അമ്മാൻ: അമേരിക്കയും ഇസ്രായേലും ഇറാനും തമ്മിലുള്ള സംഘർഷങ്ങൾ കൂടുതൽ രൂക്ഷമാകുന്നതിനിടെ, ജോർദാനിലെ അൽ-അസ്റഖിനടുത്തുള്ള മുവഫാഖ് സാൾട്ടി വ്യോമതാവളത്തിന് നേരെയുള്ള ആക്രമണങ്ങൾ ഇറാൻ ശക്തമാക്കി. കഴിഞ്ഞ കുറച്ച് ആഴ്ചകളായി ഈ സൈനിക താവളത്തെ ലക്ഷ്യം വെച്ചുള്ള ബോംബാക്രമണങ്ങൾ ഇറാൻ ഗണ്യമായി വർധിപ്പിച്ചിരിക്കുകയാണ്.
അമേരിക്കൻ സൈനികരുടെ പശ്ചിമേഷ്യയിലെ പ്രധാനപ്പെട്ട ഒരു ഓപ്പറേഷൻസ് ഹബ്ബായി ഈ വ്യോമതാവളം പ്രവർത്തിക്കുന്നുണ്ട് എന്നതാണ് ഇറാൻ പ്രധാനമായും ഈ പ്രദേശം ലക്ഷ്യമിടാനുള്ള കാരണം. യുഎസ് സൈനികരുടെ സുപ്രധാന താവളം എന്ന നിലയിൽ, ഈ യുദ്ധത്തിൽ ഇതൊരു നിയമാനുസൃതമായ ലക്ഷ്യമാണെന്ന് ഇറാൻ വിശ്വസിക്കുന്നു.
യുഎസ്-ഇസ്രായേൽ സംയുക്ത സേനയുമായുള്ള യുദ്ധത്തിന്റെ പശ്ചാത്തലത്തിലാണ് ഈ ആക്രമണങ്ങൾ നടക്കുന്നത്. ശത്രുപക്ഷത്തിന്റെ തന്ത്രപ്രധാനമായ പ്രദേശങ്ങളിൽ പ്രഹരമേൽപ്പിക്കാനും, അമേരിക്കയുടെ സൈനിക നീക്കങ്ങളെയും വ്യോമാക്രമണ ശേഷിയെയും തടസപ്പെടുത്താനും ലക്ഷ്യമിട്ടാണ് ഇറാൻ ഈ വ്യോമതാവളത്തിന് നേരെ തുടർച്ചയായ ആക്രമണങ്ങൾ നടത്തുന്നത്. ജോർദാൻ അതിർത്തിക്കുള്ളിലെ ഈ അമേരിക്കൻ സൈനിക സാന്നിധ്യമാണ് ഇറാനെ നിരന്തരം പ്രകോപിപ്പിക്കുന്നത്.
അമേരിക്കൻ സൈന്യം അഞ്ച് ഇറാനിയൻ എണ്ണ ടാങ്കറുകൾക്ക് നേരെ നടത്തിയ ആക്രമണത്തിന് തിരിച്ചടിയായാണ് ഈ വ്യോമതാവളത്തിന് നേരെ ഇറാൻ റവല്യൂഷണറി ഗാർഡ്സ് കനത്ത മിസൈൽ ആക്രമണം നടത്തിയത്. ഒമാൻ ഉൾക്കടലിലും ഖാർഗ് ദ്വീപിന് സമീപത്തുമായിരുന്ന ടാങ്കറുകൾക്ക് നേരെയാണ് അമേരിക്കൻ സെൻട്രൽ കമാൻഡ് ആക്രമണം നടത്തിയത്. ഇതിന് മറുപടിയായി അൽ-അസ്റഖ് താവളത്തിലേക്ക് ഇറാൻ തൊടുത്തുവിട്ട 20 ബാലിസ്റ്റിക് മിസൈലുകളിൽ 18 എണ്ണവും ജോർദാന്റെ വ്യോമപ്രതിരോധ സംവിധാനം തടഞ്ഞുനശിപ്പിച്ചു. ബാക്കി വന്ന രണ്ട് മിസൈലുകൾ ജനവാസമില്ലാത്ത തുറസായ പ്രദേശങ്ങളിൽ പതിച്ചതായാണ് ജോർദാൻ സൈന്യം ഔദ്യോഗികമായി അറിയിച്ചത്.
ഈ മിസൈൽ ആക്രമണത്തിൽ അൽ-അസ്റഖ് താവളത്തിലുണ്ടായിരുന്ന നിരവധി അമേരിക്കൻ യുദ്ധവിമാനങ്ങൾക്ക് കേടുപാടുകൾ സംഭവിച്ചതായി റിപ്പോർട്ടുകളുണ്ട്. അമേരിക്കയുടെ ഒരു എ-10 തണ്ടർബോൾട്ട് II വിമാനത്തിന്റെ ചിറകിന് ഗുരുതരമായി കേടുപാടുകൾ സംഭവിക്കുകയും, എട്ടോളം എഫ്-15 ഇ സ്ട്രൈക്ക് ഈഗിൾ ഫൈറ്റർ ജെറ്റുകൾക്ക് ചെറിയ തോതിൽ നാശനഷ്ടങ്ങൾ ഉണ്ടാവുകയും ചെയ്തു. അമേരിക്കൻ നാവിക സേനയ്ക്ക് നേരെ ഇറാൻ ആക്രമണം തുടർന്നാൽ കൂടുതൽ ഇറാനിയൻ ടാങ്കറുകൾ നശിപ്പിക്കുമെന്ന് അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ മുന്നറിയിപ്പ് നൽകിയിട്ടുണ്ട്. ഇരു രാജ്യങ്ങളും തമ്മിലുള്ള ഈ പോരാട്ടം കൂടുതൽ രൂക്ഷമാകുന്നത് ആഗോള തലത്തിൽ ക്രൂഡ് ഓയിൽ വില കുത്തനെ ഉയരാനും കാരണമായിട്ടുണ്ട്.