കാബൂളിലെ പള്ളിയിൽ സ്ഫോടനം; ഇമാം അടക്കം 20ലേറെ മരണം
കാബൂളിലെ ഖൈർ ഖാന പ്രദേശത്തെ പള്ളിയിലാണ് സ്ഫോടനം നടന്നത്.
Update: 2022-08-18 02:22 GMT
അഫ്ഗാൻ തലസ്ഥാനമായ കാബൂളിലെ പള്ളിയിൽ വൻ സ്ഫോടനം. ഇമാം അടക്കം 20ലേറെ പേർ കൊല്ലപ്പെട്ടു. നിരവധി പേർക്ക് പരിക്കേറ്റു. ബുധനാഴ്ച പ്രദോഷ നമസ്കാര സമയത്തായിരുന്നു സംഭവം.
സ്ഫോടനത്തിൽ നിരവധി പേർ മരിച്ചുവെന്ന് പൊലീസ് പറഞ്ഞു. 20ലേറ പേർ മരിച്ചതായും 40ലേറ പേർക്ക് പരിക്കേറ്റതായും അഫ്ഗാൻ സുരക്ഷാ വൃത്തങ്ങൾ അൽ ജസീറയോട് പറഞ്ഞു. മരണ സംഖ്യ ഉയരുമെന്നും അജ്ഞാത ഉദ്യോഗസ്ഥനെ ഉദ്ധരിച്ച് അൽ ജസീറ റിപ്പോർട്ട് ചെയ്തു.
കാബൂളിലെ ഖൈർ ഖാന പ്രദേശത്തെ പള്ളിയിലാണ് സ്ഫോടനം നടന്നതെന്ന് പേര് വെളിപ്പെടുത്താത്ത ഒരു താലിബാൻ രഹസ്യാന്വേഷണ ഉദ്യോഗസ്ഥൻ പറഞ്ഞു.
മരിച്ചവരും പരിക്കേറ്റവരുമായി നിരവധി പേരുണ്ടെന്ന് താലിബാൻ സർക്കാർ വക്താവ് സബീഹുല്ല മുജാഹിദ് സ്ഥിരീകരിച്ചു. എന്നാൽ എത്രപേർ ഉണ്ടെന്ന് അദ്ദേഹം വ്യക്തമാക്കിയില്ല.
വടക്കൻ കാബൂളിലെ സമീപപ്രദേശങ്ങളിൽ ശക്തമായ സ്ഫോടന ശബ്ദം കേട്ടതായും സമീപത്തെ കെട്ടിടങ്ങളുടെയടക്കം ജനാലകൾ തകർന്നതായും ദൃക്സാക്ഷികൾ റോയിട്ടേഴ്സിനോട് പറഞ്ഞു.
കൊല്ലപ്പെട്ടവരിൽ പള്ളിയിലെ ഇമാമും ഉൾപ്പെടുന്നതായും മരണസംഖ്യ ഉയരുകയാണെന്നും ഉദ്യോഗസ്ഥൻ പറഞ്ഞു. ഇന്റലിജൻസ് സംഘം സ്ഥലത്തെത്തുകയും അന്വേഷണം ആരംഭിക്കുകയും ചെയ്തിട്ടുണ്ട്.