തമിഴകത്ത് വിവാദത്തിനൊപ്പം നിരൂപക പ്രശംസയും നേടിയ കാര്‍ത്തിക് സുബ്ബരാജ് ചിത്രം ദൊറോത്തി ഒടിടിയിലേക്ക്. തിയറ്റര്‍ റിലീസ് ചെയ്ത് നാലാഴ്ചക്ക് ശേഷമാണ് ചിത്രം നെറ്റ്ഫ്ലിക്സിൽ സ്ട്രീം ചെയ്യുന്നത്. ഒക്ടോബര്‍ 23 മുതൽ പ്രേക്ഷകര്‍ക്ക് ചിത്രം ഒടിടിയിൽ കാണാം.
90-കളിലെ മധുരൈ പശ്ചാത്തലത്തിൽ, ഒരു പുരുഷാധിപത്യ കുടുംബത്തിലെ ട്രാൻസ്‌ജെൻഡർ വ്യക്തിയുടെ ജീവിതം പറയുന്നതാണ് സിനിമയുടെ പ്രമേയം.ചിത്രത്തിലെ ഒരു ചുംബനരംഗം ലീക്കായത് വിവാദമായിരുന്നു. നാടിന്‍റെ സംസ്കാരത്തെ നശിപ്പിക്കുന്നു എന്നായിരുന്നു ഒരു വിഭാഗത്തിന്‍റെ ആരോപണം. ഇത്തരം സിനിമകളെ പ്രോത്സാഹിപ്പിക്കരുതെന്ന് ആവശ്യപ്പെട്ട് #BoycottDorothy എന്ന ഹാഷ്‌ടാഗും എക്സില്‍ വ്യാപകമായിരുന്നു.
കാര്‍ത്തിക് സുബ്ബരാജാണ് ചിത്രത്തിന്‍റെ രചനയും സംവിധാനവും നിര്‍വഹിച്ചിരിക്കുന്നത്. കീര്‍ത്തി സുരേഷാണ് ടൈറ്റിൽ കഥാപാത്രത്തെ അവതരിപ്പിച്ചിരിക്കുന്നത്. ഋഷികാന്ത്, സനന്ദ് എന്നിവരാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. ചിത്രത്തെ മണിരത്നം ഉൾപ്പെടെയുള്ളവര്‍ പ്രശംസിച്ചിരുന്നു.