മീഡിയവൺ വിലക്ക് റദ്ദാക്കിയ വിധി മാധ്യമസ്വാതന്ത്ര്യത്തിന്റെ വിജയം: ജോൺ ബ്രിട്ടാസ്‌

മീഡിയാവൺ വിലക്ക് റദ്ദാക്കിയ സുപ്രിംകോടതി വിധി മാധ്യമ സ്വാതന്ത്ര്യത്തിന്റെ വിജയമാണെന്ന് ജോൺ ബ്രിട്ടാസ് എം.പി. അനാവശ്യ നിയന്ത്രണങ്ങളിൽ നിന്നും അഭിപ്രായ സ്വാതന്ത്ര്യത്തെ വെട്ടിച്ചുരുക്കുന്നതിൽ നിന്നും മാധ്യമങ്ങളെ സംരക്ഷിക്കേണ്ടത് നിർണായകമാണെന്നും അദ്ദേഹം ട്വിറ്ററിൽ കുറിച്ചു. ദേശീയ സുരക്ഷ സംബന്ധിച്ച വാദങ്ങൾ വിശ്വസനീയമായ കാരണങ്ങളെ അടിസ്ഥാനമാക്കിയുള്ളതായിരിക്കണമെന്നും വായുവിൽ നിന്ന് സൃഷ്ടിച്ചതാകരുതെന്നും ജോൺ ബ്രിട്ടാസ് വ്യക്തമാക്കി. 

2022 ജനുവരി 31ന് സുരക്ഷാ കാരണങ്ങൾ ചൂണ്ടിക്കാട്ടി കേന്ദ്രസർക്കാർ ഏർപ്പെടുത്തിയ വിലക്കാണ് സുപ്രിംകോടതി റദ്ദാക്കിയത്. കേന്ദ്രനടപടി ശരിവെച്ച ഹൈക്കോടതി ഉത്തരവും സുപ്രിംകോടതി റദ്ദാക്കി. സർക്കാർ നയങ്ങൾക്ക് എതിരായ വാർത്തകളുടെ പേരിൽ മീഡിയവൺ രാജ്യവിരുദ്ധമാണ് എന്ന് പറയാൻ പറ്റില്ല. ഇങ്ങനെ പറയുന്നത് മാധ്യമങ്ങൾ എപ്പോഴും സർക്കാരിനെ പിന്തുണയ്ക്കണമെന്ന ധാരണ സൃഷ്ടിക്കും. ഇത് അഭിപ്രായ സ്വാതന്ത്ര്യം അനുവദിക്കുന്ന ഭരണഘടനാ അവകാശത്തിന് വിരുദ്ധമാണ്. ആരോഗ്യകരമായ ജനാധിപത്യത്തിന് സ്വതന്ത്ര മാധ്യമങ്ങൾ അനിവാര്യമാണ്. കടുത്ത യാഥാർഥ്യങ്ങളെക്കുറിച്ചും പൗരൻമാരെ അറിയിക്കേണ്ട ബാധ്യത മാധ്യമങ്ങൾക്കുണ്ടെന്നും സുപ്രിംകോടതി വ്യക്തമാക്കി.

അധിക്ഷേപകരവും നിരുത്തരവാദപരവുമായ രീതിയിലാണ് കേന്ദ്ര സർക്കാർ മീഡിയവൺ കേസിൽ രാജ്യസുരക്ഷാ പ്രശ്നം ഉന്നയിച്ചത്. രാജ്യസുരക്ഷാ പ്രശ്നം അടിസ്ഥാന രഹിതമായി ഉന്നയിക്കാവുന്നതല്ല. അതിന് മതിയായ തെളിവുകളുടെ പിൻബലം വേണം. മീഡിയവണിന്റെ രാജ്യവിരുദ്ധതയുടെ തെളിവിന് കേന്ദ്ര സർക്കാർ അവലംബിക്കുന്നത്, സി.എ.എ - എൻ.ആർ.സി വാർത്തകളും കോടതി- സർക്കാർ വിമർശനങ്ങളുമാണ്. ഇത് ന്യായമായ വാദമല്ലെന്ന് കോടതി നിരീക്ഷിച്ചു.