയും സംഘടിപ്പിച്ച് വിദ്യാർഥികൾക്കും യുവപ്രതിഭകൾക്കും പ്രായോഗിക പരിശീലനത്തിനുള്ള അവസരങ്ങൾ ഫെസ്റ്റിവൽ ഒരുക്കി. സംഗീതം, സിനിമ, ഡിസൈൻ, സ്ട്രീറ്റ് ആർട്ട്, പ്രകടനകലകൾ എന്നിവ ഒരേ വേദിയിൽ സംഗമിച്ച റെൻഡർ കേരള ഡിസൈൻ ഫെസ്റ്റിവലിന്റെ രണ്ടാം ദിനം, കലാപരമായ സംവാദങ്ങളുടെയും സാംസ്കാരിക ആഘോഷത്തിന്റെയും ശക്തമായ ഉദാഹരണമായി മാറി.