Writer - നബിൽ ഐ.വി
Trainee Web Journalist, MediaOne
സെറ്റ് പരീക്ഷയ്ക്കുള്ള ഓണ്ലൈന് രജിസ്ട്രേഷന് ഇന്ന് മുതല്
ബിരുദാനന്തര ബിരുദ പരീക്ഷയില് 50 ശതമാനത്തില് കുറയാതെ മാര്ക്ക് അല്ലെങ്കില് തത്തുല്യ ഗ്രേഡും, ബിഎഡുമാണ് അടിസ്ഥാന യോഗ്യത
Update: 2025-04-28 10:29 GMT
തിരുവനന്തപുരം: ഹയര് സെക്കണ്ടറി, നോണ് വൊക്കേഷണല് ഹയര്സെക്കണ്ടറി അധ്യാപക നിയമനത്തിനുള്ള സ്റ്റേറ്റ് എലിജിബിലിറ്റി ടെസ്റ്റിന് ഇന്ന് മുതല് ഓണ്ലൈനായി രജിസ്റ്റര് ചെയ്യാം. എല്ബിഎസ് സെന്റര് ഫോര് സയന്സ് ആന്ഡ് ടെക്നോളജിയാണ് പരീക്ഷ നടത്തുന്നത്. www.lbscentre.kerala.gov.in വഴി മെയ് 28ന് വൈകിട്ട് അഞ്ചുവരെ അപേക്ഷിക്കാം.
ബിരുദാനന്തര ബിരുദ പരീക്ഷയില് 50 ശതമാനത്തില് കുറയാതെ മാര്ക്ക് അല്ലെങ്കില് തത്തുല്യ ഗ്രേഡും, ബിഎഡുമാണ് അടിസ്ഥാന യോഗ്യത. ചില പ്രത്യേക വിഷയങ്ങളില് ബിരുദാനന്തര ബിരുദമുള്ളവരെ ബിഎഡ് വേണമെന്ന നിബന്ധനയില് നിന്നും ഒഴിവാക്കിയിട്ടുണ്ട്. എല്ടിടിസി, ഡിഎല്ഇഡി തുടങ്ങിയ ട്രെയിനിങ് കോഴ്സുകള് വിജയിച്ചവരെ പരിഗണിക്കും. എസ്സി/എസ്ടി വിഭാഗത്തില്പ്പെടുന്നവര്ക്കും പിഡബ്ലിയുഡി വിഭാഗത്തില്പ്പെടുന്നവര്ക്കും ബിരുദാനന്തര ബിരുദത്തിന് അഞ്ച് ശതമാനം മാര്ക്ക് ഇളവുണ്ട്.
ജനറല് ഒബിസി വിഭാഗങ്ങളില്പ്പെടുന്നവര് പരീക്ഷാ ഫീസിനത്തില് 1300 രൂപയും, എസ്സി/എസ്ടി/പിഡബ്ലിയുഡി എന്നീ വിഭാഗങ്ങളില്പ്പെടുന്നവര് 750 രൂപയും ഓണ്ലൈനായി അടയ്ക്കണം. പിഡബ്ലിയുഡി വിഭാഗത്തിലുള്ളവര് മെഡിക്കല് സര്ട്ടിഫിക്കറ്റിന്റെ ഗസറ്റഡ് ഓഫീസര് സാക്ഷ്യപ്പെടുത്തിയ പകര്പ്പ്, എസ്സി/എസ്ടി വിഭാഗത്തിലുള്ളവര് ജാതി തെളിയിക്കുന്ന സര്ട്ടിഫിക്കറ്റിന്റെ ഒറിജിനല്, ഒബിസി നോണ്ക്രീമിലെയര് വിഭാഗത്തില്പ്പെടുന്നവര് നോണ് ക്രീമിലെയര് സര്ട്ടിഫിക്കറ്റിന്റെ ഒറിജിനല് (2024 ഏപ്രില് 29നും 2025 ജൂണ് നാലിനും ഇടയില് ലഭിച്ചതായിരിക്കണം) എന്നിവ സെറ്റ് പാസ്സാകുന്ന പക്ഷം അപേക്ഷയോടൊപ്പം ഹാജരാക്കണം.