ഷൈന്‍ ടോം ചാക്കോയോടൊപ്പം ഇനി അഭിമുഖമല്ല, അഭിനയം; പാര്‍വതി ബാബു സിനിമാ അരങ്ങേറ്റത്തിന് ഒരുങ്ങുന്നു
ഇര്‍ഷാദ് പരാരി സംവിധാനം ചെയ്യുന്ന 'അയല്‍വാശി' എന്ന ചിത്രത്തിലാണ് പാര്‍വതി അഭിനയിക്കുന്നത്
Update: 2023-01-03 10:13 GMT
അഭിമുഖ പരിപാടികളിലൂടെയും മോഡലിങ്ങിലൂടെയും ശ്രദ്ധേയയായ പാര്‍വതി ബാബു ആദ്യമായി സിനിമയില്‍ അഭിനയിക്കുന്നു. ഷൈന്‍ ടോം ചാക്കോയുടെ അഭിമുഖ പരമ്പരയിലൂടെ വൈറലായ പാര്‍വതി താരത്തിന്‍റെ ചിത്രത്തിലൂടെ തന്നെയാണ് അരങ്ങേറ്റം കുറിക്കുന്നത്. ഇര്‍ഷാദ് പരാരി സംവിധാനം ചെയ്യുന്ന 'അയല്‍വാശി' എന്ന ചിത്രത്തിലാണ് പാര്‍വതി അഭിനയിക്കുന്നത്.
ലൂസിഫര്‍, കുരുതി, ആദം ജോണ്‍ എന്നീ ചിത്രങ്ങളില്‍ അസോസിയേറ്റ് സംവിധായകനായി പ്രവര്‍ത്തിച്ച ഇര്‍ഷാദ് പരാരിയുടെ ആദ്യ ചിത്രമാണ് അയല്‍വാശി. സൗബിന്‍ ഷാബിര്‍ നായകനായ ചിത്രത്തില്‍ നിഖില വിമല്‍ ആണ് നായിക. ബിനു പപ്പു, ലിജോ മോള്‍, ഷൈന്‍ ടോം ചാക്കോ, നസ്‍ലിന്‍, എം.എസ് ഗോകുലന്‍, അജ്മല്‍ ഖാന്‍, സ്വാതി ദാസ് പ്രഭു, അഖില ഭാര്‍ഗവന്‍, ജഗദീഷ് എന്നിവര്‍ ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കും.
തല്ലുമാലക്ക് ശേഷം ആഷിഖ് ഉസ്‍മാന്‍ പ്രൊഡക്ഷന്‍സ് നിര്‍മാണം നിര്‍വ്വഹിക്കുന്ന ചിത്രം കൂടിയാണ് 'അയല്‍വാശി'. സംവിധായകനും തിരക്കഥാകൃത്തും ഗാനരചയിതാവുമായ മുഹ്സിന് പരാരി ചിത്രത്തിന്‍റെ നിര്‍മാണ പങ്കാളിയാണ്. മുഹ്സിന് പരാരിയുടെ സഹോദരനാണ് സംവിധായകനായ ഇര്‍ഷാദ് പരാരി. സജിത് പുരുഷന്‍ ഛായാഗ്രഹണവും ജേക്ക്സ് ബിജോയി സംഗീത സംവിധാനവും നിര്‍വ്വഹിക്കും. എഡിറ്റിംഗ്-സിദ്ദീഖ് ഹൈദര്‍. പ്രൊജക്ട് ഡിസൈനര്‍-ബാദുഷ എന്‍.എം. മേക്കപ്പ്-റോണക്സ് സേവ്യര്‍. വസ്ത്രാലങ്കാരം-മഷാര്‍ ഹംസ. ഡിസൈന്‍സ്-യെല്ലോ ടൂത്ത്സ്.