തിയറ്ററുകള്ക്ക് പിന്നാലെ ഒടിടി പ്ലാറ്റ്ഫോമിലൂടെ പ്രേക്ഷകരിലെത്തിയ കള എന്ന ചിത്രത്തെക്കുറിച്ച് സമ്മിശ്ര പ്രതികരണമാണ് ലഭിക്കുന്നത്. ടൊവിനോ തോമസ് നായകനായ ചിത്രത്തില് വയലന്സ് കൂടിപ്പോയെന്നും വിമര്ശനമുയര്ന്നിരുന്നു. എന്നാല് കള ഒരു ഫീല്ഗുഡ് സിനിമ ആയിരുന്നെങ്കില് എങ്ങനെയായിരിക്കും എന്ന വീഡിയോ പങ്കുവച്ചിരിക്കുകയാണ് ടൊവിനോ. സണ്ഡേ ഹോളിഡേ ഉള്പ്പെടെയുള്ള ചിത്രങ്ങളിലെ രംഗങ്ങള് കോര്ത്തിണക്കിയാണ് വീഡിയോ എഡിറ്റ് ചെയ്തിരിക്കുന്നത്.
'വിട്ടുകള' എന്നാണ് ചിത്രത്തിന് പേരിട്ടിരിക്കുന്നത്. 'നമുക്ക് ചുറ്റുമുള്ള ലോകം അഹംഭാവങ്ങളില് നിന്നും സംഘര്ഷങ്ങളില് നിന്നും മുക്തരായിരുന്നുവെങ്കില് എല്ലാവരും ഈ ഷാജിയെപ്പോലെ ദയയുള്ളവരായിരുന്നുവെങ്കില് കള ഇതുപോലൊരു ഫീല് ഗുഡ് സിനിമയാകുമായിരുന്നു! എന്നാല് ലോകം അങ്ങനെയല്ല, അതുകൊണ്ടാണ് കള ഇപ്പോള് ഫീല് ബാഡ് സിനിമയായത്. എന്ന കുറിപ്പിനൊപ്പമാണ് ഈ വീഡിയോ ടൊവിനോ പങ്കുവെച്ചിരിക്കുന്നത്. അഖില് വിഷ്ണു ആണ് ഈ വീഡിയോ തയാറാക്കിയിരിക്കുന്നത്.
രോഹിത് വി.എസാണ് കളയുടെ സംവിധാനം. ടൊവിനോക്കൊപ്പം സുമേഷ് മൂര്, ലാല് എന്നിവരാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. സൈക്കോ ത്രില്ലര് ഗണത്തില് പെടുത്താവുന്ന ചിത്രത്തില് നിരവധി സംഘട്ടന രംഗങ്ങളും ഉള്പ്പെടുത്തിയിട്ടുണ്ട്.