മഴക്കാലത്ത് വണ്ടിയുമായി ഇറങ്ങുകയാണോ? ഇക്കാര്യങ്ങള് ശ്രദ്ധിക്കൂ...
വാഹന ഡ്രൈവര്മാര്ക്ക് ഏറെ ബുദ്ധിമുട്ടുള്ള കാലമാണ് മഴക്കാലം
Update: 2026-08-03 10:03 GMT
കനത്ത മഴ വിട്ടൊഴിഞ്ഞുപോകാത്ത കാലാവസ്ഥയാണിപ്പോള് കേരളത്തില്. പലയിടങ്ങളിലും വെള്ളക്കെട്ടും പ്രളയസമാന അവസ്ഥയും. വരും ദിവസങ്ങളിലും മഴ തുടരുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. വാഹന ഡ്രൈവര്മാര്ക്ക് ഏറെ ബുദ്ധിമുട്ടുള്ള കാലമാണ് മഴക്കാലം. മഴയില് വണ്ടിയോടിക്കുമ്പോള് റോഡില് അതീവ ശ്രദ്ധയും ജാഗ്രതയും ആവശ്യമാണ്.
മഴക്കാലത്ത് വാഹനമോടിക്കുമ്പോള് ഇക്കാര്യങ്ങള് ശ്രദ്ധിക്കൂ
- വെള്ളക്കെട്ടുള്ള സ്ഥലങ്ങളിലൂടെ കഴിയുന്നതും യാത്രകള് ഒഴിവാക്കുക
- ഓടകളും മാന്ഹോളുകളും വെള്ളം മൂടിക്കിടക്കുന്ന കുഴികളും ഒടിഞ്ഞ് കിടക്കുന്ന മരച്ചില്ലകളും പൊട്ടിക്കിടക്കുന്ന ഇലക്ട്രിക് ലൈനുകളും അപകടത്തിന് കാരണമാകാം.
- റോഡില് വെള്ളക്കെട്ടിലൂടെ, അതല്പം ചെറിയ വെള്ളക്കെട്ടെങ്കില് പോലും വേഗത്തില് വാഹനം ഓടിക്കാന് തോന്നും. അത് അത്യന്തം അപകടകരമായ 'ജലപാളി പ്രവര്ത്തനം' അഥവാ 'അക്വാപ്ലെയിനിങ്' എന്ന പ്രതിഭാസത്തിന് കാരണമായേക്കാം.
- മഴയത്ത് മറ്റ് വാഹനങ്ങളില് നിന്ന് അകലം പാലിച്ച് ഓടിക്കണം, മുന്നില് പോകുന്ന വാഹനങ്ങളില് നിന്ന് തെറിക്കുന്ന ചെളിവെള്ളം വീന്ഡ് ഷീല്ഡില് അടിച്ച് കാഴ്ചയ്ക്ക് അവ്യക്തതയുണ്ടാകുമെന്ന് മാത്രമല്ല ഈര്പ്പംമൂലം ബ്രേക്കിങ് ക്ഷമത പൊതുവെ കുറയുമെന്നതിനാല് മുന്നിലെ വാഹനം പെട്ടെന്ന് നിര്ത്തുമ്പോള് നമ്മള് വിചാരിച്ചിടത്ത് നമ്മുടെ വാഹനം നില്ക്കണമെന്നില്ല, കൂടാതെ മഴക്കാലത്ത് മുന്നിലെ വാഹനത്തിന്റെ ബ്രേക് ലൈറ്റ് പ്രവര്ത്തിക്കണമെന്നും ഇല്ല.
- വെള്ളം കവിഞ്ഞൊഴുകുന്ന പാലങ്ങളിലൂടെയോ റോഡിലൂടെയോ ഡ്രൈവ് ചെയ്യരുത്.
- സഡന് ബ്രേക്കിങ് ഒഴിവാക്കുന്ന രീതിയില് വാഹനം ഓടിക്കുന്നത് വാഹനം തെന്നിമാറുന്നത് (സ്കിഡ്ഡിങ്) ഒഴിവാക്കും.
- മഴയത്ത് പാര്ക്ക് ചെയ്യുമ്പോള് മരങ്ങളുടെ കീഴിലോ മലഞ്ചെരുവിലോ ഹൈ ടെന്ഷന് ലൈനുകളുടെ താഴെയോ ആകാതിരിക്കാന് ശ്രദ്ധിക്കുക.
- തീര്ത്തും ഒഴിവാക്കാനാകാത്ത സാഹചര്യത്തില് വെള്ളക്കെട്ടിലൂടെ പോകേണ്ടിവരുമ്പോള് താഴ്ന്ന ഗിയറില് മാത്രം ഓടിക്കുക. ഈ അവസരത്തില് വണ്ടി നില്ക്കുകയാണെങ്കില് ഒരു കാരണവശാലും വീണ്ടും സ്റ്റാര്ട്ട് ചെയ്യാതെ വണ്ടിയില് നിന്നും ഇറങ്ങി തള്ളി മാറ്റാന് ശ്രമിക്കണം.
- ബ്രേക്കിനകത്ത് വെള്ളം കയറുകയാണെങ്കില് കുറച്ച് ദൂരത്തേക്ക് ബ്രേക്ക് പതിയെ ചവിട്ടിക്കൊണ്ട് ഫസ്റ്റ് ഗിയറില് തന്നെയോടിക്കാം. അതിനുശേഷം ബ്രേക്ക് ചെറുതായി ചവിട്ടി പിടിച്ച് കുറച്ച് ദൂരം ഓടിച്ചതിന് ശേഷം ഒന്നു രണ്ട് തവണ ഇടവിട്ട് ബ്രേക്ക് ചവിട്ടി കാര്യക്ഷമത ഉറപ്പ് വരുത്തണം.
- വെള്ളക്കെട്ടിലൂടെ കടന്ന് പോകുമ്പോള് എസി ഓഫ് ചെയ്യുക.
- മഴക്കാലത്ത് ട്രാഫിക് ബ്ലോക്ക് കൂടും. വേഗത കൂട്ടാതെ സമയം കണക്കാക്കി മുന്കൂട്ടി യാത്രതിരിക്കുക.
- പാര്ക്ക് ചെയ്തിട്ടുള്ള വാഹനത്തില് വെള്ളം കയറിയെങ്കില് ഒരു കാരണവശാലും സ്റ്റാര്ട്ടാക്കാന് ശ്രമിക്കരുത്. സര്വിസ് സെന്ററില് അറിയിക്കുക.
- മഴക്കാലത്ത് ഗൂഗിള് മാപ്പിനെ മാത്രം ആശ്രയിച്ച് വാഹനം ഓടിക്കുന്നത് ഒഴിവാക്കുക.
- വാഹനത്തിന്റെ ടയര് അടക്കമുള്ള ഭാഗങ്ങളുടെയും ഇലക്ട്രിക്കലും മെക്കാനിക്കലുമായ ഭാഗങ്ങളുടെയും ക്ഷമത ഉറപ്പ് വരുത്തുക.