ജീവനക്കാരുടെ വെട്ടിക്കുറയ്ക്കലിന്റെ അവസാന ഘട്ടത്തിലേക്ക് കടന്നിരിക്കുകയാണ് ഒറാക്കിൾ കോർപ്പറേഷൻ. ചരിത്രത്തിലെ ഏറ്റവും വലിയ പിരിച്ചുവിടലുകളാണ് നടക്കുന്നത്. ആയിരക്കണക്കിന് ജീവനക്കാർക്ക് ജോലിയിൽ നിന്നും ഔദ്യോഗികമായി പിരിഞ്ഞുപോകാനുള്ള തീയതി ജൂൺ ഒന്നിനും ജൂൺ 15നും ഇടയിലാണ്. ഈ നടപടിയിലൂടെ കമ്പനി ഏകദേശം 30,000 ജീവനക്കാരെ ഒഴിവാക്കുമെന്നാണ് കണക്കാക്കുന്നത്. ഇത് അവരുടെ ആഗോള തൊഴിൽ ശക്തിയുടെ ഏതാണ്ട് 18 ശതമാനത്തോളം വരും.
ക്ലൗഡ്, ആർട്ടിഫിഷ്യൽ ഇന്റലിജൻസ് (AI) മേഖലകളിൽ ശക്തമായ വരുമാനവും വേഗത്തിലുള്ള വളർച്ചയും കൈവരിച്ചിട്ട് കൂടിയാണ് ഒറാക്കിളിലെ ഈ പിരിച്ചുവിടൽ. 2026 സാമ്പത്തിക വർഷത്തിലെ മൂന്നാം പാദത്തിൽ, ക്ലൗഡ് ഇൻഫ്രാസ്ട്രക്ചറിനും എഐ അധിഷ്ഠിത സേവനങ്ങൾക്കുമുള്ള വർധിച്ചുവരുന്ന ആവശ്യം കാരണം ഒറാക്കിൾ പ്രതീക്ഷിച്ചതിലും മികച്ച വരുമാനമാണ് റിപ്പോർട്ട് ചെയ്തത്.
ടെക് ടൈംസ് (Tech Times) റിപ്പോർട്ട് അനുസരിച്ച്, കമ്പനിയുടെ മൊത്തം വരുമാനം മുൻവർഷത്തെ അപേക്ഷിച്ച് 22ശതമാനം വർധിച്ച് 17.2 ബില്യൺ ഡോളറിലെത്തി, അതേസമയം ക്ലൗഡ് വരുമാനം 44ശതമാനം ഉയർന്ന് 8.9 ബില്യൺ ഡോളറായി. കമ്പനിയുടെ എഐ ബിസിനസ് ഇതിലും വേഗത്തിലാണ് വളർന്നത്. ഒറാക്കിൾ ക്ലൗഡ് ഇൻഫ്രാസ്ട്രക്ചറിന്റെ (Oracle Cloud Infrastructure) എഐ വിഭാഗം 243 ശതമാനം വളർച്ച രേഖപ്പെടുത്തിയപ്പോൾ, മൾട്ടിക്ലൗഡ് ഡാറ്റാബേസ് വരുമാനം 531ശതമാനം ആയി കുതിച്ചുയർന്നു. ഈ പാദത്തിലെ ഗാപ് (GAAP) അറ്റാദായം 3.7 ബില്യൺ ഡോളറായിരുന്നു.
ശക്തമായ സാമ്പത്തിക വളർച്ചയും വൻതോതിലുള്ള ജീവനക്കാരുടെ വെട്ടിക്കുറയ്ക്കലും തമ്മിലുള്ള ഈ വൈരുധ്യം, ഒറാക്കിളിൽ നിലവിൽ നടന്നുകൊണ്ടിരിക്കുന്ന വലിയൊരു മാറ്റത്തെയാണ് എടുത്തു കാണിക്കുന്നത്. ഇവിടെ കമ്പനി മാനേജ്മെന്റ് കൂടുതൽ അധ്വാനം ആവശ്യമുള്ള പ്രവർത്തനങ്ങളേക്കാൾ പ്രാധാന്യം നൽകുന്നത് എഐ (AI) ഇൻഫ്രാസ്ട്രക്ചർ നിക്ഷേപങ്ങൾക്കാണ്.
2026 സാമ്പത്തിക വർഷത്തിൽ ഒറാക്കിൾ ഏകദേശം 50 ബില്യൺ ഡോളറിന്റെ മൂലധനച്ചെലവാണ് (capital expenditure) നിശ്ചയിച്ചിരിക്കുന്നത്. ഇതിൽ ഭൂരിഭാഗവും എഐ ഡാറ്റാ സെന്ററുകളും ക്ലൗഡ് ഇൻഫ്രാസ്ട്രക്ചറും വികസിപ്പിക്കുന്നതിനാണ് വിനിയോഗിക്കുന്നത്. ഓപ്പൺഎഐയും സോഫ്റ്റ്ബാങ്കും ചേർന്ന് നടത്തുന്ന വൻതോതിലുള്ള എഐ ഇൻഫ്രാസ്ട്രക്ചർ സംരംഭമായ 'സ്റ്റാർഗേറ്റിലെ' (Stargate) ഒരു പ്രധാന പങ്കാളി കൂടിയാണ് ഒറാക്കിൾ.
കമ്പ്യൂട്ടിംഗ് ശേഷിക്കായുള്ള (computing capacity) ആവശ്യകത കുതിച്ചുയരുന്ന സാഹചര്യത്തിൽ, കൂടുതൽ വളർച്ചാസാധ്യതയുള്ള എഐ ബിസിനസുകളിലേക്ക് തങ്ങളുടെ വിഭവങ്ങൾ പുനർവിന്യസിക്കാനുള്ള ശ്രമങ്ങളുടെ ഭാഗമായാണ് ഈ പിരിച്ചുവിടലെന്ന് കമ്പനി എക്സിക്യൂട്ടീവുകൾ സൂചിപ്പിച്ചതായി ടെക് ടൈംസ് (Tech Times) റിപ്പോർട്ട് ചെയ്തു.
ജോലി നഷ്ടപ്പെട്ട ജീവനക്കാരെ സംബന്ധിച്ചിടത്തോളം ഈ മാറ്റം ഏറെ ബുദ്ധിമുട്ടേറിയതായിരുന്നു. പരമാവധി 26 ആഴ്ച വരെയുള്ള, സർവീസ് കാലയളവ് അടിസ്ഥാനമാക്കിയുള്ള പേഔട്ടുകൾ ഉൾപ്പെടുന്ന ഒറാക്കിളിന്റെ സെവറൻസ് പാക്കേജ് (severance package) ചില ജീവനക്കാരുടെ ഭാഗത്തുനിന്ന് കടുത്ത വിമർശനത്തിന് കാരണമായിട്ടുണ്ട്. മെച്ചപ്പെട്ട നഷ്ടപരിഹാര വ്യവസ്ഥകൾ ആവശ്യപ്പെട്ട് പിരിച്ചുവിടപ്പെട്ട ഒരു കൂട്ടം ജീവനക്കാർ നിവേദനം നൽകിയതായും റിപ്പോർട്ടുണ്ട്, എന്നാൽ പാക്കേജ് പരിഷ്കരിക്കാൻ കമ്പനി തയാറായില്ല.