റെയിൽവേ ജീവനക്കാർക്ക് എല്ലാ ട്രെയിനുകളിലും സൗജന്യമായി യാത്ര ചെയ്യാമോ ? റെയിൽവേ ജീവനക്കാർക്ക് പാസ് സൗകര്യങ്ങൾക്ക് അർഹതയുണ്ടെങ്കിലും എല്ലാ ട്രെയിനുകളിലും പൂർണമായും സൗജന്യമായി യാത്ര ചെയ്യാൻ കഴിയില്ല എന്നതാണ് വസ്തുത. ഇത് സംബന്ധിച്ച് വളരെ വിശദമായി തന്നെ റെയിൽവേ മന്ത്രി അശ്വിനി വൈഷ്മവ് പാർലമെന്റിൽ പറഞ്ഞിട്ടുണ്ട്. ജീവനക്കാർക്ക് യാത്രയ്ക്കായി വിവിധ തരം പാസ് സൗകര്യങ്ങൾ നൽകാറുണ്ടെങ്കിലും എല്ലാ ട്രെയിനുകളിലും സൗജന്യ യാത്ര അനുവദനീയമാണ് എന്ന് ഇതിനർത്ഥമില്ല.
1986-ലെ 'റെയിൽവേ സെർവന്റ്സ് (പാസ്) റൂൾസ്' അനുസരിച്ചാണ് റെയിൽവേ ജീവനക്കാർക്ക് വിവിധ തരം പാസുകൾ അനുവദിക്കുന്നത്. പ്രിവിലേജ് പാസുകൾ (Privilege Passes), ഡ്യൂട്ടി പാസുകൾ (Duty Passes), വിരമിക്കലിന് ശേഷം നൽകുന്ന കോംപ്ലിമെന്ററി പാസുകൾ (Complimentary Passes) എന്നിവ ഇതിൽ ഉൾപ്പെടുന്നു. ജീവനക്കാർക്കും അവരുടെ കുടുംബാംഗങ്ങൾക്കും നിശ്ചിത ട്രെയിനുകളിൽ യാത്ര ചെയ്യുന്നതിനായി ഈ പാസുകൾ ഉപയോഗിക്കാം.ചില പ്രീമിയം ട്രെയിനുകൾ ഉൾപ്പെടെയുള്ള പ്രമുഖ സർവീസുകളിൽ റെയിൽവേ ജീവനക്കാരുടെ പാസുകൾ ഉപയോഗിക്കാം. വന്ദേ ഭാരത് എക്സ്പ്രസ്, രാജധാനി എക്സ്പ്രസ് , ശതാബ്ദി എക്സ്പ്രസ്
തുരന്തോ എക്സ്പ്രസ് ,ഹംസഫർ എക്സ്പ്രസ് ,ഗതിമാൻ എക്സ്പ്രസ് തുടങ്ങിയ പ്രീമിയം ട്രെയിനുകളിൽ പാസ് ഉപയോഗിക്കാം. റെയിൽവേയുടെ കണക്കനുസരിച്ച്, വന്ദേ ഭാരത്, ഗതിമാൻ എക്സ്പ്രസുകൾ ശതാബ്ദി ക്ലാസിന് തുല്യമായാണ് പരിഗണിക്കപ്പെടുന്നത്. എന്നിരുന്നാലും, ജീവനക്കാരന്റെ പദവി (Rank), പേ ലെവൽ (Pay Level) എന്നിവയെ ആശ്രയിച്ചായിരിക്കും ഏത് ക്ലാസിലാണ് യാത്ര ചെയ്യാൻ സാധിക്കുക എന്ന് തീരുമാനിക്കുന്നത്.
സൗജന്യ യാത്ര ലഭ്യമാകാത്ത ട്രെയിനുകൾ ഏവ?
റെയിൽവേ പാസുകൾ എല്ലാ ട്രെയിനുകൾക്കും ബാധകമല്ല. ആഡംബര, ടൂറിസ്റ്റ് ട്രെയിനുകളിൽ ജീവനക്കാർക്ക് ഈ സൗകര്യം ഉപയോഗിക്കാൻ അനുവാദമില്ല. മഹാരാജാസ് എക്സ്പ്രസ് (Maharajas' Express),പാലസ് ഓൺ വീൽസ് (Palace on Wheels) തുടങ്ങിയ ട്രെയിനുകളിൽ പാസുകൾ ഉപയോഗിക്കാൻ കഴിയില്ല. ഐആർസിടിസി, സംസ്ഥാന ടൂറിസം ഡെവലപ്മെന്റ് കോർപ്പറേഷനുകൾ തുടങ്ങിയ സ്ഥാപനങ്ങളാണ് ഈ ട്രെയിനുകൾ പ്രധാനമായും ഓപ്പറേറ്റ് ചെയ്യുന്നത്. ഇത്തരം ട്രെയിനുകൾക്കായി റെയിൽവേ പാസ് നിയമങ്ങളിൽ പ്രത്യേക വ്യവസ്ഥകളൊന്നും നൽകിയിട്ടില്ല.