പാലക്കാട് കാർ പൊട്ടിത്തെറിച്ച് പൊള്ളലേറ്റ രണ്ട് കുട്ടികളും മരിച്ചു; അമ്മ ഗുരുതരാവസ്ഥയിൽ
പൊല്പ്പുള്ളി അത്തിക്കോട് പൂളക്കാട്ടില് പരേതനായ മാര്ട്ടിന്-എല്സി ദമ്പതിമാരുടെ മക്കളായ എമിലീന മാർട്ടിൻ , ആൽഫ്രഡ് എന്നിവരാണ് മരിച്ചത്
Update: 2025-07-12 10:52 GMT
പാലക്കാട്: കാർ പൊട്ടിത്തെറിച്ചുണ്ടായ അപകടത്തിൽ പൊള്ളലേറ്റ രണ്ട് കുട്ടികൾ മരിച്ചു. പൊല്പ്പുള്ളി അത്തിക്കോട് പൂളക്കാട്ടില് പരേതനായ മാര്ട്ടിന്-എല്സി ദമ്പതിമാരുടെ മക്കളായ എമിലീന മാർട്ടിൻ , ആൽഫ്രഡ് എന്നിവരാണ് മരിച്ചത്. കൊച്ചിയിലെ സ്വകാര്യ ആശുപത്രിയിൽ ചികിത്സയിലായിരുന്നു.
ചിറ്റൂർ അത്തിക്കോട്ടിലിൽ ഇന്നലെയാണ് അപകടമുണ്ടായത്. അപകടത്തില് മാരകമായി പൊള്ളലേറ്റ എല്സിയും എറണാകുളത്തെ ആശുപത്രിയില് ചികിത്സയിലാണ്.
വെള്ളിയാഴ്ച വൈകീട്ട് അഞ്ചുമണിയോടെയാണ് കാര് പൊട്ടിത്തെറിച്ച് അപകടമുണ്ടായത്. വീടിനു മുന്നില് നിര്ത്തിയിട്ട കാര് സ്റ്റാര്ട്ട് ചെയ്യുന്നതിനിടെ വലിയ ശബ്ദത്തോടെ തീപിടിക്കുകയായിരുന്നു.
പാലക്കാട്ടെ സ്വകാര്യ ആശുപത്രിയില് നഴ്സായ എല്സി ജോലികഴിഞ്ഞ് തിരിച്ചെത്തി വീടിനുമുന്നില് കാര് നിര്ത്തിയിട്ടിരുന്നു. ഒരുമണിക്കൂറിനുശേഷം മക്കള്ക്കൊപ്പം പുറത്തുപോകാനായി കാറില്ക്കയറി സ്റ്റാര്ട്ട് ചെയ്യുന്നതിനിടെ തീ പിടിക്കയായിരുന്നു. കുട്ടികളെ രക്ഷിക്കാന് ശ്രമിക്കുന്നതിനിടെയാണ് എല്സിയുടെ അമ്മ ഡെയ്സിക്കും പൊള്ളലേറ്റു. എല്സിയുടെ ഭര്ത്താവ് മാര്ട്ടിന് ഒന്നരമാസംമുമ്പാണ് കാന്സര് ബാധിതനായി മരിച്ചത്.
Watch Video