ഓസ്ലോ: ആർട്ടിക് സർക്കിളിന് വടക്കുള്ള ഒരു ചെറിയ മത്സ്യബന്ധന ദ്വീപായ സോമറോയ് സമയവുമായുള്ള അതിന്റെ അസാധാരണ ബന്ധം കാരണം ലോകത്ത് ശ്രദ്ധ പിടിച്ചുപറ്റിയിട്ടുണ്ട്. 300ൽ താഴെ ആളുകൾ മാത്രം താമസിക്കുന്ന ഈ നോർവീജിയൻ ദ്വീപ് ചില കാലങ്ങളിൽ സമയത്തെ ലംഘിക്കുന്ന ഒരു ജീവിതശൈലി സ്വീകരിക്കുന്നതിന് പേരുകേട്ടതാണ്.
വേനൽ കാലത്തിലെ 69 ദിവസം സൂര്യൻ ഇവിടെ തുടർച്ചയായി വെളിച്ചം വീശുന്നു. അർധരാത്രിയിലും സൂര്യൻ ചക്രവാളത്തിന് മുകളിൽ തങ്ങിനിൽക്കുമ്പോൾ സോമറോയ് തടസമില്ലാത്ത പകൽ വെളിച്ചത്തിൽ കുളിച്ചുനിൽക്കും. ഈ കാലയളവിൽ സോമറോയ് ദ്വീപിലെ ദൈനംദിന ജീവിതത്തിൽ അസാധാരണമാംവിധം വ്യത്യാസമുണ്ടാകും.
ഫുട്ബോൾ മത്സരങ്ങൾ പുലർച്ചെ രണ്ട് മണിക്കും മൂന്ന് മണിക്കുമാണ് ആരംഭിക്കും, കുട്ടികൾ പുലർച്ചെക്ക് മുന്നേ മീൻ പിടിക്കാൻ പോകുന്നു, ഉടമകൾക്ക് താൽപ്പര്യം തോന്നുമ്പോൾ മാത്രം കടകൾ തുറക്കുന്നു. വിശക്കുമ്പോൾ ഭക്ഷണം കഴിക്കുകയും ക്ഷീണിക്കുമ്പോൾ ഉറങ്ങുകയും ചെയ്യുമെന്ന് പ്രദേശവാസികൾ. ഇവിടെ കർശനമായ ഷെഡ്യൂളുകൾ അനാവശ്യമായി കണക്കാക്കപ്പെടുന്നു.
എന്നാൽ വേനൽക്കാലം അതിരുകളില്ലാത്ത പകൽ വെളിച്ചം കൊണ്ടുവരുമ്പോൾ ശൈത്യകാലം നേരെ വിപരീതമാണ്. നവംബറിനും ജനുവരിക്കും ഇടയിൽ ഇവിടെ സൂര്യൻ ഉദിക്കുന്നില്ല. ഈ കാലഘട്ടം സോമറോയിൽ ധ്രുവ രാത്രിയുടെ (Polar Night) കാലമാണ്. ഇരുട്ട് രാത്രിയിലെ വടക്കൻ വെളിച്ചങ്ങളുടെ പ്രദർശനത്തിനുള്ള പശ്ചാത്തലമായി മാറുന്നു. ആകാശത്ത് പ്രദർശനം തീർക്കുന്ന പച്ചയും വയലറ്റ് നിറങ്ങളിലുള്ള വെളിച്ചത്തെ വീക്ഷിച്ചുകൊണ്ട് നീണ്ട വൈകുന്നേരങ്ങളിൽ നാട്ടുകാർ വെളിയിൽ ഒത്തുകൂടുന്നു. ലോകമെമ്പാടുമുള്ള വിനോദസഞ്ചാരികളെ ആകർഷിക്കുന്ന ഒരു കാഴ്ച കൂടിയാണിത്.