സിലിക്കണ്‍ വാലി താരമായിരുന്ന എലിസബത്ത് ഹോംസ് തെറാനോസ് തട്ടിപ്പു കേസില്‍ കുറ്റക്കാരി

യുഎസ് ബയോടെക് താരമായിരുന്ന എലിസബത്ത് ഹോംസ്(37) തട്ടിപ്പ് കേസില്‍ കുറ്റക്കാരി. സിലിക്കണ്‍വാലിയിലെ തന്‍റെ രക്തപരിശോധന സ്റ്റാര്‍ട്ടപ്പായ തെറാനോസിലെ നിക്ഷേപകരെ കബളിപ്പിച്ച കേസിലാണ് എലിസബത്ത് തിങ്കളാഴ്ച ശിക്ഷിക്കപ്പെട്ടത്.

വിപ്ലവകരമായ ഒരു പരീക്ഷണ സമ്പ്രദായമാണെന്ന് അവകാശപ്പെട്ട സംരംഭത്തിലേക്ക് പണം ഒഴുക്കാന്‍ നിക്ഷേപകരെ പ്രേരിപ്പിക്കുകയും പണം സമാഹരിച്ച് കബളിപ്പിച്ചതിനുമായി നാല് കേസുകളില്‍ സങ്കീര്‍ണവും ദൈര്‍ഘ്യമേറിയതുമായ വിചാരണയ്ക്ക് ശേഷം, ഹോംസ് കുറ്റക്കാരിയാണെന്ന് ജൂറിമാര്‍ കണ്ടെത്തുകയായിരുന്നു. ഒരു തുള്ളി ചോരയില്‍ നിന്നും അര്‍ബുദമടക്കമുള്ള രോഗങ്ങള്‍ കണ്ടെത്താന്‍ കഴിയുമെന്ന് തെറ്റിദ്ധരിപ്പിച്ചാണ് എലിസബത്ത് ലോകത്തെ മുഴുവന്‍ കബളിപ്പിച്ചത്. കുറ്റം തെളിയിക്കപ്പെട്ടതോടെ ഹോംസിന് വര്‍ഷങ്ങളോളം ജയിലില്‍ കഴിയേണ്ടി വരുമെന്നാണ് റിപ്പോര്‍ട്ട്.

ഫോബ്‌സ് മാസിക കമ്പനിയുടെ 9 ബില്യൺ ഡോളറിന്‍റെ മൂല്യനിർണയത്തിന്‍റെ അടിസ്ഥാനത്തിൽ അമേരിക്കയിലെ ഏറ്റവും പ്രായം കുറഞ്ഞതും സമ്പന്നവുമായ സ്വയം നിർമ്മിത വനിതാ ശതകോടീശ്വരിയായി ഹോംസിനെ തെരഞ്ഞെടുത്തിരുന്നു. എന്നാല്‍ തൊട്ടടുത്ത വർഷം, ക്ലെയിമുകളെക്കുറിച്ചുള്ള തട്ടിപ്പുകളുടെ വെളിപ്പെടുത്തലിനെത്തുടർന്ന്, ഫോബ്‌സ് അവളുടെ മൊത്തം ആസ്തി പൂജ്യമായി പ്രസിദ്ധീകരിച്ചു. ഫോർച്യൂൺ ഹോംസിനെ 'ലോകത്തിലെ ഏറ്റവും നിരാശാജനകമായ നേതാക്കളിൽ' ഒരാളായി തിരഞ്ഞെടുത്തു.

കമ്പനിയുടെ സാങ്കേതിക അവകാശവാദങ്ങളെക്കുറിച്ചും ഹോംസ് നിക്ഷേപകരെയും സർക്കാരിനെയും തെറ്റിദ്ധരിപ്പിച്ചിട്ടുണ്ടോയെന്നും നിരവധി മാധ്യമങ്ങളും മറ്റും സംശയം പ്രകടിപ്പിച്ചതോടെയാണ് 2015-ൽ തെറാനോസിന്‍റെ തകർച്ച ആരംഭിച്ചത്. കമ്പനിയുടെ രക്തപരിശോധനാ സാങ്കേതികവിദ്യയുടെ കൃത്യതയെക്കുറിച്ച് തെറ്റായതോ അതിശയോക്തിപരമോ ആയ അവകാശവാദങ്ങളിലൂടെ നിക്ഷേപകരെ വഞ്ചിച്ചതായി യുഎസ് സെക്യൂരിറ്റീസ് ആൻഡ് എക്സ്ചേഞ്ച് കമ്മീഷൻ കണ്ടെത്തിയിരുന്നു.

കാലിഫോർണിയ കോടതിയിൽ ഒരു മാസത്തോളം നീണ്ട വിചാരണയ്ക്കൊടുവിലാണ് തട്ടിപ്പിന് ഗൂഢാലോചന നടത്തിയതടക്കം നാലു കുറ്റങ്ങൾ കോടതി എലിസബത്തിനെതിരെ ചുമത്തിയത്. പ്രോസിക്യൂട്ടർമാർ 11 ആഴ്ചകള്‍ക്കിടയില്‍ രണ്ട് ഡസനിലധികം സാക്ഷികളെ ഹാജരാക്കി. ഹോംസിന് തന്‍റെ സാങ്കേതികവിദ്യ വാഗ്ദാനം ചെയ്തതുപോലെ പ്രവർത്തിക്കുന്നില്ലെന്ന് അറിയാമായിരുന്നുവെന്നും നിക്ഷേപകരെയും രോഗികളെയും തെറ്റിദ്ധരിപ്പിക്കാനുള്ള നടപടികൾ സ്വീകരിച്ചുവെന്നും അവർ ശക്തമായി വാദിച്ചു. കമ്പനിയുടെ രക്തപരിശോധനാ സാങ്കേതികവിദ്യയെ അഭിനന്ദിക്കുന്ന തെറാനോസ് റിപ്പോർട്ടുകളിൽ ഫാർമ ഭീമൻമാരായ ഫൈസർ, ഷെറിംഗ്-പ്ലോ എന്നിവയുടെ ലോഗോകൾ അവർ വ്യക്തിപരമായി ഉൾപ്പെടുത്തിയിരുന്നു. പ്രസ്തുത കമ്പനികളുടെ അനുമതിയില്ലാതെയായിരുന്നു അത്. തെറാനോസിന്‍റെ വിശ്വാസ്യത വർദ്ധിപ്പിക്കാൻ ഹോംസ് മനഃപൂര്‍വം നടത്തിയ ശ്രമമായിരുന്നു ഇതെന്നും പ്രോസിക്യൂഷന്‍ വാദിച്ചു. മാധ്യമഭീമന്‍ റൂപർട്ട് മർഡോക്ക്, ഹെന്‍റി കിസിംഗർ തുടങ്ങിയ പ്രമുഖരായ തെറാനോസ് നിക്ഷേപകർ സാക്ഷിപ്പട്ടികയിൽ ഉണ്ടായിരുന്നു.